Mintiʼ in yolin Tyol Dios tiʼj Halloween moqa tiʼj Kyqʼij kyimni, jun fiesta in kubʼ kyikʼsaʼn xjal tkyaqil abʼqʼi toj 31 te octubre. Ex mintiʼ toklen fiesta lu ex aju in bʼant kyuʼn xjal toj qʼij lu tukʼilju in tzaj tqʼamaʼn Tyol Dios.

Toj xnaqʼtzbʼil lu, kʼelel qnikʼ tiʼj jlu:

•  Jatumel tzaj Halloween ex aju in bʼant kyuʼn xjal toj fiesta lu

•  ¿Bʼaʼnpe tuʼn tkubʼ qikʼsaʼn fiesta lu maske tzajni kyukʼil nya okslal?

•  ¿Tiʼtzun t-xilen bʼibʼaj Halloween?

•   Samhain. Ma tzikʼ junlo kabʼe mil abʼqʼi tkubʼlen ikʼsaʼn fiesta lu ex kubʼ kyximen xjal aju kubʼ tzʼibʼin toj libro Mitos celtas. In tzaj tqʼamaʼn jlu: «Jakutoq che bʼet kyanmi kyimni twitz Txʼotxʼ ex jakutoq cheʼx xjal visitaril kynajbʼil kyimni». In tzaj tqʼamaʼntl libro lu: «Kukx in kubʼ ikʼsaʼn fiesta te Samhain toj ambʼil jaʼlo ex in nok qʼoʼn tbʼi te Hallow’een moqa Kyqʼij kyimni». a (Qʼonka twitza tiʼj recuadro « ¿Tiʼtzun t-xilen bʼibʼaj Halloween?»).

•   In nok kyqʼoʼn kydisfras ex in cheʼx qanil duls. In tzaj tchikʼbʼaʼn jun libro qa «ok kydisfrasarin kyibʼ xjal celta te monstruo tuʼntzun miʼn tok bʼinchaʼn nya bʼaʼn kyiʼj kyuʼn demonio» e bʼet twitz Txʼotxʼ. b Ax ikx, xi qʼoʼn duls kye qeju demonio lu tuʼntzun miʼn tok kybʼinchaʼn nya bʼaʼn kyiʼj.

   Kyoj tnam te Europa, kyxol abʼqʼi 500 a 1500 tiʼj ambʼil qʼiʼn quʼn jaʼlo, ok lepeʼ Iglesia católica kyiʼj nim kykostumbr xjal ex xi tqʼamaʼn kye tuʼn tok kydisfrasarin kyibʼ toj qonikʼen aju ex tuʼn kyxiʼ ttziyele kyja xjal qanil jun oyaj te t-xel jun naʼj Dios kyiʼj kyimni.

•   Qe fantasma, qe vampiro, qe hombre lobo, qe bruja ex qe zombi. Atxix ojtxe, o kubʼ kyximen xjal qa at kyoklen jlu kyukʼil demonio. In nok qʼoʼn kybʼi tuʼn uʼj Halloween Trivia te «monstruo jaku qo tzaj xobʼ kyuʼn». Ex in tzaj tqʼamaʼn qa at kyoklen tukʼil «kyimen, kyukʼil kyimni ex tukʼilju aj qtzaj xobʼ tuʼn qkyim».

•   Qe kʼum in che ajbʼen toj Halloween. Kyxol abʼqʼi 500 a 1500, in cheʼxtoq xjal te Gran Bretaña «ttziyele kyja xjal qanil wabʼj te t-xel jun naʼj Dios tiʼj jun kyimni». In xitoq kyiʼn «kylámpara bʼinchaʼn maj tuʼn jun nabo ex tokx jun kandel toj, aju kubʼ techlaʼn kyanmi xjal in che bʼaj saqsaʼn naʼmxtoq kyxiʼ toj kyaʼj» (Halloween—From Pagan Ritual to Party Night). In tzaj kyqʼamaʼn junjun xjal in che xnaqʼtzan qa e onin lámpara lu kyiʼj xjal tuʼn t-xi kyxobʼtzaʼn qe demonio. Kyoj abʼqʼi 1800, ya mintiʼ e ajbʼen nabo kyuʼn xjal toj América del Norte ex ajbʼen kʼum kyuʼn. Bʼant jlu kyuʼn tuʼnju mas nyatoq kwest tuʼn tkanet ex tuʼn tbʼaj bʼinchet.

 Nya bʼaʼn. Maske in kubʼ kyximen xjal qa noq jun fiesta Halloween, aju in bʼant kyuʼn mintiʼ toklen tukʼilju in tzaj t-xnaqʼtzaʼn Tyol Dios. Aju in bʼant kyuʼn xjal toj Halloween, at toklen tukʼil nya ax tok xnaqʼtzbʼil kyiʼj kyimni ex kyukʼil demonio.

 Aju in tzaj kyqʼamaʼn versículo lu in tzaj tyekʼin tiʼ t-ximbʼetz Dios kyiʼj xnaqʼtzbʼil jatumel tzajni Halloween:

•   «Mi jun tuʼn t-xi tqanin jun t-xjel [...] kye qeju in tzaj kytxkoʼn kyanmi kyimni, ex mi jun tuʼn t-xi tqanin jun t-xjel kye kyimni» (Deuteronomio 18:10-12).

   Aju t-xilen: Nya bʼaʼn in nela toj twitz Dios qa taj jun xjal tuʼn tyolin kyukʼil kyimni, axpe ikx qa noq in nok tqʼoʼn te jun saqchbʼil.

•   «Qe xjal kyimni qe, mintiʼ bʼaʼn kyuʼn» (Eclesiastés 9:5).

   Aju t-xilen: Ya mintiʼ jun tiʼ jaku bʼant kyuʼn kyimni, tuʼntzunju mlayx bʼant kyyolin kyukʼil xjal.

•   «Miʼn wajbʼile tuʼn tten kyoklene kyukʼil juʼẍ. Mlay bʼant tuʼn kykʼane tuj tvas Qajaw ex tuj kyvas juʼẍ» (1 Corintios 10:20, 21).

   Aju t-xilen: Qa qaj tuʼn qok te tamiw Dios, nim toklen tuʼn miʼn qjyon kyiʼj juʼẍ moqa demonio.

•   Il tiʼj tuʼn «kyweʼxixe twitz ju sbʼubʼl tuʼn tajaw il. Porke [...] in qo qʼojin [...] kyukʼil qe juʼẍ mya bʼaʼn qe nim kyajlal ateʼ twitz kyaʼj» (Efesios 6:11, 12).

   Aju t-xilen: Il tiʼj tuʼn kyqʼojin okslal kyukʼil demonio ex nya tuʼn kytzalaj junx kyukʼil.