Kyaj t-xnaqʼtzaʼn Jesús padrenuestro tuʼnju xi kyqanin t-xnaqʼtzbʼen jlu te: «Tat, qo t-xnaqʼtzama tuʼn tbʼant qnaʼne Dios» (Lucas 11:1). In tzaj tyekʼin padrenuestro qe alqiʼj bʼaʼn tuʼn qnaʼn Dios ex tzeʼn jaku bʼant quʼn. Pero nya oʼkx padrenuestro in tzaj tbʼiʼn Dios. a A jlu noq jun techel kyiʼj naʼj Dios bʼaʼn in che ela toj twitz Dios.

Toj xnaqʼtzbʼil lu, qo xnaqʼtzal kyiʼj xjel lu:

•  ¿Alkyetzun naʼj Dios in nok qʼoʼn te padrenuestro?

•  ¿Tiʼ t-xilen aju in tzaj tqʼamaʼn padrenuestro?

•  ¿Ilpe tiʼj tuʼn t-xi nrepetirine padrenuestro tkyaqil maj aj nnaʼne Dios?

•  ¿Alkye tten bʼaʼn tuʼn nnaʼne Dios?

•  Junjuntl naʼj Dios in che kanet toj Biblia

 In kanet naʼj Dios padrenuestro quʼn toj Mateo 6:9 a 13. Junxitl yol in najbʼen tuʼn teyele junjun Biblia. Aʼye jlu noq kabʼe techel.

 Traducción del Nuevo Mundo: «Tuʼntzunju, che naʼne Dios kyjalu: Qman Dios ata toj kyaʼj, tzʼokwit tbʼiya te xjan. Ku ttzajju Tkawbʼila. Bʼant-xwitju tajbʼila, ik tzeʼn toj kyaʼj, ax ikx twitz Txʼotxʼ. Qʼontza qwaye te qʼij jaʼlo; ex najsama qkʼase, ik tzeʼn qeye in kubʼ qnajsaʼne kykʼas txqantl. Ex miʼn taqʼa ambʼil tuʼn qoke toj joybʼil, noq oʼkx qo tkloma tiʼj nya bʼaʼn».

 Aju Xjan Tuʼjil Tyol Dios: «Kyjaʼtzun che naʼne Dios kyjaʼ: A Qman ata tuj kyaʼj, tenwt tchiylal tbʼiya qeye. E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj. Qʼontza qwaye jaʼlo, aju in ajbʼen tkyaqil qʼij. Ex najsama aju mya bʼaʼn in qbʼinchaʼne twitza, ik tzaʼn qeye in kubʼ qnajsaʼne kypaltil qeju in kybʼinchaʼn mya bʼaʼn qiʼje. Ex miʼn taqʼa ambʼil tuʼn qoke tuj joybʼil qiʼje, noq oʼkx qo tkloma teju mya bʼaʼn». b

 Aju kyaj t-xnaqʼtzaʼn Jesús, atz jatz toj Biblia. Tuʼntzunju, ax Biblia kʼonil qiʼj tuʼn tel qnikʼ tiʼj padrenuestro.

«Qman Dios ata toj kyaʼj»

 Tuʼnju a Dios kubʼ bʼinchan qe ex in tzaj tqʼoʼn qchwinqlal, jaku txi qqʼamaʼn te, «aya Qmane» (Isaías 64:8).

«Tzʼokwit tbʼiya te xjan»

 Jehová tbʼi Dios. Tuʼnju saq ex xjan bʼibʼaj lu, il tiʼj tuʼn tjaw qnimsaʼn ex tuʼn tok qqʼoʼn te xjan. In bʼant jlu quʼn aj qyolin tiʼj tmod Dios ex tiʼj t-ximbʼetz kyukʼil xjal (Salmo 83:18; Isaías 6:3).

«Ku ttzajju Tkawbʼila»

 Jun gobierno Tkawbʼil Dios, at toj kyaʼj ex a Jesús kkawil toj. Kyaj t-xnaqʼtzaʼn Jesús tuʼn t-xi qqanin Kawbʼil lu tuʼntzun tkawin tibʼaj Txʼotxʼ (Daniel 2:44; Apocalipsis 11:15).

«Bʼant-xwitju tajbʼila, ik tzeʼn toj kyaʼj, ax ikx twitz Txʼotxʼ»

 Mintiʼ nya bʼaʼn ex mintiʼ kyimen toj kyaʼj. Ax jlu tajbʼil Dios tuʼn tbʼant twitz Txʼotxʼ. Taj tuʼn kyanqʼin xjal te jumajx toj mujbʼabʼil ex tuʼn miʼn kytzaj xobʼ (Salmo 37:11, 29).

