Ax tok tzaj Diluvio. Tzaj tqʼoʼn Dios nim jbʼal tuʼntzun kykubʼ tnajsaʼn qe xjal nya bʼaʼn. Ex xi tqʼamaʼn te Noé tuʼn tkubʼ tbʼinchaʼn jun ark tuʼntzun kyklet tbʼanel xjal ex qe txkup moqa jil (Génesis 6:11-20). Jaku tzʼok qeʼ qkʼuʼj tiʼj qa ax tok tzaj Diluvio tuʼnju atzun in tzaj tqʼamaʼn Biblia ex «a Dios o qʼmante» tkyaqilju tzʼibʼin toj (2 Timoteo 3:16).

•  ¿Axpe tok moqa noq jun cuento?

•  ¿Tiquʼn tzaj tqʼoʼn Dios nim jbʼal kyibʼaj xjal?

•  ¿Ojtzqiʼnpe kyuʼn xjal qa tuʼn ttzaj Diluvio?

•  ¿Tzeʼn ark bʼaj tbʼinchaʼn Noé?

•  ¿Jteʼ ambʼil xi tiʼn tuʼn tbʼant ark tuʼn Noé?

•  Qe cuento ex qe txʼolbʼabʼil tiʼj Diluvio

 In tzaj tqʼamaʼn Biblia qa ax tok anqʼin Noé ex qa tzaj Diluvio. Tuʼntzunju, nya noq jun cuento ex nya jun txʼolbʼabʼil jlu.

•   Aʼyeju xjal kubʼ kytzʼibʼin Biblia, ok qeʼ kykʼuʼj tiʼj qa ax tok ten Noé. Jun techel, kubʼ ttzʼibʼin investigador Esdras ex Lucas tbʼi Noé kyxol qe kyyajil xjal te Israel (1 Crónicas 1:4; Lucas 3:36). Ax ikx, kyoj uʼj kubʼ ttzʼibʼin Mateo ex Lucas, e yolin tiʼjju tqʼama Jesús tiʼj Diluvio toj tqʼijlalil Noé (Mateo 24:37-39; Lucas 17:26, 27).

   Ax ikx, yolin profeta Ezequiel ex apóstol Pablo tiʼj Noé ex kyqʼama qa kubʼ tqʼoʼn jun tbʼanel techel tuʼnju ten qʼuqbʼil tkʼuʼj ex ten tzʼaqli twitz Dios (Ezequiel 14:14, 20; Hebreos 11:7). Noqwit nya ax tok anqʼin Noé, ¿tojpe tumel tuʼn kyyolin xjal lu tiʼj? Miʼn. Kyaj tqʼoʼn Noé ex junjuntl tmajen Dios tbʼanel techel qwitz tuʼnju ax tok e anqʼin (Hebreos 12:1; Santiago 5:17).

•   In tzaj tqʼoʼn Tyol Dios junjun tqanil tiʼj Diluvio. Jaku tzʼel qnikʼ tiʼj qa nya noq jun cuento Diluvio tuʼnju mintiʼ in xi tzyet kyukʼil yol lu: «Toj jun maj...». Sino in tzaj tqʼamaʼn Biblia alkye abʼqʼi, alkye xjaw ex alkye qʼij e bʼaj qe tiʼchaq at kyoklen tukʼil Diluvio (Génesis 7:11; 8:4, 13, 14). Ax ikx, in tzaj tqʼoʼn tqanil kyiʼj medida e ajbʼen tiʼj ark bʼant tuʼn Noé (Génesis 6:15). Kyuʼn tqanil lu, in nel qnikʼ tiʼj qa ax tok aju in tzaj tqʼamaʼn Biblia tiʼj Diluvio ex nya noq jun cuento.

 In tzaj tqʼamaʼn Tyol Dios qa tej naʼmxtoq ttzaj Diluvio, «mya bʼaʼntoq kybʼinchbʼen xjal twitz txʼotxʼ» (Génesis 6:5). Ex «otoq chmet il twitz txʼotxʼ tuj twitz Dios» tuʼnju oʼkxtoq in che ximen xjal tiʼj bʼiybʼil ex tiʼj yaẍbʼil (Génesis 6:11; Judas 6, 7).

 Ex in tzaj tqʼamaʼn Biblia qa chmet il lu tuʼnju e kuʼtz junjun nya bʼaʼn anjel twitz Txʼotxʼ tuʼntzun kykubʼ ten kyukʼil xuʼj. Ul itzʼj kykʼwal anjel lu ex ok qʼoʼn kybʼi te nefilim. Ax ikx, ok kybʼinchaʼn nim nya bʼaʼn kyiʼj xjal (Génesis 6:1, 2, 4). Kubʼ t-ximen Dios tuʼn tkubʼ tnajsaʼn qe xjal nya bʼaʼn ex xi tqʼoʼn ambʼil kye tbʼanel xjal tuʼn kyanqʼin (Génesis 6:6, 7, 17).

 Ikju. Otoq txi tqʼamaʼn Dios te Noé tiʼ tuʼn tbʼaj ex xi tqʼamaʼn te tuʼn tjaw tbʼinchaʼn jun ark tuʼntzun tklet tfamilia ex qe txkup (Génesis 6:13, 14; 7:1-4). Xi tqʼamaʼn Noé kye xjal qa tuʼn ttzaj nim jbʼal, pero mintiʼ ok kyqʼoʼn kywiʼ tiʼj tyol (2 Pedro 2:5). In tzaj tqʼamaʼn Tyol Dios jlu: «Mintiʼtoq tok kykwent tiʼj tej ttzaj qʼeqabʼ kyibʼaj; kykyaqiltzun e jeʼx qʼiʼn tuʼn aʼ» (Mateo 24:37-39).

 Iktoq keʼyin ark ik tzeʼn jun kaj rectangular. Attoq junlo 133 metro tqʼelil moqa tnuqbʼil, 22 metro twitz ex 13 metro twaʼlil. a Bʼalo ajbʼen tzis moqa witen tuʼn tbʼant ark ex ok qʼoʼn alquitrán tiʼjxi ex tojxi. Ex bʼaj bʼinchaʼn te oxe nivel ex attoq nim kwart toj. Attoq jun pwert twitz ex ateʼ junjun tal ventan twiʼ. Ax ikx, iltoq tiʼj tuʼn tkyaj bʼinchet toj twiʼ tuʼntzun tel bʼet aʼ tiʼj toj kykabʼil plaj (Génesis 6:14-16).

 Mintiʼ in tzaj tqʼamaʼn Tyol Dios, pero bʼalo xi tiʼn nim ambʼil. Qʼiʼntoq mas te 500 abʼqʼi tuʼn Noé tej tul itzʼj tnejel tkʼwal ex qʼiʼntoq 600 abʼqʼi tuʼn tej ttzaj jbʼal (Génesis 5:32; 7:6). b

 Xilo tqanin Dios te Noé tuʼn tkubʼ tbʼinchaʼn ark tej otoqxi tzikʼ junlo 50 moqa 60 abʼqʼi kyulen itzʼj tkʼwal ex tej otoqxi che kubʼ mojeʼ (Génesis 6:14, 18). Qa ikju, toj tumel tuʼn tkubʼ qximen qa xi tiʼn junlo 40 moqa 50 abʼqʼi tuʼn tbʼaj tbʼinchaʼn ark.