O txi qʼoʼn oklenj kye kʼwalbʼaj ma che chʼiy tuʼn kyxqʼuqin kyiʼj kyman ex tuʼn t-xi kyqʼoʼn aju at tajbʼen kye. In tzaj tqʼamaʼn Tyol Dios qa aʼyeju kʼwalbʼaj okslal qe «il tiʼj tuʼn kyxnaqʼtzet [...] tuʼn kyonin kye qeju ateʼ tuj kyja ex tuʼn taj kyqʼoʼn chʼin t-xel kye qeju jatum ẍe el itzʼj, porke bʼaʼn te jlu tuj twitz Dios» (1 Timoteo 5:4). Aj tok tilil kyuʼn kʼwalbʼaj tuʼn kyxqʼuqin kyiʼj kyman in xi kybʼiʼn aju in tzaj tqʼamaʼn Tyol Dios tuʼn t-xi qʼet nimbʼil kye tatbʼaj (Efesios 6:2, 3).

 Mintiʼ in tzaj tqʼamaʼn Tyol Dios tzeʼnxix tuʼn qxqʼuqin kyiʼj qtat, pero in tzaj tqʼamaʼn tiʼ bʼant kyuʼn junjun xjal toj ambʼil ojtxe. Ax ikx, in tzaj tqʼoʼn junjun nabʼil kye qeju in che xqʼuqin tiʼj jun xjal ma tijen.

•  ¿Alkye tten e xqʼuqin junjun tmajen Dios toj ambʼil ojtxe kyiʼj kyman otoq che tijen?

•  ¿Alkyeqe nabʼil in tzaj tqʼoʼn Tyol Dios?

•  ¿In tzajpe tqʼamaʼn Tyol Dios qa il tiʼj tuʼn kyxqʼuqin kʼwalbʼaj kyiʼj kyman atz kyja?

 Nya aʼyex tiʼchaq bʼant kyuʼn tuʼnju junxichaq tiʼchaq ikʼ kyiʼj.

•   José. Tej ttijen Jacob aju ttat José, najchaq in nanqʼintoq José tiʼj. Noqtzun tuʼnj, xi tiʼn José ttat anqʼil nqayin ttxlaj tej tkanet tumel tuʼn. Ax ikx ok tilil tuʼn José tuʼn tten tkyaqil at tajbʼen te Jacob, ik tzeʼn twa ex jun lugar jatumel tuʼn tanqʼin (Génesis 45:9-11; 47:11, 12).

•   Rut. Xiʼ Rut anqʼil toj ttnam tlibʼ ex nim aqʼunan tuʼn tten aju at tajbʼen kye (Rut 1:16; 2:2, 17, 18, 23).

•   Jesús. Tej chʼixtoq tkyim Jesús xi tqʼamaʼn te jun t-xnaqʼtzbʼen tuʼn t-xqʼuqin tiʼj ttxuʼ, aju María tbʼi ex aju otoqlo kyaj ten viud (Juan 19:26, 27). a

 In qo sikt aj qxqʼuqin kyiʼj qman ex at maj in tzaj bʼaj qkʼuʼj tuʼn. Pero in tzaj tqʼoʼn Tyol Dios junjun nabʼil qe aju jaku che onin qiʼj.

•   Qqʼonk kyoklen qtat.

   Aju in tzaj tqʼamaʼn Tyol Dios: «Kynimanxe kymane ex kytxuʼye» (Éxodo 20:12).

   ¿Tzeʼn jaku bʼant quʼn? Qa jaku che bʼant junjun tiʼchaq kyuʼn qman qqʼonx ambʼil kye tuʼn t-xi kybʼinchaʼn, ex qqʼonx ambʼil kye tuʼn ttzaj kyqʼamaʼn tzeʼn kyajbʼil tuʼn kyok xqʼuqit. Tenx qnabʼil ex qbʼincham aju jaku bʼant quʼn. Qbʼincham tkyaqil toj tumel ex tukʼil tbʼanel qmod.

•   Tzʼelx qnikʼ kyiʼj ex qnajsanku kyil.

   Aju in tzaj tqʼamaʼn Tyol Dios: «Tuʼnju at tnabʼl xjal mya jurat in jaw qʼojl, ex jun nimbʼil te qa ma kubʼ tnajsaʼn jun mya bʼaʼn otoq bʼinchanjtz tiʼj» (Proverbios 19:11).