«Qʼontza qwaye te qʼij jaʼlo»

 Toj ambʼil tej tten Jesús, nimtoq toklen wabʼj. Aqeju tyol, in tzaj tnaʼn qa oʼkx jaku qo anqʼin qa ma tzaj tqʼoʼn Jehová aju at tajbʼen qe (Hechos 17:24, 25).

«Najsama qkʼase, ik tzeʼn qeye in kubʼ qnajsaʼne kykʼas txqantl»

 Aju yol kʼas toj texto lu, atz in yolin tiʼj il (Lucas 11:4). Qkyaqilx aj il qoʼ ex il tiʼj tuʼn tkubʼ najsaʼn qil. Pero qa qaj tuʼn tkubʼ tnajsaʼn Dios qil, ax ikx qe il tiʼj tuʼn tkubʼ qnajsaʼn kyil txqantl (Mateo 6:14, 15).

«Miʼn taqʼa ambʼil tuʼn qoke toj joybʼil, noq oʼkx qo tkloma tiʼj nya bʼaʼn»

 Mintiʼ in qo ok toj prueba tuʼn Jehová tuʼn tkubʼ qbʼinchaʼn nya bʼaʼn (Santiago 1:13). Pero in qo ok toj prueba tuʼn Satanás (1 Juan 5:19; Mateo 4:1-4). Tuʼntzunju, in xi qqanin te Jehová tuʼn miʼn ttzaj tqʼoʼn ambʼil tuʼn qkubʼ tzʼaq toj prueba, sino tuʼn kukx qnimen te.

 Tqʼama Jesús naʼj Dios padrenuestro tuʼn tajbʼen te jun techel, nya tuʼn t-xi qrepetirin. Tej naʼmxtoq ttzaj tqʼamaʼn Jesús naʼj Dios padrenuestro, tqʼama jlu: «Atzun kyeye ok kynaʼne Dios, miʼn txi kymaʼne elaʼ maj axju yol» (Mateo 6:7). Ax ikx, e ajbʼen junxitl yol tuʼn tej tyolin tiʼj naʼj Dios toj junjuntl ambʼil (Lucas 11:2-4).

 Mas bʼaʼn tuʼn t-xi qqʼamaʼn toj qnaʼj Dios aju tkuʼx toj qanmi, aju in kubʼ qximen ex aju in kubʼ qnaʼn (Salmo 62:8).

 In nok padrenuestro te jun tbʼanel techel kyiʼj naʼj Dios in che tzaj tbʼiʼn Jehová. Qʼonka twitza kyiʼj junjuntl texto in tzaj kyyekʼin chʼixme aʼyex yol ik tzeʼn te padrenuestro.

•   Oʼkx te Jehová tuʼn qnaʼn Dios

   Texto: «Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te» (Filipenses 4:6).

   Aju t-xilen: Aj t-xi tzyet naʼj Dios kyukʼil yol «Qman Dios», in tzaj tyekʼin qa oʼkx tuʼn qnaʼn Dios te Jehová, nya te Jesús, nya te María ex nya kye sant.

•   Il tiʼj tuʼn qnaʼn Dios kyiʼj tiʼchaq at kyoklen tukʼil tajbʼil Jehová

   Texto: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn» (1 Juan 5:14).

   Aju t-xilen: Tej tqʼama Jesús «bʼant-xwitju tajbʼila», tzaj tyekʼin qe qa nim toklen tuʼn tkubʼ qqʼoʼn tajbʼil Jehová tnejel toj qanqʼibʼil. Tuʼntzunju, aj qnaʼn Dios, in xi qqʼamaʼn qe tiʼchaq at kyoklen tukʼil tajbʼil Jehová. Tuʼn tel qnikʼ tiʼj tiʼ t-ximbʼetz Dios at tiʼj Txʼotxʼ ex kyiʼj xjal, nim toklen tuʼn qxnaqʼtzan tiʼj Biblia.

•   Jaku qo naʼn Dios kyiʼj tiʼchaq in tzaj bʼaj qkʼuʼj tiʼj

   Texto: «Qʼonkja qe tbʼisa tuj tqʼabʼ Qman, ate ktzajel qʼonte tipuna tuʼn tikʼx tuʼna» (Salmo 55:22).

   Aju t-xilen: Tuʼnju ax ikx in ximen Dios kyiʼj tiʼchaq in che ikʼ qiʼj, tqʼama Jesús toj padrenuestro alkyeqe tiʼchaq in tzaj bʼaj qkʼuʼj tiʼj ex jaku txi qqʼamaʼn toj qnaʼj Dios. Jaku txi qqanin te tuʼn ttzaj tqʼoʼn qwa, tuʼn tonin qiʼj tuʼn tjaw qjyoʼn aju mas nim toklen, tuʼn ttzaj tqʼoʼn qipumal aj qok weʼ twitz nya bʼaʼn ex tuʼn tkubʼ tnajsaʼn qil. c