Toj ambʼil ojtxe, xi tqʼamaʼn Dios kye aj Israel tuʼn tel kypaʼn aju diezmo a moqa aju tlajin junjun abʼqʼi tuʼntzun kyonin tiʼj kʼulbʼil axix tok. Xi tqʼamaʼn jlu kye: «Teyle junjun abʼqʼi il tiʼj tuʼn tel kypaʼne tlajiʼn tiʼj tkyaqil twitz kyawale kjawil kychmoʼne» (Deuteronomio 14:22).

 Iltoq tiʼj tuʼn t-xi kyqʼoʼn aj Israel diezmo tuʼnju atzun jlu xi qʼamaʼn kye toj Tley Moisés. Tuʼnju ya nya ateʼ okslal tjaqʼ Ley lu, ya nya il tiʼj tuʼn t-xi kyqʼoʼn diezmo (Colosenses 2:13, 14). Sino teyele junjun okslal kxel tqʼoʼn oyaj «ik tzaʼn ma kubʼ t-ximan tuj tanmi; mya tukʼil bʼis tuʼn t-xi tqʼoʼn ex mya lajwers, porke aju xjal in xi tqʼoʼn oyaj tukʼil tzalajbʼil, in tzalaj Dios tiʼj» (2 Corintios 9:7).

•  ¿Tiʼ in tzaj tqʼamaʼn Antiguo Testamento tiʼj diezmo?

•  ¿Tiʼ in tzaj tqʼamaʼn Nuevo Testamento tiʼj diezmo?

 Nim maj in yolin plaj Tyol Dios tok tbʼi ik tzeʼn Antiguo Testamento moqa Ojtxe Tuʼjil tiʼj diezmo. Mas in yolin Biblia tiʼj diezmo tej otoqxi tzaj qʼoʼn Ley te Moisés. Pero ax ikx in yolin Biblia junjun maj tiʼj diezmo tej naʼmxtoq ttzaj tqʼoʼn Dios qe Tley kye aj Israel.

Tej naʼmxtoq ttzaj qʼoʼn qe Ley te Moisés

 Aju tnejel xjal xi qʼonte diezmo a Abrán moqa Abrahán (Génesis 14:18-20; Hebreos 7:4). Bʼalo atz in yolin diezmo lu tiʼjju ambʼil tej t-xi tqʼoʼn Abrán jun oyaj te rey ex pal te Salem. Mintiʼ in tzaj tqʼamaʼn Tyol Dios qa xi tqʼoʼn Abrahán ex qe tkʼwal juntl maj jun diezmo.

 Aju tkabʼ xjal in yolin Tyol Dios tiʼj qa xi tqʼoʼn jun diezmo a Jacob, aju tal tchman Abrahán. Xi ttziyen Jacob te Dios tuʼn t-xi tqʼoʼn «aju tlajiʼn» tiʼj tkyaqilju otoq tzaj tqʼoʼn te qa matoq tzʼonin tiʼj tuʼn tel bʼaʼn tkyaqil (Génesis 28:20-22). Ik tzeʼn in tzaj kyqʼamaʼn junjun xjal in che xnaqʼtzan tiʼj Tyol Dios, bʼalo alumaj xi tqʼoʼn Jacob te diezmo. Maske bʼant jlu tuʼn Jacob nya a t-xilen jlu qa axtoq jlu tuʼn tbʼant kyuʼn toj tja.

Tjaqʼ Tley Moisés

 Iltoq tiʼj tuʼn t-xi kyqʼoʼn aj Israel diezmo tuʼnju onin jlu tiʼj kykʼulbʼil te Jehová.

•   In najbʼentoq diezmo tuʼn kykʼaʼchit tmajen Dios aqeju in che ajbʼentoq te toj tkyaqil ambʼil ex mintiʼtoq kytxʼotxʼ tuʼn tok kyawal. Ik tzeʼn qe aj Leví ex qe pal (Números 18:20, 21). Xi kyqʼoʼn aj Israel diezmo kye aj Leví mintiʼ e ajbʼen te pal, atzun kye aj Leví, xi kyqʼoʼn diezmo tiʼj jlu kye qeju in che ajbʼentoq te pal (Números 18:26-29).

•   Bʼalo ax ikx xi kyqʼoʼn aj Israel juntl diezmo kykyaqil abʼqʼi, ex onin jlu kyiʼj qeju aj Leví ex kyiʼj qeju nya aj Leví (Deuteronomio 14:22, 23). In che ajbʼentoq oyaj lu kyuʼn aj Israel kyoj ikʼsabʼil nim kyoklen. Ex ateʼ junjun abʼqʼi jatumel xi qʼamaʼn kye aj Israel tuʼn kyajbʼen oyaj lu kyuʼn tuʼn kyonin kyiʼj mebʼa moqa prow (Deuteronomio 14:28, 29; 26:12).

 ¿Alkye tten jaw tajlal diezmo? Kykyaqil abʼqʼi el kypaʼn aj Israel tlajin moqa 10% tiʼj tkyaqil kyawal jaw kychmoʼn (Levítico 27:30). Pero qa matoq txi kyqʼoʼn pwaq te diezmo, iltoq tiʼj tuʼn t-xi kyqʼoʼn 20% mas (Levítico 27:31). Ax ikx, iltoq tiʼj tuʼn t-xi kyqʼoʼn jun alumaj tiʼj lajaj «alumaj, qa wakẍ ex qa ẍneʼl» (Levítico 27:32).