   ¿Tzeʼn jaku bʼant quʼn? Atlo maj jaku tzaj kyqʼamaʼn qman junjun tiʼchaq qe aju jaku kux choʼn toj qanmi moqa jaku kubʼ kyyekʼin qa mintiʼ in kyqʼoʼn chjonte tiʼjju in bʼant quʼn kyiʼj. Qa ikju, qo ximen tiʼj jlu: «¿Tiʼ jaku kubʼ nnaʼne qa nya nim tiʼchaq jaku bʼant wuʼne? ¿Mlaypetzulo tzaj nbʼise?». Qa ma tzʼel qnikʼ kyiʼj ex qa ma kubʼ qnajsaʼn kyil ok qo onil tuʼn miʼn ttzaj mastl nya bʼaʼn.

•   Qo jyon onbʼil kyukʼil txqantl.

   Aju in tzaj tqʼamaʼn Tyol Dios: «Mintiʼ in japun aju in kubʼ kyximan xjal qa mi aʼl jun qʼol kyconsej; ex qa at nim qʼol consej bʼaʼn nneʼla jlu» (Proverbios 15:22).

   ¿Tzeʼn jaku bʼant quʼn? Qo jyon onbʼil tuʼntzun tel qnikʼ tiʼj alkyeqe qʼanbʼil jaku che onin kyiʼj qtat. Qbʼinx qa at onbʼil kye xjal ma che tijen jatumel in qo anqʼin. Qqaninx kye qeju in che xqʼuqin kyiʼj kyman ma che tijen tiʼ in bʼant kyuʼn. Qa ateʼ qitzʼin moqa qtzik, qo yolin kyukʼil ex qqʼamanx kye alkyeqe onbʼil kyaj qman ex tzeʼn jaku qo onin qkyaqilx.

•   Miʼn kubʼ qximan qa kbʼantel tkyaqil quʼn.

   Aju in tzaj tqʼamaʼn Tyol Dios: «Kyukʼil qe xjal mans, atzun taʼ nabʼl» (Proverbios 11:2).

   ¿Tzeʼn jaku bʼant quʼn? Bʼaʼn tuʼn tel qnikʼ tiʼj jniʼ jaku bʼant quʼn. Qkyaqilx ojtzqiʼn quʼn qa mlay bʼant qten tkyaqil ambʼil kyukʼil qtat, qa in qo sikt ex qa mlay bʼant tuʼn qonin kyiʼj ik tzeʼn qaj. Qa kyaj qman nimxix onbʼil ex in nel qnikʼ tiʼj qa mlayx bʼant qxqʼuqin kyiʼj qjunalx, qqaninx onbʼil te juntl toj qja moqa te jun xjal at tojtzqibʼil tiʼj jlu.

•   Xqʼuqink tibʼa.

   Aju in tzaj tqʼamaʼn Tyol Dios: «Mi jun xjal nneʼl tikʼun t-ximlal, noq oʼkx in tkʼaʼchan ex kwentin tuʼn» (Efesios 5:29).

   ¿Tzeʼn jaku bʼant quʼn? Ojtzqiʼn quʼn qa il tiʼj tuʼn qxqʼuqin kyiʼj qe qtat, noqtzun tuʼnj, ax ikx il tiʼj tuʼn tok qxqʼuqin qibʼ ex tuʼn qxqʼuqin kyiʼj qeju toj qja qa o qo kubʼ mojeʼ. Ex il tiʼj tuʼn qwaʼn bʼaʼn, tuʼn qojlan ex tuʼn qjtan (Eclesiastés 4:6). Axpe ikx il tiʼj tuʼn tel qpaʼn chʼin ambʼil tuʼn qtzalaj moqa tuʼn tbʼant jun tiʼ quʼn aju qgan. Iktzun tten mlay naj qo sikt aj qxqʼuqin kyiʼj qtat.

 Mintiʼ in tzaj tqʼamaʼn Tyol Dios tkyaqil tqanil tiʼj jlu. Ateʼ junjun ja xjal in xi kyqʼoʼn ambʼil kye kyman tuʼn kukx kyten toj kyja. Pero aj tikʼ ambʼil jakulo kubʼ kyximen qa mas bʼaʼn tuʼn kyanqʼin toj jun ja jatumel in che ok xqʼuqin xjal ma che tijen. Tbʼanel tuʼn kyyolin kʼwalbʼaj tuʼntzun tel kynikʼ tiʼj alkye mas tbʼanel tuʼn tbʼant kyuʼn kyiʼj kyman (Gálatas 6:4, 5).