Aju tzaqʼwebʼil in tzaj tqʼoʼn Tyol Dios

 Toj Sermón del Monte, tqʼama Jesús jlu: «Kykʼujlame qe aj qʼoj kyiʼje» (Mateo 5:44; Lucas 6:27, 35). A kyxilen tyol qa il tiʼj tuʼn kyok qkʼujlaʼn qeju in qo el ikʼun kyuʼn ex qeju in nok kybʼinchaʼn nya bʼaʼn qiʼj.

 Kyaj tqʼoʼn Jesús jun tbʼanel techel qwitz tej tkubʼ tnajsaʼn kyil qeju ok kybʼinchaʼn nya bʼaʼn tiʼj (Lucas 23:33, 34). Aju kyaj t-xnaqʼtzaʼn Jesús tiʼj jlu, ax ikx at toklen tukʼilju in tzaj kyqʼamaʼn uʼj e kubʼ tzʼibʼin tiʼj Tyol Dios toj yol hebreo moqa aju in nok qʼoʼn tbʼi te Antiguo Testamento (Éxodo 23:4, 5; Proverbios 24:17; 25:21).

 «Kykʼujlame qe aj qʼoj kyiʼje, [...] ex che naʼne Dios kyiʼj qeju in che ilin kyiʼje ex in che yajlan kyeye» (Mateo 5:43, 44).

Toj xnaqʼtzbʼil lu, kʼelel qnikʼ tiʼj jlu:

•  ¿Tiquʼn che okel qkʼujlaʼn qe aj qʼoj qiʼj?

•  ¿Tzeʼn jaku kubʼ qyekʼin qkʼujlabʼil kyiʼj aj qʼoj qiʼj?

•  ¿Bʼaʼnpe tuʼn qxiʼ toj guerra tuʼn qok tzoqpaj kyiʼj aj qʼoj?

•  Qe nya bʼaʼn ximbʼetz tiʼj alkye tten tuʼn kyok qkʼujlaʼn aj qʼoj qiʼj

•  Qe texto in che yolin tiʼj kʼujlabʼil tuʼn tkubʼ qyekʼin kyiʼj aj qʼoj

 ¿Tiquʼn che okel qkʼujlaʼn qe aj qʼoj qiʼj?

•   In kubʼ tqʼoʼn Dios techel qwitz. «Ate Dios in tzaj qʼonte ju bʼaʼn kye qeju mintiʼ in xi kyqʼoʼn chjonte te ex kye qeju mya bʼaʼn qe» (Lucas 6:35). «Tuʼn [Dios] in jaʼwil qʼij kyibʼaj qe xjal mya bʼaʼn» (Mateo 5:45).

•   Jaku chʼexpaj kymod aj qʼoj qiʼj tuʼn kʼujlabʼil. In tzaj tqʼamaʼn Tyol Dios tuʼn tkubʼ qyekʼin qkʼujlabʼil kyiʼj aj qʼoj qiʼj ex jaku tzʼok jlu ik tzeʼn in jax qqʼoʼn ttxa qʼaqʼ toj kywiʼ (Proverbios 25:22, TNM, La Biblia. Traducción del Nuevo Mundo). Aju techel lu, atz in yolin tiʼj ambʼil aj kyokx qʼoʼn junjun mineral toj qʼaqʼ tuʼntzun kybʼant tbʼanelxix kʼuxbʼil. Chʼixme ax jlu jaku bʼaj aj tkubʼ qyekʼin tbʼanel qmod tukʼil juntl, jaku tzʼok ik tzeʼn qʼaqʼ ex jaku tzʼonin tiʼj xjal tuʼn tel tqʼoj ex tuʼn tchʼexpaj tmod.

 ¿Tzeʼn jaku kubʼ qyekʼin qkʼujlabʼil kyiʼj aj qʼoj qiʼj?

•   «Kybʼinchame bʼaʼn kye qeju in che el ikʼun te kyeye» (Lucas 6:27). In tzaj tqʼamaʼn Tyol Dios jlu: «Kyjaʼtzun, aju aj qʼoj tiʼja, qa at weʼyaj tiʼj, qʼonxa twa; ex qa at txqetleʼn tiʼj, qʼonxa tkʼaʼ» (Romanos 12:20). Jaku che kanet junjuntl tumel quʼn tzeʼn tuʼn tkubʼ qyekʼin tbʼanel qmod kyukʼil aj qʼoj qiʼj aj t-xi qbʼiʼn qe tyol Jesús lu: «Ik tzaʼn kyaje tuʼn kybʼinchante xjal kyeye, ikxtzun kyeye kybʼinchame kye» (Lucas 6:31).

•   «Kyqaninxe kyʼiwbʼil kyibʼaj qeju in tzaj kyqanin mya bʼaʼn kyibʼaje» (Lucas 6:28). Jaku txi qqʼamaʼn qa in che kubʼ qkʼiwlaʼn qe aj qʼoj qiʼj aj t-xi qqʼamaʼn tbʼanel yol kye ex aj tkubʼ qyekʼin tbʼanel qmod kyukʼil, axpe ikx aj kyyasin qiʼj. In tzaj tqʼamaʼn Tyol Dios jlu: «Qa ma che ok yasoʼne kyuʼn xjal, miʼn tzʼaj kymojtzaʼne yasbʼil; atzun jlu kybʼinchame kye: Che yoline bʼaʼn kyiʼj» (1 Pedro 3:9). Qa ma txi qbʼiʼn tbʼanel consej lu, jaku tzʼonin tuʼn tweʼ ikʼbʼil.

