In tzaj tqʼamaʼn Biblia qa kyxol kykyaqil qeju in che anqʼin tzalu twitz Txʼotxʼ noq junjun xjal che xeʼl toj kyaʼj (Apocalipsis 14:1, 3). Kxel qʼoʼn kyoklen te rey ex te pal junx tukʼil Jesús (Lucas 22:28-30; Apocalipsis 5:9, 10). Atzun kye txqantl xjal, che kjawil anqʼin tzalu twitz Txʼotxʼ aj tok te jun Paraíso (Salmo 37:11, 29).

 Mintiʼ in yolin Biblia tiʼj jun lugar toj kyaʼj kye txʼyan moqa te juntl txkup. ¿Tiquʼn? Tuʼnju mlay bʼant junjun tiʼchaq kyuʼn txkup tuʼn ttzaj qʼoʼn txokbʼil kyiʼj tuʼn kyxiʼ toj kyaʼj (Hebreos 3:1). Jun techel, mlay bʼant tuʼn tten kyojtzqibʼil, tuʼn tten qʼuqbʼil kykʼuʼj ex mlay bʼant tuʼn t-xi kynimen qe tkawbʼil Dios (Mateo 19:17; Juan 3:16; 17:3). Nya oʼkxju, sino ax ikx oʼkx qe xjal o che kubʼ bʼinchaʼn tuʼn kyanqʼin te jumajx (Génesis 2:16, 17; 3:22, 23).

 Tuʼn t-xiʼ jun xjal toj kyaʼj, tnejel il tiʼj tuʼn tjaw anqʼin (1 Corintios 15:42). In yolin Tyol Dios kyiʼj junjun xjal e kyim ex e jaw anqʼin (1 Reyes 17:17-24; 2 Reyes 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Hechos 9:36-42; 20:7-12). Tej tbʼaj jlu, oʼkx e jaw anqʼin xjal ex mintiʼ in yolin kyiʼj txkup.

•  ¿Tiʼ in bʼaj aj kykyim txkup?

•  ¿In che b’inchanpe txkup il?

•  ¿Bʼaʼnpe in nela toj twitz Dios aj tok qbʼinchaʼn nya bʼaʼn kyiʼj txkup?

  In tzaj tqʼamaʼn Tyol Dios qa at kychwinqlal xjal ex txkup ex qa junx bʼinchabʼin kye. In tzaj tqʼamaʼn qa e kubʼ bʼinchaʼn «tiʼj tquqil txʼotxʼ» ex qa «okx t-xupin Dios t-xew» tuʼn tqʼonte kychwinqlal (Génesis 1:24; 2:7; Números 31:28).

 Ax ikx in tzaj tqʼamaʼn Tyol Dios qa jaku che kyim xjal ex qe txkup (Éxodo 19:13). Aj kykyim xjal ex txkup, in che ok juntl maj te quq (Eclesiastés 3:19, 20). Toj juntl yol, ya mintiʼ in che anqʼin. a

  Mintiʼ. In qo bʼinchan il aj tkubʼ qximen moqa aj tkubʼ qbʼinchaʼn jun tiʼ junxitl twitzju in tzaj tqʼamaʼn Dios. Tuʼn jlu, in nel qnikʼ tiʼj qa il tiʼj tuʼn tkubʼ qximen tiʼ tuʼn tkubʼ qbʼinchaʼn, qa aju bʼaʼn moqa aju nya bʼaʼn. Pero mintiʼ o tzaj qʼoʼn ambʼil kye txkup tuʼn tbʼant jlu kyuʼn. Ax ikx, nya nim ambʼil in che anqʼin ex mintiʼ in che ximen aj tbʼant jun tiʼ kyuʼn (2 Pedro 2:12). Aj tbʼaj ambʼil lu, in che kyim maske mintiʼ otoq che bʼinchan il.

  Nya. O tzaj tqʼoʼn kyoklen xjal tuʼn kykawin kyibʼaj txkup, pero mintiʼ o tzaj tqʼoʼn kyoklen tuʼn tok kybʼinchaʼn nya bʼaʼn kyiʼj (Génesis 1:28; Salmo 8:6-8). In ximen Dios kyiʼj kykyaqil txkup, axpe ikx kyiʼj pájaro (Jonás 4:11; Mateo 10:29). Ax ikx, xi tqʼamaʼn kye tmajen tuʼn kyxqʼuqin kyiʼj (Éxodo 23:12; Deuteronomio 25:4; Proverbios 12:10).