 Tuʼn t-xi kyqʼoʼn aj Israel diezmo tiʼj kyalun, iltoq tiʼj tuʼn tjaw kyjyoʼn aju tlajin alumaj at toj corral. Tzaj tqʼamaʼn Ley qa mlaytoq bʼant tuʼn tok kykeʼyin qa bʼaʼn moqa nya bʼaʼn alumaj lu, nix tuʼn t-xi kyqʼoʼn juntl te t-xel. Ex mlaytoq txi kychjoʼn diezmo lu tukʼil pwaq (Levítico 27:32, 33). Atzun aju tkabʼ diezmo xi kyqʼoʼn aj Israel junjun abʼqʼi, jakutoq txi kychjoʼn tukʼil pwaq. Nim onin jlu kyiʼj aj Israel e tzaj najchaq tuʼnju nyatoq kwest tuʼn kypon kyoj ikʼsabʼil (Deuteronomio 14:25, 26).

 ¿Toj alkye ambʼil xi kyqʼoʼn aj Israel diezmo? Iltoq tiʼj tuʼn t-xi kyqʼoʼn kykyaqil abʼqʼi (Deuteronomio 14:22). Pero mintiʼtoq in bʼant jlu kyuʼn aj tjapun 7 abʼqʼi. ¿Tiquʼn? Tuʼnju ok abʼqʼi lu te año sabático, toj juntl yol, e ojlan aj Israel toj abʼqʼi lu ex mintiʼ e awan tiʼj kytxʼotxʼ (Levítico 25:4, 5). Tuʼntzunju, toj abʼqʼi aju mintiʼ xi kyqʼoʼn diezmo. Nya oʼkxju, tej tikʼ junjun oxe abʼqʼi tiʼjju wuq abʼqʼi lu, iltoq tiʼj tuʼn t-xi kyqʼoʼn aj Israel aju tkabʼin diezmo lu kye aj Leví ex kye qeju mintiʼ at kye (Deuteronomio 14:28, 29).

 ¿Alkye kastiw kubʼ qʼoʼn tej mintiʼ xi kychjoʼn diezmo? Mintiʼ tzaj tqʼamaʼn Tley Moisés jun kastiw. Tuʼnju teyele te junjun attoq toklen tuʼn t-xi tqʼoʼn jlu. In xitoq kyqʼamaʼn aj Israel te Dios qa otoq txi kyqʼoʼn diezmo te ex in xi kyqanin te tuʼn kytzaj kʼiwlaʼn tuʼn (Deuteronomio 26:12-15). Tej mintiʼ xi kychjoʼn aj Israel diezmo, ok ik tzeʼn in che elqʼantoq tiʼj Dios (Malaquías 3:8, 9).

 ¿Okpe diezmo te jun iqtz kyibʼaj aj Israel? Mintiʼ. Tzaj ttziyen Dios kye aj Israel qa tzultoq tqʼoʼn tkyaqilju at tajbʼen kye qa matoq txi kyqʼoʼn diezmo te (Malaquías 3:10). Pero tzaj nya bʼaʼn kyiʼj tej mintiʼ bʼant jlu kyuʼn. Mintiʼ e tzaj kʼiwlaʼn tuʼn Jehová ex mintiʼ onin kyaqʼun pal kyiʼj nix kyaqʼun aj Leví tuʼnju mintiʼ xi kyqʼoʼn diezmo (Nehemías 13:10; Malaquías 3:7).

 Kukxtoq in xi chjoʼn diezmo toj tqʼijlalil Jesús. Pero tej tkyim, el qʼiʼn toklen ley tiʼj diezmo.

Toj tqʼijlalil Jesús

 In tzaj tqʼamaʼn plaj Tyol Dios tok tbʼi ik tzeʼn Nuevo Testamento moqa Akʼaj Tuʼjil qa kukxtoq in xi kychjoʼn aj Israel diezmo toj tqʼijlalil Jesús, ex ojtzqiʼntoq tuʼn qa iltoq tiʼj tuʼn tbʼant jlu kyuʼn. Noqtzun tuʼnj, xi tkawin qe nejenel kye okslabʼil tuʼnju mastoq nim toklen diezmo toj kywitz ex xi tqʼamaʼn jlu kye: «Atzunju mas at toklen in tmaʼn tuj ley in kyaj kyqʼoʼne; mintiʼ in kybʼinchaʼne aju tzʼaqlxix, ex mintiʼ in qʼaqʼan kykʼuʼje kyiʼj xjal, ex mintiʼ in japun kyuʼne aju in xi kytziyane» (Mateo 23:23).

Tej otoqxi kyim Jesús

 El qʼiʼn toklen diezmo tej t-xi tqʼoʼn Jesús tchwinqlal qiʼj. Ax ikx naj toklen Tley Moisés ex ya nya iltoq tiʼj tuʼn tel qʼiʼn diezmo kyiʼj xjal (Hebreos 7:5, 18; Efesios 2:13-15; Colosenses 2:13, 14).