Tipumal Dios aju xewbʼaj xjan (Miqueas 3:8; Lucas 1:35). Ex in tzaj tsamaʼn Dios xewbʼaj xjan tibʼaj jun xjal moqa juntl tiʼ tuʼn tjapun twi t-ximbʼetz (Salmo 104:30; 139:7).

 Toj Tyol Dios in najbʼen yol hebreo rúaj tiʼj xewbʼaj ex toj yol griego pnéuma. Chʼixme tkyaqil maj atz in che yolin tiʼj xewbʼaj xjan, aju tipumal Dios (Génesis 1:2). Noqtzun tuʼj, ax ikx in che ajbʼen toj Tyol Dios tuʼn kyyolin tiʼj jlu:

•   Tiʼj qxew (Habacuc 2:19; Apocalipsis 13:15).

•   Tiʼj kyqʼiqʼ (Génesis 8:1; Juan 3:8).

•   Tiʼj t-ximbʼetz jun xjal (Números 14:24).

•   Kyiʼj anjel ex tiʼj Dios (1 Reyes 22:21; Juan 4:24).

 Kykyaqilx qe tiʼchaq lu mintiʼ qʼanchaʼl qe, pero jaku tzʼok qqʼoʼn qwitz tiʼjju jaku bʼant kyuʼn. In tzaj tqʼamaʼn Diccionario expositivo de palabras del Antiguo y del Nuevo Testamento exhaustivo, te William E. Vine qa ik tten t-xew Dios ik tzeʼn «kyqʼiqʼ, aju mintiʼ qʼanchaʼl, mlay tzyet quʼn pero at tipumal».

 In nok qʼoʼn xewbʼaj xjan ik tzeʼn «tqʼabʼ» Dios (Salmo 8:3; 19:1; Lucas 11:20; jaku tzʼok tmojbʼaʼna tukʼil Mateo 12:28). Tuʼn kybʼant kʼil tuʼn jun xjal in che ajbʼen qe tqʼabʼ, ax ikx te Dios o tzʼajbʼen xewbʼaj xjan tuʼn tuʼn kybʼant qe tiʼchaq lu:

•   Tuʼn tbʼant kyaʼj, Txʼotxʼ ex tkyaqilju at twitz (Salmo 33:6; Isaías 66:1, 2).

•   Tuʼn tkubʼ tzʼibʼit Tyol Dios (2 Pedro 1:20, 21).

•   Tuʼn kypakbʼan tmajen e ten toj ambʼil ojtxe ex tuʼn tbʼant milagr kyuʼn (Lucas 4:18; Hechos 1:8; 1 Corintios 12:4-11).

•   Tuʼn tkubʼ kyyekʼin tmajen tbʼanel kymod (Gálatas 5:22, 23).

Nya jun xjal te xewbʼaj xjan

 Aj tyolin Biblia tiʼj xewbʼaj xjan ik tzeʼn «tqʼabʼ» moqa «t-xew» Dios, in tzaj tyekʼin qa nya jun xjal (Éxodo 15:8, 10). Tuʼn tbʼant kʼil tuʼn jun xjal, il tiʼj tuʼn t-ximen ex tuʼn kyyukch tqʼabʼ. Mlay che aqʼunan tqʼabʼ kyjunalx. Ax ikx te xewbʼaj xjan, oʼkx jaku tzʼonin aj tajbʼen tuʼn Dios ex ik tzeʼn in kubʼ t-ximen (Lucas 11:13). Ax ikx in nok tmojbʼaʼn Tyol Dios xewbʼaj xjan tukʼil aʼ ex kyukʼil junjuntl tiʼchaq mintiʼ qʼanchaʼl, ik tzeʼn qʼuqbʼil qkʼuʼj ex qojtzqibʼil. Tuʼntzunju, in nel qnikʼ tiʼj qa nya jun xjal te xewbʼaj xjan (Isaías 44:3; Hechos 6:5; 2 Corintios 6:6).

 In tzaj tqʼamaʼn Biblia tbʼi Dios, aju Jehová, ex tbʼi Tkʼwal, aju Jesucristo, pero ni jun maj in tzaj tqʼamaʼn jun tbʼi xewbʼaj xjan (Isaías 42:8; Lucas 1:31). Tej tok tqʼoʼn Esteban twitz tiʼj jun witzikʼ, oʼkx ok tkeʼyin kabʼe xjal ex nya oxe. In tzaj tqʼamaʼn Tyol Dios jlu: «Atzunte Esteban nojni tuj tanmi tuʼn Xewbʼaj Xjan, jaw tkeʼyin twitz kyaʼj ex o til t-spikʼumal Dios tuj kyaʼj tukʼix Jesús waʼl ttxlaj Dios tuj bʼanqʼabʼaj» (Hechos 7:55). Toj ambʼil lu, ajbʼen tipumal xewbʼaj xjan tuʼn Dios tuʼn tok tkeʼyin Esteban aju tzaj yekʼin te toj twitzikʼ.

