Tzaj tqʼoʼn Jehová Jesús te chojbʼil tuʼn kyklet xjal tiʼj il ex tiʼj kamik. In tzaj tqʼamaʼn Tyol Dios qa tuʼn tchkʼel Jesús xi qʼet chojbʼil (Efesios 1:7; 1 Pedro 1:18, 19). Tuʼntzunju, tqʼama Jesús jlu: «Ma chin ule [...] tuʼn t-xi nqʼon wibʼe tuʼn nkyime tuʼn kykolpet nimku xjal» (Mateo 20:28).

¿Tiquʼn iltoq tiʼj tuʼn t-xi qʼet jun chojbʼil «tuʼn kykolpet nimku xjal»?

 Tzʼaqlitoq Adán tej tkubʼ tbʼinchaʼn Dios. Ax ikx xi tqʼoʼn ambʼil te tuʼn tanqʼin te jumajx, noqtzun tuʼnj, xi tnajsaʼn tchwinqlal tzʼaqli tuʼnju mintiʼ nimen te Dios (Génesis 3:17-19). El kyiqen tyajil Adán il tiʼj (Romanos 5:12). Tuʼntzunju, in tzaj tqʼamaʼn Tyol Dios qa tuʼnx Adán okx tqʼon tibʼ tjaqʼ nya bʼaʼn. Ex kyaj tqʼoʼn qe tyajil te majen tjaqʼ il ex kamik (Romanos 7:14). Ni jun xjal jaku bʼant tuʼn kyklet txqantl tuʼn tuʼnju qkyaqilx aj il qoʼ (Salmo 49:7, 8).

 Tzaj qʼaqʼin tkʼuʼj Dios kyiʼj tyajil Adán tuʼnju otoq che kyaj tjaqʼ nya bʼaʼn (Juan 3:16). Tzʼaqli te Dios ex tuʼn jlu mlaytoq kubʼ tnajsaʼn kyil xjal noq kukx (Salmo 89:14; Romanos 3:23-26). Tuʼnju kʼujlaʼn qe xjal tuʼn, tzaj tjyoʼn tumel tuʼn tkubʼ tnajsaʼn kyil. Nya oʼkx tuʼn tkubʼ tnajsaʼn, sino tuʼn tel tiʼn te jumajx (Romanos 5:6-8). Ex oʼkx tuʼn chojbʼil jaku bʼant jlu.

¿Tiʼ t-xilen yol chojbʼil?

 Aj tyolin Tyol Dios tiʼj chojbʼil, in tzaj tqʼamaʼn oxe t-xilen:

1.   Aj t-xi chjet jun tiʼ (Números 3:​46, 47).

2.   Tuʼn tklet jun xjal moqa jun tiʼ (Éxodo 21:30).

3.   Tuʼn t-xi chjet twi jun tiʼ ik tzeʼnx otoq txi naj. a

 Qo xnaqʼtzan tiʼj tiʼ kyoklen yol lu at tukʼil chojbʼil.

1.   Aj t-xi chjet jun tiʼ. In tzaj tqʼamaʼn Tyol Dios qa o che laqʼet okslal tuʼn chojbʼil (1 Corintios 6:​20; 7:​23). Bʼant jlu noq tuʼn tchkʼel Jesús. Tuʼntzunju, in tzaj tqʼamaʼn Tyol Dios jlu: «Ma che laqʼet qe xjal tuʼn tchkʼela tuʼn kyten tukʼil Dios, te tkyaqil kʼloj kyiyjil xjal ex te tkyaqil kʼloj xjal junxilchaq kyyol, ex kye kykyaqil tnam, ex kye kykyaqil nasyon» (Apocalipsis 5:8, 9).

2.   Tuʼn tklet. In qo klet tiʼj il tuʼn chojbʼil bʼant tuʼn Jesús (1 Corintios 1:​30; Colosenses 1:​14; Hebreos 9:​15).

3.   Aj t-xi chjet twi jun tiʼ ik tzeʼnx otoq txi naj. Tzʼaqli tchwinqlal Jesús xi tqʼoʼn te chojbʼil ik tzeʼn xi tnajsaʼn Adán (1 Corintios 15:21, 22, 45, 46). In tzaj tqʼamaʼn Tyol Dios jlu: «Ik tzaʼn e ok nimku xjal aj il noq tuʼn tlaj jun xinaq mintiʼ xi tniman tyol Dios, ax ikxtzun nimku xjal ok che okel te tzʼaqlxix tuʼn Dios noq tuʼn jun xinaq xi tniman tyol Dios» (Romanos 5:​19). Tuʼn jlu in nel qnikʼ tiʼj qa noq tuʼn tchwinqlal jun xjal tzʼaqli chjet kyil nim xjal. Axpe ikx, in najbʼen chojbʼil «tuʼn kykolpet kykyaqil xjal» in nok qeʼ kykʼuʼj tiʼj ex in nok tilil kyuʼn tuʼn kyajbʼen te Dios (1 Timoteo 2:​5, 6).