Nim jaku tzʼonin Biblia qiʼj aj tjaw qjyoʼn tiʼ kbʼantel quʼn. ¿Tiquʼn? Tuʼnju jaku tzʼonin qiʼj tuʼn tten qnabʼil ex tuʼn qximen toj tumel (Proverbios 4:5). At maj in tzaj tqʼamaʼn qe alkye mas tbʼanel. Atzun junjuntl maj, oʼkx in tzaj tqʼoʼn tbʼanel consej qe tuʼntzun tkubʼ qximen alkye mas bʼaʼn.

Toj xnaqʼtzbʼil lu, kʼelel qnikʼ tiʼj jlu:

•  Junjun consej jaku che onin tiʼja tuʼn tjaw tjyoʼna aju mas bʼaʼn

•  Qa ya o kubʼ nximane tiʼ kbʼantel wuʼne, ¿jakupe kubʼ nchʼexpuʼne?

•  Yajtzun qa ma jaw njyoʼne jun tiʼ nya toj tumel, ¿ilpe tiʼj tuʼn tkubʼ nchʼexpuʼne?

•   Paʼmila ambʼil tuʼn t-ximana. In tzaj tqʼamaʼn Biblia qa aju «xjal at tnabʼl tok tkwent tiʼj jatum in bʼet» (Proverbios 14:15). Qa jun rat ma txi tbʼinchaʼna jun tiʼ, bʼalo mlay ximana kyiʼj junjun tiʼ nim kyoklen. Tuʼntzunju, paʼmila ambʼil tuʼn t-ximana tiʼj alkye mas bʼaʼn (1 Tesalonicenses 5:21).

•   Miʼn kubʼ tbʼinchaʼna qe tiʼchaq noq tuʼnju in kubʼ tnaʼna. In tzaj tqʼamaʼn Tyol Dios qa jaku tzaj nya bʼaʼn qiʼj qa ma tzʼok qeʼ qkʼuʼj tiʼj qanmi (Proverbios 28:26; Jeremías 17:9). Tuʼntzunju, nya toj tumel tuʼn tkubʼ t-ximana tiʼ kbʼantel tuʼna qa in qʼojina, qa in bʼisuna, qa otoq tzaj bʼaj tkʼuʼja moqa siktni taʼya (Proverbios 24:10; 29:22).

•   Qaninxa te Dios tuʼn ttzaj tqʼoʼn tnabʼila (Santiago 1:5). Qa ma txi qqanin qnabʼil te Dios, jaku qo tzaj ttzaqʼweʼn. In nok te jun tbʼanel Mambʼaj ex nya taj tuʼn ttzaj nya bʼaʼn kyiʼj tkʼwal. A «Qman in tzaj qʼonte nabʼl; ex tukʼil in tzaj ojtzqibʼl» (Proverbios 2:6). In najbʼen Biblia tuʼn Dios tuʼn ttzaj tqʼoʼn qnabʼil tuʼnju ateʼ tbʼanel consej toj (2 Timoteo 3:16, 17).

•   Jyoma tqanil. In tzaj tqʼamaʼn Tyol Dios qa «aju xjal at tnabʼl ex list in kubʼ tqʼoʼn twiʼ kyiʼj qe yol bʼaʼn» (Proverbios 1:5). Tuʼntzunju, tuʼn tkubʼ qximen alkye mas bʼaʼn, qo jyon tqanil tiʼj. ¿Jatumel jaku kanet tbʼanel tqanil tuʼna ex jaku tzʼok qeʼ tkʼuʼja tiʼj?

   Tnejel, jyoma tqanil toj Biblia tiʼjju in kubʼ t-ximana. A Dios Bʼinchal qe ex ojtzqiʼn tuʼn alkye mas bʼaʼn te qe. Tuʼntzunju, jaku che kanet tbʼanel consej quʼn toj Tyol (Salmo 25:12). At maj, in tzaj tqʼamaʼn Biblia qe ley ex qe kawbʼil tiʼjju il tiʼj tuʼn t-xi qbʼinchaʼn (Isaías 48:17, 18). Atzun junjuntl maj, oʼkx in tzaj tqʼoʼn nabʼil ex consej qe tuʼntzun tel qnikʼ tiʼj alkye mas bʼaʼn. Tuʼnju mintiʼxix in tzaj qʼamaʼn tiʼ kxel qbʼinchaʼn, toj ambʼil lu jaku kubʼ qximen alkye mas bʼaʼn toj qwitz tuʼn t-xi qbʼinchaʼn. Tuʼn kykanet tbʼanel consej tuʼna toj Tyol Dios, jaku txi tjyoʼna kyoj xnaqʼtzbʼil tkubʼ toj sitio lu. Kykyaqilx noq kukx qe. a

   Kyoj junjuntl maj, il-lo tiʼj tuʼn t-xi tjyoʼna tqanil kyoj junjuntl tembʼil jaku tzʼok qeʼ tkʼuʼja kyiʼj. Jun techel, qa taja tuʼn ttzaj tlaqʼoʼna jun producto nim twiʼ, bʼaʼn tuʼn t-xi tjyoʼna tqanil tiʼj, alkye bʼinchalte, qa at garantía tiʼj ex tiʼ jaku bʼant tuʼna tuʼn taj tmeltzʼuʼna juntl maj. Ax ikx, bʼaʼn tuʼn tel tnikʼa tiʼj qa atzun producto lu at tajbʼen teya.

