Mintiʼ in tzaj tqʼamaʼn Tyol Dios jtoje xi tzyet tuʼn tkubʼ tbʼinchaʼn Dios universo nix jniʼ ambʼil xi tiʼn. Oʼkx in tzaj tqʼamaʼn jlu: «T-xe tnejel kubʼ tbʼinchaʼn Dios kyaʼj ex txʼotxʼ» (Génesis 1:1). Mintiʼ in tzaj tqʼamaʼn Tyol Dios jtoje tzaj tzyet tuʼn tbʼant tkyaqil. Pero in yolin uʼj te Génesis tiʼj ambʼil lu tej naʼmxtoq tyolin tiʼj qaq qʼij tej tkubʼ tbʼinchaʼn Dios tkyaqil.

•  ¿Kubʼpe tbʼinchaʼn Dios kyaʼj ex Txʼotxʼ toj qaq qʼij te 24 or?

•  ¿Tiʼ bʼaj toj qaq qʼij tej tbʼant tkyaqil?

•  ¿Atpe toklen aju in tzaj tqʼamaʼn ciencia tukʼilju in tzaj tqʼamaʼn uʼj te Génesis?

•  ¿Toj alkye ambʼil kubʼ bʼinchaʼn Qiʼj, Xjaw ex qe cheʼw?

•  Ik tzeʼn in tzaj tqʼamaʼn Tyol Dios, ¿jteʼ abʼqʼi o tzikʼ tkubʼlen bʼinchaʼn Txʼotxʼ?

 Mintiʼ. Aj tkanet yol «qʼij» quʼn toj Biblia, at maj in yolin tiʼj nimku ambʼil. Jun techel, in tzaj tqʼamaʼn uʼj te Génesis qa e bʼant tkyaqil tiʼchaq toj jun qʼij (Génesis 2:4, La Biblia. Traducción del Nuevo Mundo).

 «Mintiʼtoq ttxolil txʼotxʼ, ex mintiʼtoq at twitz». Noqtzun tuʼnj, bʼaj tbʼinchaʼn Dios tuʼntzun tten chwinqlal twitz (Génesis 1:2). Yajxitl, kubʼ tbʼinchaʼn tkyaqil tiʼchaq at twitz. In tzaj tqʼamaʼn Biblia tiʼ bʼant tuʼn Dios kyoj qaq qʼij tej tkubʼ tbʼinchaʼn tkyaqil.

•  Tnejel qʼij: Qʼanchaʼlix spikʼun twitz Txʼotxʼ tuʼn Dios ex xi tzyet tuʼn tten qʼij ex qonikʼen (Génesis 1:3-5).

•  Tkabʼin qʼij: Kubʼ tpaʼn Dios aʼ, kyaj ten nim aʼ twitz Txʼotxʼ ex kyaj ten nim aʼ twitz kyaʼj ex ten jun pabʼil tibʼ kyxol (Génesis 1:6-8).

•  Toxin qʼij: Qʼanchaʼlix txʼotxʼ tuʼn Dios ex kubʼ tbʼinchaʼn kʼul qe tzeʼ ex awal (Génesis 1:9-13).

•  Tkyajin qʼij: Qʼanchaʼlix Qʼij, Xjaw ex qe cheʼw twitz kyaʼj (Génesis 1:14-19).

•  Tjweʼyin qʼij: Kubʼ tbʼinchaʼn Dios qeju txkup in che anqʼin toj mar ex qeju in che lipen twitz kyaʼj (Génesis 1:20-23).

•  Tqaqin qʼij: Kubʼ tbʼinchaʼn Dios qe txkup twitz Txʼotxʼ ex aju xjal (Génesis 1:24-31).

 Tej tkubʼaj tqaqin qʼij, ojlan Dios. Toj juntl yol, ya mintiʼ kubʼ tbʼinchaʼn qe tiʼchaq (Génesis 2:1, 2).

 Aj tyolin Biblia tiʼj ambʼil tej tkubʼ tbʼinchaʼn Dios tkyaqil, mintiʼ in tzaj tqʼoʼn nim tqanil ik tzeʼn jaku bʼant kyuʼn científico. Sino oʼkx in tzaj tqʼoʼn junjun tqanil tuʼntzun tel kynikʼ kykyaqil xjal tiʼj ik tzeʼn qeju tmajen Dios e anqʼin toj ambʼil ojtxe. Tkyaqilju o kanet prueba kyuʼn científico tiʼj, at ttxolil tukʼilju in tzaj tqʼamaʼn Biblia. Kubʼ ttzʼibʼin astrofísico Robert Jastrow jlu: «Junxichaq qe tqanil, pero aju in tzaj tqʼamaʼn txʼolbʼabʼil toj Tyol Dios in mojeʼ tukʼilju o tzʼel tnikʼ astronomía tiʼj. Toj jun ambʼil, noq minabʼen xi tzyet tuʼn kykubʼ bʼinchaʼn qe tiʼchaq in che ok qkeʼyin ex te mankbʼil kubʼ bʼinchaʼn xjal».

 Kubʼ bʼinchaʼn Qʼij, Xjaw ex qe cheʼw toj ambʼil tej tkubʼ tbʼinchaʼn Dios kyaʼj «t-xe tnejel» (Génesis 1:1). Pero mintiʼ pon tspikʼumal twitz txʼotxʼ tuʼnju attoq nim muj (Génesis 1:2). Maske qʼanchaʼlix chʼin spikʼun toj tnejel qʼij, mintiʼ qʼanchaʼlix jatumel tzaj. Toj tkyajin qʼij, ya mintiʼ ten muj twitz Txʼotxʼ tuʼnju in tzaj tqʼamaʼn Tyol Dios qa qʼanchaʼlix tspikʼumal Qʼij, Xjaw ex qe cheʼw (Génesis 1:17). Atzun jlu okwitlo tqʼoʼn jun xjal twitz tiʼj tzalu twitz Txʼotxʼ.

 Mintiʼ in tzaj tqʼamaʼn Biblia jteʼ abʼqʼi tkubʼlen bʼinchaʼn Txʼotxʼ. Oʼkx in tzaj tqʼamaʼn Génesis 1:1 qa tnejel kubʼ bʼinchaʼn universo, axpe ikx aju Txʼotxʼ. Mintiʼ in tzaj tqʼamaʼn texto lu qa nya ax tok aju in tzaj kyqʼamaʼn científico tiʼj tabʼqʼi Txʼotxʼ.