Jun ambʼil kwest kʼokel kye xjal aj tul nimxix yajbʼil, tuʼnju naʼmxtoq tok kyqʼoʼn kywitz tiʼj jun maj. Ik tzeʼn in tzaj kyqʼamaʼn qe profecía tkux toj Biblia, kbʼajel ambʼil lu «tuj mankbʼil tqʼijlalil» (2 Timoteo 3:1; Daniel 12:4). In tzaj tqʼamaʼn Marcos 13:19 jlu: «Porke tuj tqʼijlalil tzul, tzul jun kʼixbʼisabʼl nimxix, bʼajx tzaj jun kʼixbʼisabʼl ik tzaʼn jlu atxix t-xe tnejel tej tbʼant tkyaqil tuʼn Dios, ex mlay tzaj juntl maj» (Daniel 12:1; Mateo 24:21, 22).

¿Tiʼtzun kbʼajel toj ambʼil te nimxix yajbʼil?

•   Kbʼel najsaʼn okslabʼil nya ax tok. Noq minabʼen kbʼel najsaʼn aju okslabʼil nya ax tok (Apocalipsis 17:​1, 5; 18:​9, 10, 21). Aj tbʼant jlu kyuʼn aj kawil in che onin tiʼj Naciones Unidas, ok kxel kybʼinchaʼn aju tajbʼil Dios (Apocalipsis 17:3, 15-18). a

•   Ok che qʼojil aj kawil tiʼj axix tok okslabʼil. Ok tkeʼyin Ezequiel toj jun visión jun kʼloj tnam in nok tbʼi te «Gog aju tzajni toj txʼotxʼ Magog», kʼokel tilil kyu’n kawil tuʼn kyqʼojin kyiʼj xjal ate’ toj axix tok okslabʼil. Noqtzun tuʼnj miʼn txi tqʼoʼn Dios ambʼil kye tuʼn tkubʼ kynajsaʼn aju ttnam. (Ezequiel 38:​1, 2, 9-​12, 18-​23).

•   Che okel juzgarin qeju in che anqʼin twitz Txʼotxʼ. Che okel tchmon Jesús qe xjal ex che okel tuʼn toj xjel «ex kʼelel tpaʼn jun kʼloj kyxol txqantl, ik tzaʼn jun pastor in che el tpaʼn qe ẍneʼl kyxol qe chip» (Mateo 25:31-​33). Kbʼel tqoʼn kysentens noq tzeʼnku o bʼant kyuʼn qa o che onin kyiʼj qe terman Cristo moqa miʼn, aʼyeju che kawil tukʼil toj kyaj (Mateo 25:34-​46).

•   Che okel chmoʼn qeju che kawil tukʼil Jesús toj tkawbʼil. Tkyaqil qe tmajen Dios aqeju o che jaw skʼoʼn tuʼn kykawin tukʼil Cristo ok che kyimel tzalu twitz txʼotxʼ ex yajxitl che jawil anqʼin tuʼn kyxiʼ anqʼil toj kyaʼj (Mateo 24:31; 1 Corintios 15:50-​53; 1 Tesalonicenses 4:​15-​17).

•   Tzul aju Armagedón. In tzaj tqʼamaʼn Tyol Dios alkye juntl tbʼi Armagedón: aju tqʼoj «Dios tuj jun qʼij ma toklen, aju Dios at tipumal» ex aju «tqʼijlalil tuʼn tul Qman» (Apocalipsis 16:14, 16; Isaías 13:9; 2 Pedro 3:​12). Aqeju kbʼel qʼon kykastiw tuʼn Cristo che kbʼel najsaʼn tuʼn toj qʼoj lu (Sofonías 1:​18; 2 Tesalonicenses 1:​6-​10). Ax ikx che kbʼel najsaʼn qe aj kawil aju in kubʼ techlaʼn Biblia ik tzeʼn jun txkup at wuq twiʼ (Apocalipsis 19:19-​21).

¿Tiʼtzun kbʼajel aj tkubʼaj nimxix yajbʼil moqa gran tribulación?

•   Kbʼelex jupuʼn Satanás ex qe t-demonio. Kbʼelex xoʼn Satanás ex qe t-demonio tuʼn jun anjel nim tipumal toj jun «jul» nim t-xeʼ (Apocalipsis 20:​1-3). Toj jul lu mintiʼ jun tiʼ jaku bʼant tuʼn, tuʼnju ik tten ik tzeʼn otoq kyim. Ax ikx chʼixme ik tten ik tzeʼn jun cárcel, tuʼntzunju mlay tzʼajbʼen tipumal tuʼn kukx tsbʼun mastl kyiʼj xjal (Apocalipsis 20:7).

•   Kxel tzyet aju Mil abʼqʼi. Toj ambʼil lu, kxel tzyet tuʼn tkawin Tkawbʼil Dios toj Mil abʼqʼi ex tzul tiʼn nimxix kʼiwlabʼil kyibʼaj xjal twitz Txʼotxʼ (Apocalipsis 5:​9, 10; 20:​4, 6). Aqeju «nimxix kyajlal xjal» che kjel anqʼin toj «nimxix yajbʼil» moqa gran tribulación, kʼokel kyqʼoʼn kywitz aj t-xi tzyet Mil abʼqʼi (Apocalipsis 7:​9, 14; Salmo 37:​9-​11).