   In tzaj tqʼamaʼn Tyol Dios jlu: «Mintiʼ in japun aju in kubʼ kyximan xjal qa mi aʼl jun qʼol kyconsej» (Proverbios 15:22). Tuʼntzunju, naʼmx t-xi tbʼinchaʼna jun tiʼ, yolina kyukʼil xjal jaku tzʼok qeʼ tkʼuʼja kyiʼj. Jun techel, qa ma tzaj jun yabʼil tiʼja, bʼaʼn tuʼn tyolina tukʼil jun doctor (Mateo 9:12). At maj, mas bʼaʼn qa ma yolina kyukʼil xjal o che ikʼ toj nya bʼaʼn ik tzeʼn in nok weʼya twitz. Noqtzun tuʼnj, bʼaʼn tuʼn ttzaj tnaʼna qa aya kbʼel ximente tiʼ kxel tbʼinchaʼna ex tiʼ jaku tzaj tiʼja tuʼn (Gálatas 6:4, 5).

•   Ximana tiʼj tkyaqil. Otoqxi tzaj tjyoʼna tkyaqil tqanil tiʼjju at tajbʼen teya, bʼinchama jun lista tiʼj qa jaku tzʼonin tiʼja moqa mlay. Tibʼajxi jlu, ximana tiʼj tiʼ jaku bʼaj tiʼja qa ma txi tbʼinchaʼna (Deuteronomio 32:29). Jun techel, ¿tiʼ jaku bʼaj tiʼja, kyiʼj toj tjaya ex kyiʼj junjuntl xjal tuʼnju kxel tbʼinchaʼna? (Proverbios 22:3; Romanos 14:19). Qa ma ximana tiʼj xjel lu ex kyiʼj nabʼil tkuʼx toj Tyol Dios, kjawil tjyoʼna aju mas tbʼanel toj kywitz kykyaqil.

•   Ximana tiʼ kbʼantel tuʼna. At maj nya qaj tuʼn t-xi qbʼinchaʼn aju in kubʼ qximen tuʼnju nya qʼuqli qkʼuʼj tiʼj. Qa ma bʼaj jlu, bʼalo jaku txi qnajsaʼn jun tiʼ tbʼanel. Moqa jaku tzaj tiʼn mas nya bʼaʼn qiʼj. Qa mintiʼ ma txi qbʼinchaʼn aju in kubʼ qximen, jaku tzaj tiʼn nya bʼaʼn qiʼj ik tzeʼn aj tjaw qjyoʼn jun tiʼ nya toj tumel. In tzaj tchikʼbʼaʼn Tyol Dios jlu tukʼil jun techel tiʼj aqʼuntl in bʼant toj kojbʼil: «Alkyete matzʼokten twitz tiʼjuʼ kyqʼiqʼ, lay tzʼawan, ex alkyete matzʼokten twitz tiʼjuʼ muj, lay jaw tawal» (Eclesiastés 11:4, Aju Xjan Tuʼjil Tyol Dios).

 Bʼaʼn tuʼn ttzaj tnaʼna qa at maj nya toj tumel kʼelel tkyaqil maske ma jaw tjyoʼna aju mas tbʼanel. At maj, il tiʼj tuʼn t-xi tbʼinchaʼna junjun tiʼchaq moqa jaku bʼaj jun tiʼ mintiʼ ximen tuʼna (Eclesiastés 9:11). Tuʼntzunju, jyoma tkyaqil tqanil ex jyoma aju mas tbʼanel.

 Aj tkubʼ qximen tuʼn tbʼant jun tiʼ quʼn, nya a t-xilen qa mlay kubʼ qchʼixpuʼn. Bʼalo jaku chʼexpaj jun tiʼ toj tanqʼibʼila moqa junxitl tiʼ in bʼaj twitzju otoq kubʼ t-ximana. Tuʼntzunju, bʼaʼn tuʼn t-ximana tiʼj juntl maj ex jyoma juntl tumel mas tbʼanel.

 Noqtzun tuʼnj, ateʼ junjuntl tiʼ mlayx kubʼ qchʼexpuʼn (Salmo 15:4). Jun techel, taj Dios tuʼn tjapun twi kyyol mejebʼleʼn xi kytziyen tej kykubʼ mojeʼ (Malaquías 2:16; Mateo 19:6). b Tuʼntzunju, nim toklen tuʼn t-xi kybʼinchaʼn tiʼj jun nya bʼaʼn in tzaj kyxol ex nya tuʼn tel kypan kyibʼ.

 Bʼaʼn tuʼn tel qnikʼ tiʼj qa qkyaqilx jaku qo el txalpaj aj tjaw qjyoʼn jun tiʼ (Santiago 3:2). Ex toj tumel qa ma tzaj qbʼis moqa in kubʼ qximen qa quʼnx otoq tzaj nya bʼaʼn qiʼj (Salmo 69:5). Axpe ikx, toj tumel qa ma tzaj qbʼis tuʼnju in nonin qiʼj tuʼn miʼn t-xi qbʼinchaʼn juntl maj aju otoq qo el txalpaj tiʼj (Proverbios 14:9). Noqtzun tuʼnj, in tzaj tqʼamaʼn Biblia qa nim toklen tuʼn tok qxqʼuqin qibʼ tuʼn miʼn ttzaj nim qbʼis, tuʼnju jaku tzaj yabʼil tiʼj qximbʼetz ex tiʼjju in kubʼ qnaʼn (2 Corintios 2:7). c Bʼaʼn tuʼn ttzaj tnaʼna qa «in qʼaqʼan tkʼuʼj Qman qiʼj ex in tzʼeʼy tkʼuʼj qiʼj» (Salmo 103:8-13). Tuʼntzunju, qa nya toj tumel jun tiʼ o jaw tjyoʼna ex mlay kubʼ tchʼexpuʼna, qʼiʼmela jun xnaqʼtzbʼil tiʼj ex tzʼok tilil tuʼna tuʼn miʼn t-xiʼ mas toj il.