Jaku tzʼonin. Jaku tzʼonin Biblia qiʼj tuʼn tok tilil quʼn tuʼn miʼn tkubʼ qnaʼn qa mintiʼ in kubʼ najsaʼn qil (Salmo 32:1-5). Qa ma qo el txalpaj ex qa ax tok ma tzʼajtz tiʼj qanmi, jaku kubʼ tnajsaʼn Dios qil ex jaku tzʼonin qiʼj tuʼn qtzalaj juntl maj (Salmo 86:5). In tzaj tyekʼin Biblia qa at maj toj tumel aj tkubʼ qnaʼn bʼis aj qel txalpaj. ¿Tiquʼn? Tuʼnju in nonin qiʼj tuʼn tok tilil quʼn tuʼn ya miʼn tkubʼ qbʼinchaʼn nya bʼaʼn juntl maj (Salmo 51:17; Proverbios 14:9). Pero ax ikx in tzaj tqʼamaʼn Biblia tuʼn tok qxqʼuqin qibʼ tuʼn miʼn tkubʼ qximen qa mlayx kubʼ najsaʼn qil, qa mlayx qo bʼant ex qa ya mintiʼ qajbʼen te Dios. Qa mintiʼ in kubʼ qnajsaʼn qil, jaku tzaj nim bʼis qiʼj ex jaku qo kubʼ numj tuʼn (2 Corintios 2:7).

•  ¿Tiquʼn jaku kubʼ qximen qa mlayx kubʼ najsaʼn qil?

•  ¿Tiʼ jaku bʼant tuʼna aj tkubʼ t-ximana qa mintiʼ in kubʼ najsaʼn tila?

•  Qe texto in che yolin tiʼj aj tkubʼ qnaʼn qa at qil ex aj tkubʼ najsaʼn qil

 At nim tiquʼn jaku kubʼ qnaʼn qa otoq qo el txalpaj. Bʼalo o tzaj tbʼis jun xjal kʼujlaʼn quʼn moqa mintiʼ kubʼ qbʼinchaʼn jun tiʼ nim toklen toj qwitz. At maj jaku kubʼ qnaʼn qa otoq qo el txalpaj maske mintiʼ jun nya bʼaʼn otoq bʼant quʼn. Jun techel, qa qaj tuʼn tbʼant nim tiʼchaq quʼn, jaku kubʼ qnaʼn qa otoq qo el txalpaj qa mintiʼ ma japun twi qximbʼetz. Tuʼntzunju, in tzaj tqʼamaʼn Biblia tuʼn tten qximbʼetz toj tumel kyiʼj tiʼchaq in bʼant quʼn (Eclesiastés 7:16).

 Aj tkubʼ t-ximana qa otoq tzʼel txalpaja, miʼn txi tqʼoʼna ambʼil tuʼn tkubʼ numja. Bʼinchama aju jaku bʼant tuʼna. ¿Tiʼtzun jaku bʼant tuʼna?

•   Tzʼelx tnikʼa tiʼj qa otoq tzʼel txalpaja. Naʼna Dios te Jehová ex qaninxa najsam te (Salmo 38:18; Lucas 11:4). a Jaku tzʼok qeʼ tkʼuʼja tiʼj qa ktzajel tbʼiʼn Dios tnaʼj Diosa qa ax tok ma tzʼajtz tiʼj tanmiya ex qa ma tzʼok tilil tuʼna tuʼn miʼn tel txalpaja juntl maj (2 Crónicas 33:13; Salmo 34:18). Oʼkx Jehová ojtzqilte tzeʼnxix qoʼ. Aj tok tkeʼyin qa ax tok in nok tilil quʼn tuʼn tbʼaj qchʼexpuʼn qmod, in tzaj tqʼamaʼn Tyol qa «knajsetel qil tuʼn» tuʼnju tzʼaqli te (1 Juan 1:9; Proverbios 28:13).

   Pero qa ma tzʼel tnikʼa tiʼj qa otoq ttzaj tbʼis jun xjal tuʼna, bʼaʼn tuʼn tkubʼ tin tibʼa ex qaninxa najsam te tuʼn tkyaqil tanmiya. Bʼalo kwest tuʼn tbʼant jlu tuʼna ex il-lo tiʼj tuʼn tten tipumala tuʼn t-xi tbʼinchaʼna. Qa ma bʼant jlu tuʼna, kʼelel tiʼna jun iqtz tibʼaja ex kʼonil jlu tuʼn tkyaj nya bʼaʼn toj ttxolil (Mateo 3:8; 5:23, 24).

•   Ximana tiʼjju in tzaj tqʼamaʼn Biblia tiʼj qʼaqʼbʼil tkʼuʼj Dios. Jun techel, jaku jaw tuʼjina 1 Juan 3:19 ex 20. Toj texto lu, in tzaj qʼamaʼn qa at maj jaku tzaj tqʼamaʼn «qanmi qa mya bʼaʼn in qbʼinchaʼn», toj juntl yol, quʼnx jaku kubʼ qqʼoʼn qkastiw ex jaku kubʼ qximen qa mintiʼ qoklen tiʼj tkʼujlabʼil Dios. Pero ax ikx in tzaj tqʼamaʼn qa mas «maʼ toklen [Dios] twitz ju qanmi». ¿Tiʼ t-xilen jlu? Atz in yolin jlu tiʼj qa ojtzqiʼn qoʼ tuʼn Dios ex ojtzqiʼn tuʼn tiʼ in kubʼ qnaʼn ex tiʼ in qo el txalpaj tiʼj. Ax ikx, ojtzqiʼn tuʼn qa aj il qoʼ ex qa at maj jaku txi qbʼinchaʼn jun tiʼ nya toj tumel (Salmo 51:5). b Tuʼntzunju, mintiʼ in qo el ikʼun tuʼn qa ax tok ma tzʼajtz tiʼj qanmi (Salmo 32:5).

•   Ya miʼn tzaj tnaʼna aju o bʼaj. In yolin Tyol Dios kyiʼj nim xinaq ex xuʼj kubʼ kybʼinchaʼn nya bʼaʼn, pero chʼexpaj kymod. Jun techel tiʼj jlu, a Saulo te Tarso, aju ok te apóstol Pablo. Toj jun ambʼil, ten kyxol qe fariseo, el tikʼun qe okslal ex ok tbʼinchaʼn nim nya bʼaʼn kyiʼj (Hechos 8:3; 9:1, 2, 11). Tej tel tnikʼ tiʼj qa nya bʼaʼntoq tbʼinchbʼen twitz Dios ex twitz Mesías moqa Cristo, ajtz tiʼj tanmi, bʼaj tchʼexpuʼn tmod ex ok te jun tbʼanel okslal. Tzaj tbʼis tej tkubʼ tbʼinchaʼn nya bʼaʼn, pero ok tilil tuʼn tuʼn ya miʼn ttzaj tnaʼn. Ex tuʼnju kubʼ tyekʼin Jehová nim qʼaqʼbʼil tkʼuʼj tiʼj Pablo, ok tilil tuʼn tuʼn tpakbʼan ex kukx ximen tiʼj qʼuqbʼil tkʼuʼj tuʼn tanqʼin te jumajx (Filipenses 3:13, 14).

 Jeremías 31:34: «Kbʼel nnajsaʼne tkyaqil kybʼinchbʼen mya bʼaʼn ex mlay tzaj nnaʼntle kyil juntl maj».

 Aju t-xilen: Aj in kubʼ tnajsaʼn Dios qil, ya mintiʼ in tzaj tnaʼn juntl maj, sino in kubʼ tnajsaʼn qil tuʼn tkyaqil tanmi.