Nim xjal in kubʼ kyxjelin jlu tuʼnju tzaj nim bʼis kyiʼj tej kykubʼ bʼyoʼn aj Judiy, ex nya oʼkx kyaj tuʼn tok kybʼiʼn tzaqʼwebʼil tiʼj xjel, sino ax ikx kyaj qʼuqbʼil kykʼuʼj. Atzun junjuntl in kubʼ kyximen qa ok jlu te jun techel tiʼj nim nya bʼaʼn ex qa mintiʼ jun Dios jaku tzaj qʼonte ambʼil tuʼn tbʼaj jlu.

 Aju nya ax tok: Qa jun il aj tkubʼ qxjelin tiquʼn tzaj tqʼoʼn Dios ambʼil tuʼn kykubʼ bʼyoʼn nim aj Judiy.

 Aju ax tok: Nim xjal o kubʼ kyxjelin tiquʼn in tzaj tqʼoʼn Dios ambʼil te nya bʼaʼn. Jun techel, xi tqanin profeta Habacuc jlu te Dios: «¿Tiquʼn taja tuʼn tikʼ nwitze tiʼj yajbʼil ex mya bʼaʼn in kybʼinchaʼn xjal?» (Habacuc 1:3). Tej t-xi tqanin Habacuc jlu, mintiʼ kubʼ tqʼoʼn Dios tkastiw, sino tzaj tqʼoʼn ambʼil tuʼn tkyaj tzʼibʼin qe tyol toj Xjan Uʼj tuʼntzun tel qiʼn jun xnaqʼtzbʼil tiʼj.

 Aju nya ax tok: Mintiʼ in ximen Dios qiʼj aj qikʼ toj yajbʼil.

 Aju ax tok: In nel tikʼun Dios tkyaqil nya bʼaʼn ex aju bʼis in tzaj tiʼn qiʼj (Proverbios 6:16-19). In tzaj tqʼamaʼn Xjan Uʼj qa «tzaj taʼw tuj tanmi» Dios toj tqʼijlalil Noé tuʼnju ok tqʼoʼn twitz tiʼj nim nya bʼaʼn in bʼant kyuʼn xjal (Génesis 6:5, 6). Mintiʼ in chʼexpaj Dios, tuʼntzunju jaku txi qqʼamaʼn qa ax ikx tzaj tbʼis tej tok tkeʼyin nim nya bʼaʼn tej kykubʼ bʼyoʼn aj Judiy (Malaquías 3:6).

 Aju nya ax tok: Qa jun kastiw tuʼn Dios tej kykubʼ bʼyoʼn nim aj Judiy.

 Aju ax tok: Toj tnejel syent abʼqʼi, e ok tzoqpaj xjal te Roma tiʼj tnam Jerusalén ex tzaj tqʼoʼn Dios ambʼil tuʼn tbʼaj jlu (Mateo 23:37–24:2). Tibʼajxi jlu, mintiʼ in kubʼ tyekʼin qa mas tbʼanel in nela jun kʼloj xjal toj twitz. «Tuj twitz Dios mya part kyxilen xjal judiy kyukʼil qe xjal mya judiy» (Romanos 10:12).

 Aju nya ax tok: Noqwit ax tok kʼujlaʼn qe xjal tuʼn Dios, mintiʼwtlo tzaj tqʼoʼn ambʼil tuʼn kykubʼ bʼyoʼn xjal judiy.

 Aju ax tok: Nya tuʼn Dios in tzaj yajbʼil kyiʼj xjal, pero at maj in tzaj tqʼoʼn ambʼil te (Santiago 1:13; 5:11).

 At jun tiquʼn in tzaj tqʼoʼn Dios ambʼil tuʼn kyikʼ xjal toj yajbʼil, ex ax jlu bʼaj tej kykyim nim aj Judiy. In tzaj tqʼoʼn Dios ambʼil tuʼn kyikʼ xjal toj yajbʼil tuʼntzun tel qnikʼ tiʼj jun tiʼ. In tzaj tqʼamaʼn Xjan Uʼj qa a Tajaw il in kawin kyibʼaj xjal ex nya a Dios (Lucas 4:1, 2, 6; Juan 12:31). Ex in tzaj tqʼamaʼn Xjan Uʼj kabʼe xnaqʼtzbʼil, aqeju jaku che onin qiʼj tuʼn tel qnikʼ tiʼj tiquʼn tzaj tqʼoʼn Dios ambʼil tuʼn kykyim nim aj Judiy.

1.   Tej tkubʼ tbʼinchaʼn Dios qe xjal, tzaj tqʼoʼn tzaqpibʼil kye. Xi tqʼamaʼn Dios te Adán ex Eva tiʼtoq tuʼn tbʼant kyuʼn, pero mintiʼ ok t-obligarin kye tuʼn kynimen te. Ax Adán ex Eva kubʼ ximente alkye bʼaʼn ex alkye nya bʼaʼn, ex tuʼn jlu tzaj tiʼn nim bʼis kyiʼj xjal (Génesis 2:17; 3:6; Romanos 5:12). Atxix toj ambʼil aju, o tzaj nim yajbʼil kyiʼj xjal tuʼnju nya bʼaʼn in jaw kyjoʼn. Axpe ikx, in tzaj tqʼamaʼn uʼj Statement of Principles of Conservative Judaism (Declaración de principios del judaísmo conservador) jlu: «Chʼixmi tkyaqil maj, in tzaj yajbʼil kyiʼj xjal twitz tkyaqil Txʼotxʼ tuʼnju nya toj tumel in najbʼen tzaqpibʼil kyuʼn». Mintiʼ o tzʼel tiʼn Dios tzaqpibʼil kye xjal, sino in tzaj tqʼoʼn ambʼil kye tuʼn tkubʼ kyximen tiʼ kxel kybʼinchaʼn.

2.   At tipumal Dios tuʼn t-xi tbʼinchaʼn tiʼj nya bʼaʼn tzaj tej kykubʼ bʼyoʼn nim xjal aj Judiy ex taj tuʼn tbʼant jlu tuʼn. In tzaj ttziyen Dios qa che jawil anqʼin nim xjal tuʼn, axpe ikx qe aj Judiy e kubʼ bʼyoʼn. Ax ikx, kʼonil kyiʼj xjal tuʼn tikʼ tnaʼl tkyaqil nya bʼaʼn kyuʼn, aju ok kykeʼyin tej kykubʼ bʼyoʼn nim aj Judiy (Isaías 65:17; Hechos 24:15). Qʼuqli qkʼuʼj tiʼj qa kjapunel twi ttziybʼil Dios tuʼnju kʼujlaʼn qe xjal tuʼn (Juan 3:16).

 Nim xjal ok kykeʼyin nya bʼaʼn bʼaj tej kykubʼ bʼyoʼn aj Judiy, o kanet ttxolil kyanqʼibʼil ex at qʼuqbʼil kykʼuʼj. ¿Tiʼ onin kyiʼj? Onin kyiʼj tej tel kynikʼ tiʼj tiquʼn in tzaj tqʼoʼn Dios ambʼil te nya bʼaʼn ex tiʼ kbʼantel tuʼn tuʼn tel tiʼn yajbʼil.