 Aju in tzaj kyqʼamaʼn junjun xjal: Jun xjal te xewbʼaj xjan ex at kyxol qeju oxe dios moqa Trinidad. Atzun jlu in tzaj tyekʼin 1 Juan 5:7 ex 8 toj junjun Biblia, ik tzeʼn toj Aju Xjan Tuʼjil Tyol Dios.

 Aju axix tok: In tzaj tqʼamaʼn Aju Xjan Tuʼjil Tyol Dios toj 1 Juan 5:​7 ex 8 jlu: «At ox testiw [tuj kyaʼj in che yolin tiʼj jlu, ex atzun qe jlu: Mambʼaj, tukʼix ju Yol, tukʼix Xewbʼaj Xjan; aqeju ox testiw lu junx kyten. Ex at ox testiw twitz txʼotxʼ]». Noqtzun tuʼnj, o tzʼel kynikʼ junjun xjal tiʼj qa nya a apóstol Juan kubʼ tzʼibʼinte qe yol lu ex tuʼntzunju mintiʼ tuʼn kykuʼx qʼet toj Tyol Dios. Jun techel, in tzaj tqʼamaʼn Bruce M. Metzger jlu, jun xjal at tojtzqibʼil tiʼj Tyol Dios: «Mintiʼ kyoklen qe yol lu, tuʼntzunju mintiʼ tuʼn kyten toj Nuevo Testamento».

 Aju in tzaj kyqʼamaʼn junjun xjal: In yolin Tyol Dios tiʼj xewbʼaj xjan ik tzeʼn jun xjal.

 Aju axix tok: At maj in yolin Tyol Dios tiʼj xewbʼaj xjan ik tzeʼn jun xjal pero nya a t-xilen jlu qa jun xjal. Ax jlu in bʼaj aj tyolin Biblia tiʼj nabʼil, tiʼj kamik ex tiʼj il. Jun techel, in tzaj tqʼamaʼn qa in schʼin nabʼil toj kay, qa in sbʼun il ex qa in kubʼ tbʼyoʼn qe xjal, ex in nok qʼoʼn kamik ik tzeʼn cárcel (Proverbios 1:20; Hebreos 3:13; Romanos 6:23; Apocalipsis 20:13).

 Toj uʼj te Juan, tqʼama Jesús qa jun onil aju xewbʼaj xjan. Tqʼama qa tzul tchikʼbʼaʼn aju axix tok, qa tzul tyekʼin qbʼe, qa kyolil, qa kjawil tnimsaʼn Jesús ex qa kʼonil qiʼj (Juan 16:7-15). Tej tyolin Juan tiʼj xewbʼaj xjan ajbʼen sustantivo pnéuma tuʼn, toj juntl yol «xewbʼaj», mintiʼ tqʼama qa xinaq moqa xuʼj (Juan 14:16, 17).

 Aju in tzaj kyqʼamaʼn junjun xjal: In tzaj kyqʼamaʼn qa tuʼnju in jaw aʼ twiʼ jun xjal toj tbʼi xewbʼaj xjan, in nok te jun xjal.

 Aju axix tok: At maj in najbʼen txol yol «tuʼj tbʼi» tuʼn Tyol Dios tuʼn ttzaj tyekʼin qa jaku bʼant jun tiʼ tuʼn xjal o txi qʼoʼn toklen tuʼn juntl (Deuteronomio 18:19-22; Ester 8:10). Toj qyol ax ikx in xi qqʼmaʼn toj «tbʼi ley», pero nya a t-xilen jlu qa jun xjal aju ley. Tuʼntzunju, aj tjaw aʼ twiʼ jun xjal toj tbʼi xewbʼaj xjan, in nel tnikʼ xjal tiʼj tipumal xewbʼaj xjan ex tiʼj toklen at tuʼn tjapun twiʼ t-ximbʼetz Dios (Mateo 28:19).

 Aju in tzaj kyqʼamaʼn junjun xjal: Kubʼ kyximen tnejel t-xnaqʼtzbʼen Jesús, axpe ikx qe t-apóstol, qa jun xjal te xewbʼaj xjan.

 Aju axix tok: Mintiʼ in tzaj t-xnaqʼtzaʼn Tyol Dios jlu, nix aju o bʼaj ojtxe. In tzaj tqʼamaʼn Encyclopædia Britannica jlu: «Aju xnaqʼtzbʼil tiʼj qa jun xjal te xewbʼaj xjan tzaj tzyet toj jun chmabʼil ok tuʼn Concilio de Constantinopla toj abʼqʼi 381 tiʼj ambʼil qʼiʼn quʼn jaʼlo». Ok chmabʼil lu tej otoqxi tzikʼ kabʼe syent abʼqʼi tukʼil mij tkyimlen mankbʼil apóstol.