Tojju chikʼbʼabʼil ex tqʼoʼn Jesús twi jun witz tqʼama jlu: «Kyjaʼtzun tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye» (Mateo 7:12; Lucas 6:31). Moqa ik tzeʼn in tzaj tqʼamaʼn Encyclopedia of Philosophy: «Kybʼinchame kyiʼj txqantl ik tzeʼn kyajbʼile tuʼn tok bʼinchaʼn kyiʼje».

•  ¿Tiʼ t-xilen aj qyolin tiʼj qmod in kubʼ qyekʼin kyiʼj txqantl?

•  ¿Tiquʼn in nonin qiʼj aju qmod in kubʼ qyekʼin kyiʼj txqantl?

•  ¿Atzpe in yolin jlu tiʼjju tuʼn t-xi qʼoʼn jun oyaj ex tuʼn ttzaj qkʼamoʼn juntl te t-xel?

•  ¿Tiʼ jaku bʼant quʼn tuʼn tkubʼ qyekʼin tbʼanel qmod kyiʼj txqantl?

 Atz in qo yolin tiʼj qmod qaj tuʼn tkubʼ kyyekʼin kyiʼj txqantl, ik tzeʼn qaj tuʼn tkubʼ kyyekʼin qukʼil. Jun techel, chʼixmi qkyaqilx qaj tuʼn qok respetarin kyuʼn txqantl ex tuʼn qok kʼujlaʼn kyuʼn. Tuʼntzunju, ax ikx qe qaj tuʼn tkubʼ qyekʼin ax qmod lu kyiʼj txqantl (Lucas 6:31).

 In nonin tbʼanel qmod qiʼj toj alkyexku ambʼil. Jaku tzʼonin:

•   Kyiʼj mejebʼleʼn (Efesios 5:28, 33).

•   Kyiʼj mambʼaj tuʼn kychʼiyset kykʼwal (Efesios 6:4).

•   Tuʼn tten tbʼanel qmod kyukʼil qamiw, kyukʼil qvecin ex kyukʼil qukʼil toj aqʼuntl (Proverbios 3:27, 28; Colosenses 3:13).

 Chʼixmi aʼyex nabʼil in kanet quʼn toj Antiguo Testamento tiʼj tbʼanel qmod tuʼn tkubʼ qyekʼin kyiʼj txqantl. Tqʼama Jesús qa «atzunju in tmaʼn tley Moisés ex in kymaʼn qe t-sanjel Dios» (Mateo 7:12). Toj juntl yol, in xi qbʼiʼn nabʼil tkuʼx toj Antiguo Testamento aju tuʼn tkubʼ qyekʼin qkʼujlabʼil kyiʼj txqantl (Romanos 13:8-10).

 Miʼn. Oʼkx in yolin jlu tiʼj tuʼn qximen tuʼn tkubʼ qyekʼin tbʼanel qmod kyiʼj txqantl. Tej tyolin Jesús tiʼjju qmod tuʼn tkubʼ qyekʼin kyiʼj txqantl, atztoq in yolin tiʼj qmod tuʼn tkubʼ qyekʼin kyiʼj aj qʼoj qiʼj ex nya oʼkx kyiʼj junjun xjal sino kyiʼj kykyaqilx (Lucas 6:27-31, 35). Tuʼntzunju, in nonin tbʼanel qmod qiʼj tuʼn qbʼinchan xtalbʼil kyiʼj kykyaqil xjal.

1.  1. Qʼonka twitza tiʼjju in bʼaj kyiʼj. Ximana kyiʼj qeju ateʼ ttxlaja. Jun techel, jakulo tzʼok tkeʼyina jun xjal qʼiʼn nim tiʼchaq tuʼn ex kwest in bʼet. Moqa jaku tzʼok tbʼiʼna qa at jun tvecina toj hospital, moqa in bʼisun jun tukʼila toj aqʼuntl. In tzaj tqʼamaʼn Filipenses 2:4 jlu: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl». Qa ma txi qbʼiʼn nabʼil lu, kkanetel tumel quʼn tzeʼn tuʼn qonin kyiʼj txqantl.

2.  2. Ximana kyiʼj txqantl. Ximana tiʼj qa tiʼja in bʼaj aju in bʼaj tiʼj juntl xjal. ¿Tiʼ jaku kubʼ tnaʼna? (Romanos 12:15). Qa ma tzʼok tilil tuʼna tel tnikʼa kyiʼj txqantl, kʼonil jlu tiʼja tuʼn tonina kyiʼj.

3.  3. Tenx t-ximbʼetza toj tumel. Bʼaʼn tuʼn tel tnikʼa tiʼj qa junxitl tmod teyele junjun qe. Aju at tajbʼen teya mintiʼlo tajbʼen te juntl xjal. Tuʼntzunju, maske jaku bʼant nim tiʼchaq tuʼna tuʼn tonina tiʼj jun xjal, oʼkx bʼinchanxa aju mas tbʼanel toj twitz (1 Corintios 10:24).