Aj tkubʼ kyikʼsaʼn xjal Navidad, in che yolin kyiʼj «oxe rey mago» aʼyeju i eʼx keʼyilte Jesús tej tul itzʼj, pero mintiʼ in yolin Tyol Dios tiʼj jlu (Mateo 2:1). Ajbʼen yol magoi toj yol griego tuʼn Mateo tej tyolin kyiʼj qeju e pon visitaril te Jesús. Ex bʼalo atz in yolin jlu kyiʼj xjal in che xnaqʼtzan kyiʼj cheʼw ex tiʼj junjuntl tiʼchaq at toklen tukʼil kyaqʼun chman. a Toj junjun Biblia in nok qʼoʼn kybʼi te «xjal aj nabʼl». b

•  ¿Jteʼtoq kybʼet?

•  ¿Axpe tok qa rey qe?

•  ¿Tiʼtoq kybʼi?

•  ¿Toj alkye ambʼil e pon visitaril te Jesús?

•  ¿Xipe tqʼamaʼn Dios tuʼn kyok lepeʼ tiʼj «estrella te Belén»?

 ¿Jteʼtoq kybʼet?

 Mintiʼ in tzaj tqʼamaʼn Tyol Dios jteʼtoq kybʼet, pero at junxichaq kyximbʼetz xjal tiʼj. In tzaj tqʼamaʼn Enciclopedia Católica versión digital jlu: «Mintiʼ in tzaj kyqʼamaʼn Evangelio jteʼ kybʼet Mago ex mintiʼ jun tqanil tzʼaqli tiʼj jlu. In tzaj kyqʼamaʼn qe pal qa oxe kybʼet Mago, pero in bʼant jlu kyuʼn tuʼnju oʼkx in che ximen tiʼj oyaj pon kyiʼn. Atzun kye xjal te Oriente in tzaj kyqʼamaʼn qa 12 kybʼet Mago».

 ¿Axpe tok qa rey qe?

 Maske in tzaj kyqʼamaʼn xjal qa in che ok qe mago te rey aj tkubʼ kyikʼsaʼn Navidad, mintiʼ in tzaj t-xnaqʼtzaʼn Tyol Dios jlu. In tzaj tqʼamaʼn Encyclopedia Britannica qa tej otoqxi tzikʼ ambʼil tulen itzʼj Jesús, xi tzyet tuʼn tok qʼoʼn kybʼi mago te rey tuʼntzun tok txʼolbʼabʼil te mas tbʼanel.

  ¿Tiʼtoq kybʼi?

 Mintiʼ in tzaj tqʼamaʼn Tyol Dios kybʼi mago lu. In tzaj tqʼamaʼn Gran Enciclopedia Espasa qa «ok qʼoʼn kybʼi te Melchor, Gaspar ex Baltasar tuʼntzun tkyaj te kykostumbr xjal».

 ¿Toj alkye ambʼil e pon visitaril te Jesús?

 Bʼalo e pon mago visitaril te Jesús tej otoq tzikʼ junjun xjaw tulen itzʼj. In xi qqʼamaʼn jlu tuʼnju tajtoq rey Herodes tuʼn tkubʼ tbʼyoʼn Jesús ex xi tqʼamaʼn tuʼn kykubʼ bʼyoʼn kʼwal te kabʼe abʼqʼi moqa menos. Bʼant jlu tuʼn tuʼn tqanil otoq txi qʼoʼn te kyuʼn mago (Mateo 2:16).

 Mintiʼ e pon mago visitaril te Jesús toj qonikʼen tej tul itzʼj. In tzaj tqʼamaʼn Tyol Dios jlu: «E okxtzun tuja ex o kyil ju tal neʼ tukʼix Mariy aju ttxuʼ» (Mateo 2:11). In tzaj tyekʼin jlu qa toj ambʼil aju, nya tzmatoq in nul itzʼ Jesús sino ya in nanqʼintoq toj jun ja tukʼil tfamilia (Lucas 2:16).

 ¿Xipe tqʼamaʼn Dios tuʼn kyok lepeʼ tiʼj «estrella te Belén»?

 In kubʼ kyximen nim xjal qa ajbʼen «estrella te Belén» tuʼn Dios tuʼntzun kypon qe mago jatumel taʼ Jesús. Pero mintiʼ bʼant jlu tuʼn Dios ik tzeʼn kʼelel qnikʼ tiʼj.

•   I ex qʼiʼn qe mago tnejel toj Jerusalén tuʼn jun tiʼ in nok kyqʼoʼn te jun cheʼw. In tzaj tqʼamaʼn Biblia jlu: «At junjun xjal aj nabʼl e tzaj tuj tjawitz qʼij e ul tuj Jerusalén. Xi kyqanin: —¿Jatum taʼ ju rey kye xjal judiy, aju ma tzʼitzʼj? Porke ma qile tcheʼw tuj tjawitz qʼij, ex ma qo tzaje kʼulul twitz» (Mateo 2:1, 2).

•   A rey Herodes onin kyiʼj mago tuʼn kypon toj Belén ex nya jun cheʼw. Ok tbʼiʼn Herodes tqanil tiʼj «rey kye xjal judiy» ex kubʼ tximen qa kʼelel qʼiʼn toklen tuʼn, tuʼntzunju xi tqanin jatumel tzul itzʼ Mesías aju otoq kyaj tziyen tuʼn tul (Mateo 2:3-6). Ex tej tok tbʼiʼn qa tzul itzʼj toj tnam Belén, xi tqʼamaʼn kye mago tuʼn kyxiʼ jyolte neʼ ex tuʼn kymeltzʼaj qʼolte tqanil.

   Tuʼntzunju i e’x qe mago toj tnam Belén. In tzaj tqʼamaʼn Biblia jlu: «Tejtzun kybʼinte qe xjal aj nabʼl tyol rey e jeʼxtzun. Ex lu ju cheʼw nejni kywitz, aju otoq kyil tuj tjawitz qʼij. Tejtzun tkanun cheʼw jatum taʼ tal neʼ, axtzun kubʼ ten» (Mateo 2:9).

•   Tzaj nim nya bʼaʼn tuʼn cheʼw lu tuʼnju chʼixme kubʼ bʼyoʼn Jesús ex e kubʼ bʼyoʼn nim kʼwal. Tej kyikʼ bʼet mago toj tnam Belén, xi tqʼamaʼn Dios kye toj jun witzikʼ tuʼn miʼn kymeltzʼaj tukʼil Herodes (Mateo 2:12).

 ¿Tiʼ tmod Herodes kubʼ tyekʼin? In tzaj tqʼamaʼn Tyol Dios jlu: «Tejtzun tel tnikʼ Herodes tiʼj otoq kubʼ sbʼuʼn kyuʼn xjal aj nabʼl, tzaj nimxix tqʼoj; ex etz jun orden tuʼn, tuʼn kybʼyet kykyaqil tal qʼa naʼnx tjapun kabʼe abʼqʼi kyuʼn ateʼ tuj Belén ex kyuj aldey tiʼjele Belén; el tnikʼ tiʼj tqʼijlalil tuʼnju yol tzaj qʼmaʼn te kyuʼn aj nabʼl» (Mateo 2:16). Mlay bʼant jun tiʼ tuʼn Dios ik tzeʼn jlu (Job 34:10).