Bʼinchaʼn maj Biblia tuʼn 66 libro ex xi tiʼn junlo 1,600 abʼqʼi tuʼn tkubʼ tzʼibʼin. Tuʼnju t-ximbʼetz Dios tkuʼx toj, in nok qʼoʼn tbʼi te «tyol Dios» (1 Tesalonicenses 2:13).

Toj xnaqʼtzbʼil lu kʼelel qnikʼ tiʼj jlu:

•  Junjun tqanil tiʼj Biblia

•  ¿Alqiʼj in yolin Biblia?

•  ¿Ope chʼexpaj Biblia?

•  ¿Tiquʼn at nim traducción tiʼj Biblia?

•  ¿Alkye kubʼ ximente tiʼ tqanil tuʼn tkux tzʼibʼin toj Biblia?

•  ¿Nyape tzʼaqli tkyaqil libro tkuʼx toj Biblia?

•  ¿Tzeʼn jaku kanet jun versículo quʼn toj Biblia?

•  Lista kyiʼj libro tkuʼx toj Biblia

•   ¿Alkye kubʼ tzʼibʼin Biblia? Te Dios t-ximbʼetz tkuʼx toj Biblia, pero ajbʼen 40 xjal tuʼn tuʼn tkubʼ kytzʼibʼin. Kyxol qe jlu ten Moisés, rey David, Mateo, Marcos, Lucas ex Juan. a Ax Dios tzaj qʼonte kynabʼil xjal tuʼntzun tkubʼ kytzʼibʼin t-ximbʼetz (2 Timoteo 3:16).

   Qo ximen tiʼj jun xjal at jun t-empresa ex in xi tqanin te tsecretario tuʼn tkubʼ ttzʼibʼin jun tqanil te jun xjal. Maske oʼkx jaku chex tqʼoʼn tqanil mas nim kyoklen te, ¿alqe ximbʼetz kbʼelex ttzʼibʼin? Te xjal tajaw empresa. Ax jlu in bʼaj tiʼj Biblia. E ajbʼen xjal tuʼn Dios tuʼn tkubʼ kytzʼibʼin Biblia, pero te t-ximbʼetz tkuʼx toj.

•   ¿Tiʼ t-xilen yol Biblia? Atz tzajni yol Biblia tiʼj yol biblía toj yol griego ex a t-xilen, qe «tal uʼj». Tej tikʼ ambʼil, ajbʼen yol lu tuʼn tyolin kyiʼj kykyaqil libro tkuʼx toj Biblia.

•   ¿Toj alkye ambʼil kubʼ tzʼibʼin Biblia? Xi tzyet tuʼn tkubʼ tzʼibʼin toj abʼqʼi 1513 tjaqʼxi ambʼil qʼiʼn quʼn jaʼlo ex xi tiʼn mas te 1,600 abʼqʼi tuʼn tkubʼ bʼaj, nqayin tiʼj abʼqʼi 98 tiʼj ambʼil qʼiʼn quʼn jaʼlo.

•   ¿Jatumel jaku che kanet qe copia original quʼn tiʼj Biblia? In tzaj kyqʼamaʼn tqanil qa mintiʼ jun copia kʼuʼn toj ambʼil jaʼlo. Tej tkubʼ kytzʼibʼin xjal Biblia, ajbʼen papiro ex pergamino kyuʼn. Ex jun rat e naj material lu. Noqtzun tuʼnj, toj nim ambʼil e bʼant copia kyuʼn aj tzʼibʼil ex kubʼ kytzʼibʼin ik tzeʼnx tkuʼx kyoj copia original. Onin jlu tuʼn kukx kyten copia tuʼn tajbʼen kye txqantl.

•   ¿Tiʼ aju Antiguo ex Nuevo Testamento? Aju plaj Biblia kubʼ tzʼibʼin toj yol hebreo in nok qʼoʼn tbʼi te Antiguo Testamento. b Ax ikx in nok qʼoʼn tbʼi te Escrituras Hebreas. Atzun plaj Biblia kubʼ tzʼibʼin toj yol griego, in nok qʼoʼn tbʼi te Nuevo Testamento. Ax ikx in nok qʼoʼn tbʼi te Escrituras Griegas Cristianas. Ex kyuʼn kabʼe plaj lu in bʼant jun libro, aju Tyol Dios. c

•   ¿Tiʼ tkuʼx toj Biblia? In yolin Biblia kyiʼj txʼolbʼabʼil, kyiʼj ley, kyiʼj profecía, qe poesía, qe proverbio, qe bʼitz ex qe carta. Keʼyinka « Lista kyiʼj libro tkuʼx toj Biblia».

 Aj t-xi tzyet Biblia, in yolin tiʼj tzeʼn kubʼ tbʼinchaʼn Dios kyaʼj ex Txʼotxʼ. Ax ikx, in tzaj tqʼamaʼn Biblia qa Jehová tbʼi Dios ex qa taj tuʼn tel kynikʼ xjal tiʼj (Salmo 83:18).

 In tzaj tyekʼin Biblia qa o tzaj qʼamaʼn nim nya ax tok yol tiʼj Jehová ex in tzaj tqʼamaʼn tiʼ kbʼantel tuʼn tuʼn tbʼaj tsaqin tbʼi.

 Ax ikx, in tzaj tqʼamaʼn Biblia tiʼ t-ximbʼetz Dios at tiʼj Txʼotxʼ ex kyiʼj xjal. Ex in tzaj tqʼamaʼn tiʼ kbʼantel tuʼn toj ambʼil tzul tuʼntzun tel tiʼn tkyaqil nya bʼaʼn.