•   «Che naʼne Dios kyiʼj qeju in che yasun kyiʼje» (Lucas 6:28). In tzaj tqʼamaʼn Tyol Dios tuʼn tbʼant jlu quʼn aj tyasin jun xjal qiʼj: «Qa ma bʼinchanjtz mya bʼaʼn kyiʼje, miʼn tzʼaj kyqʼoʼne t-xel mya bʼaʼn» (Romanos 12:17). Ax ikx, jaku txi qqanin te Dios tuʼn tkubʼ tnajsaʼn til xjal (Lucas 23:34; Hechos 7:59, 60). Ex miʼn tzʼaj qqʼoʼn t-xel nya bʼaʼn, sino bʼaʼn tuʼn tkyaj qqʼoʼn toj tqʼabʼ Jehová, aju in xi bʼinchante tkyaqil tzʼaqli (Levítico 19:18; Romanos 12:19).

 «Kykʼujlame qe aj qʼoj kyiʼje, kybʼinchame bʼaʼn kye qeju in che el ikʼun te kyeye; kyqaninxe kyʼiwbʼil kyibʼaj qeju in tzaj kyqanin mya bʼaʼn kyibʼaje ex che naʼne Dios kyiʼj qeju in che yasun kyiʼje» (Lucas 6:27, 28).

•   Tenx qpasens ex qo bʼinchan xtalbʼil (1 Corintios 13:4). Tej tyolin apóstol Pablo tiʼj kʼujlabʼil, ajbʼen yol griego agápe tuʼn ex ax yol lu tkuʼx kyoj texto te Mateo 5:44 ex Lucas 6:27 ex 35. In kubʼ qyekʼin kʼujlabʼil lu, axpe ikx kyiʼj aj qʼoj qiʼj, aj tten qpasens, aj qbʼinchan xtalbʼil, aj tkubʼ qin qibʼ, qa mintiʼ ma tzaj txʼaʼl tiʼj qkʼuʼj ex qa mintiʼ ma kubʼ qyekʼin nya bʼaʼn qmod.

 «Aju xjal at tkʼujlalil at tpasens ex in tzʼeʼy tkʼuʼj tiʼj tukʼil; aju xjal at tkʼujlalil mintiʼ in tzaj tloʼch tkʼuʼj tiʼj juntl, ex mintiʼ in jaw tniman tibʼ, mintiʼ in bʼaj tyolin tibʼ. At tchi tuj twitz, mya noq oʼkx tiʼjx tok tkʼuʼj; mya txʼuʼj twiʼ, ex mintiʼ in xi tkʼuʼn qʼoj. Mintiʼ in tzalaj tiʼj ju mya bʼaʼn in kybʼinchaʼn xjal, oʼkx in tzalaj tiʼj ju yol ax tok. Tkyaqil nnikʼx tuʼn, tkyaqil niman tuʼn, ex tuj tkyaqil ayoʼn tuʼn, ex at tpasens tuj tkyaqil. Aju kʼujlalil mlay bʼaj» (1 Corintios 13:4-8).

 ¿Bʼaʼnpe tuʼn qxiʼ toj guerra tuʼn qok tzoqpaj kyiʼj aj qʼoj?

 Nya bʼaʼn. Xi tqʼamaʼn Jesús kye t-xnaqʼtzbʼen qa mintiʼ tuʼn kyok tzoqpaj kyiʼj aj qʼoj kyiʼj. Jun techel, tej t-xi tqʼamaʼn kye qa oktoq kbʼel xiten tnam Jerusalén, xi tqʼamaʼn kye tuʼn kyetz oq ex nya tuʼn kykyaj ten qʼojil (Lucas 21:20, 21). Ax ikx, xi tqʼamaʼn Jesús jlu te apóstol Pedro: «Qʼoʼn kuʼxa t-spadiya tuj tjayil. Ex kykyaqil qeju qʼiʼn spad kyuʼn, ax tuʼn spad che najel» (Mateo 26:52). Aju in tzaj tqʼamaʼn Tyol Dios ex aju o tzʼel kynikʼ xjal tiʼjju o bʼaj ojtxe, in tzaj tyekʼin qa mintiʼ i eʼx t-xnaqʼtzbʼen Jesús toj qʼoj (2 Timoteo 2:24). a

 Qe nya bʼaʼn ximbʼetz tiʼj alkye tten tuʼn kyok qkʼujlaʼn aj qʼoj qiʼj

 Aju in tzaj kyqʼamaʼn junjun xjal: Xi tqʼoʼn Tley Dios ambʼil kye xjal te Israel tuʼn kyel kyikʼun aj qʼoj kyiʼj.

 Aju in tzaj kyqʼamaʼn junjun xjal: Qa in nok qkʼujlaʼn jun aj qʼoj qiʼj, in kubʼ qyekʼin qa bʼaʼn in nela toj qwitz aju nya bʼaʼn in bʼant tuʼn.

 Aju axix tok: In tzaj tyekʼin Tyol Dios qa jaku tzʼok qkʼujlaʼn jun xjal maske nya bʼaʼn in nela toj qwitz aju in bʼant tuʼn. Jun techel, nya bʼaʼn ela bʼiybʼel toj twitz Jesús, pero naʼn Dios kyiʼj xjal e kubʼ bʼyonte (Lucas 23:34). Ax ikx, el tikʼun il ex nya bʼaʼn, pero xi tqʼoʼn tchwinqlal kyiʼj xjal aj il (Juan 3:16; Romanos 6:23).