 Nya oʼkxju, ax ikx in tzaj tqʼoʼn Biblia qe consej jaku che onin qiʼj toj qanqʼibʼil. Qo xnaqʼtzan kyiʼj junjun techel:

•   ¿Tiʼ jaku bʼant quʼn tuʼn tten mujbʼabʼil qxol kyukʼil txqantl? «Kyjaʼtzun tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye» (Mateo 7:12).

   ¿Tiʼ t-xilen jlu?: Bʼaʼn tuʼn tok tilil quʼn tuʼn tkubʼ qyekʼin qmod kyukʼil txqantl ik tzeʼn kymod qaj tuʼn tkubʼ kyyekʼin qukʼil.

•   ¿Tiʼ jaku bʼant quʼn tuʼn miʼn ttzaj estrés qiʼj? «Kyjaʼtzun, miʼn bʼaj kykʼuʼje tiʼj ju te nchiʼj, porke aju te nchiʼj texte tbʼis ktzajel» (Mateo 6:34).

   ¿Tiʼ t-xilen jlu?: Mas bʼaʼn tuʼn tok qqʼoʼn qwiʼ tiʼjju in bʼaj qiʼj toj jun qʼij twitzju tuʼn tok qqʼoʼn qwiʼ tiʼjju jaku bʼaj qiʼj te nchiʼj.

•   ¿Tzeʼn jaku qo tzalaj toj qmejebʼleʼn? «Kyjaʼtzun tten teyle junjun kyeye, kʼujlam t-xuʼjil ik tzaʼn in tkʼujlan tibʼ, ax ikx te xuʼj nimanx tchmil» (Efesios 5:33).

   ¿Tiʼ t-xilen jlu?: Nim toklen tuʼn kyrespetarin mejebʼleʼn kyxolx ex tuʼn tkubʼ kyyekʼin kykʼujlabʼil tuʼntzun kukx kytzalaj.

 Mintiʼ. Aj tok kymojbʼaʼn xjal at kyojtzqibʼil qe copia original tiʼj Biblia tukʼil tqanil tkuʼx toj toj ambʼil jaʼlo, o tzʼel kynikʼ tiʼj qa mintiʼ o chʼexpaj. Mintiʼ in qo jaw labʼin tiʼj jlu. ¿Tiquʼn? Tuʼnju qa taj Dios tuʼn tjaw kyuʼjin xjal Tyol ex tuʼn tel kynikʼ tiʼj tqanil tkuʼx toj, jaku tzʼok qeʼ qkʼuʼj tiʼj qa xqʼuqin Dios tiʼj Tyol tuʼntzun miʼn tchʼexpaj (Isaías 40:8). d

 Toj ambʼil jaʼlo, chʼixme kykyaqil xjal mintiʼ in nel kynikʼ tiʼj yol ajbʼen tej tkubʼ tzʼibʼin Biblia. Noqtzun tuʼnj, at tbʼanel tqanil «kye kykyaqil nasyon, ex kye kykyaqil kyiyjil xjal, ex kye kykyaqil kʼloj xjal junxilchaq kyyol, ex kye kykyaqil tnam» (Apocalipsis 14:6). Tuʼntzunju, in kubʼ traducirit Biblia toj jun yol jaku tzʼel kynikʼ xjal tiʼj. Iktzun tten jaku jaw kyuʼjin ex jaku tzʼel kynikʼ tiʼj tqanil tkuʼx toj.

 At oxe tumel tuʼn tkubʼ traducirin Biblia:

•   Teyele junjun yol. In kubʼ traducirit tkyaqil yol tkuʼx toj texto.

•   Aj tkubʼ traducirit idea. In che ajbʼen yol in che onin qiʼj tuʼn tel qnikʼ tiʼj tiʼ t-xilen tqanil.

•   Paráfrasis. In bʼaj traducirin tuʼn kytzalaj xjal tiʼj, pero mintiʼ in nok qʼoʼn toklen tkyaqil tqanil tkuʼx toj ex at maj in bʼaj chʼexpuʼn tiʼ t-xilen jun texto moqa versículo moqa in nok kyqʼoʼn mas tqanil tiʼj.

 Tuʼn tbʼant jun tbʼanel traducción, in xi jyet tumel tzeʼn tuʼn kykyaj kykyaqil idea ex in chex jyet yol nya kwest tuʼntzun tel kynikʼ xjal tiʼj. Aj tbʼant jlu, in xi qʼamet tkyaqilju taj Dios tuʼn tel kynikʼ xjal tiʼj. e

 Tuʼnju te Dios t-ximbʼetz tkuʼx toj Biblia, a kubʼ ximente tiʼ tuʼn tkuʼx tzʼibʼin toj. Tnejel, «tzaj tqʼoʼn Dios tyol kye xjal judiy», toj juntl yol, aʼye xjal te Israel ok xqʼuqin Tyol Dios toj hebreo (Romanos 3:2).

 Tzʼaqli tkyaqil libro tkuʼx toj Biblia tuʼnju kukx ateʼ kykyaqilx. In tzaj kyqʼamaʼn junjun xjal qa ateʼ junjun ojtxe libro e ten toj ewaj toj nim ambʼil ex qa il tiʼj tuʼn kykux qʼet kyxol libro qʼin tuʼn Tyol Dios. f Pero aqeju libro tkuʼx t-ximbʼetz Dios kyoj, ax Biblia in tzaj yekʼinte qa ax tok Tyol Dios tkuʼx kyoj (2 Timoteo 1:13). Tuʼntzunju, at kymojbʼabʼil kyibʼ kykyaqilx. Nya ax jlu jaku txi qqʼamaʼn kyiʼj ojtxe libro in tzaj kyqʼamaʼn xjal tuʼn kykux qʼet kyxol libro qʼin tuʼn Biblia. g