In che onin tbʼanel qamiw tuʼn qtzalaj ex tuʼn tten tbʼanel qanqʼibʼil. Ax ikx, jaku che onin tuʼn tten tbʼanel qmod ex tuʼn qok te tbʼanel xjal (Proverbios 27:17).

 Noqtzun tuʼnj, in tzaj tqʼamaʼn Biblia qa nim toklen tuʼn tjaw qjyon qe tbʼanel qamiw ex in tzaj tqʼamaʼn tiʼ jaku tzaj qiʼj qa ma qo jyon kyiʼj nya bʼaʼn amiw (Proverbios 13:20; 1 Corintios 15:33). Qa ma tzʼok qamiwen qibʼ kyukʼil nya bʼaʼn amiw, jaku kubʼ qbʼinchaʼn junjun tiʼchaq nya toj tumel ex jaku che naj qe tbʼanel qmod.

Toj xnaqʼtzbʼil lu, kʼelel qnikʼ kyiʼj xjel lu:

•  ¿Tzeʼn jun tbʼanel amiw?

•  ¿Alkye junjun techel kyiʼj tbʼanel amiw in yolin Biblia tiʼj?

•  ¿Jakupe qo ok te tamiw Dios?

•  Junjun texto in che yolin kyiʼj amiw

 In tzaj tqʼamaʼn Biblia qa nya oʼkx il tiʼj tuʼn tten ax kymod ex qe tiʼchaq kygan kabʼe xjal kyamiw kyibʼ. Jun techel, in tzaj tqʼamaʼn Salmo 119:63 jlu: «Wamiw wibʼe kyukʼil qeju in che niman teya ex kyukʼil qeju in che japun qe tleya kyuʼn». a Tqʼama aj tzʼibʼil te salmo lu qa e jaw tjyoʼn qe tamiw in che kʼulin te Dios ex in xi kybʼin qe tkawbʼil.

 Ax ikx in tzaj qʼamaʼn toj Biblia alkyeqe tbʼanel tmod jun amiw il tiʼj tuʼn tten. Jun techel:

•   «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17).

•   «At junjun tamiw xjal in tzaj kyiʼn xitbʼil tiʼj, ex at junjun tamiw xjal mas mojl kykʼujlalil tukʼil twitz tkʼujlalil jun terman» (Proverbios 18:24).

 In tzaj kyyekʼin texto lu qa in kubʼ tyekʼin jun tbʼanel amiw tkʼujlabʼil, tbʼanel tmod ex qa bʼaʼn bʼinchaʼn xtalbʼil. In ten jun qamiw axix tok qukʼil aj qten toj bʼaʼn ex aj tzaj nya bʼaʼn qiʼj. Ax ikx tzul tqʼamaʼn qe qa at jun tiʼ nya toj tumel in kubʼ qbʼinchaʼn moqa nya bʼaʼn jun tiʼ in kubʼ qximen tuʼn tbʼant (Proverbios 27:6, 9).

 In yolin Biblia kyiʼj junjun xjal ok kyamiwen kyibʼ ex junxitl kytnam, kyabʼqʼi ex kyoklen. Qo yolin tiʼj oxe techel:

•   Rut ex Noemí. Maslo nya nim tabʼqʼi Rut twitz Noemí tuʼnju tlibʼ. Ex junxitl kytnam. Maske ikju, ten jun tbʼanel kyamiwbʼil ex ok kykʼujlan kyibʼ (Rut 1:16).

•   David ex Jonatán. Nejni Jonatán junlo 30 abʼqʼi twitz David, pero in tzaj tqʼamaʼn Biblia qa «ok tamiwin tibʼ Jonatán tukʼil David» (1 Samuel 18:1).

•   Jesús ex qe t-apóstol. Attoq toklen Jesús kyibʼaj t-apóstol tuʼnju a xnaqʼtzal kye ex kyajaw (Juan 13:13). Maske ikju, e ok qe t-apóstol te tamiw. Nya oʼkxju, ax ikx ok tamiwen tibʼ kyukʼil qeju tbʼanel ela t-xnaqʼtzbʼil toj kywitz. Tqʼama Jesús jlu: «Atzun kyeye ma tzʼok nqʼoʼne kybʼiye te wamiwoye, ex tkyaqilju o nbʼiye te Nmane, o txi ntxʼolbʼaʼne kyeye» (Juan 15:14, 15).

 Jaku. Jaku che ok xjal te tamiw Dios. In tzaj tqʼamaʼn Biblia jlu: «Atzun qeju in kybʼinchaʼn tzʼaqlxix, at tmojbʼabʼl tibʼ kyukʼil» (Proverbios 3:32). Toj juntl yol, in nok Dios te kyamiw qeju in nok tilil kyuʼn tuʼn kyok te tbʼanel xjal, tuʼn miʼn kysbʼun ex in nok tilil kyuʼn tuʼn tkubʼ kyanqʼin qe tkawbʼil. Jun techel, in tzaj qʼamaʼn toj Biblia qa ok Abrahán te tamiw Dios tuʼnju ten tzʼaqli twitz (2 Crónicas 20:7; Isaías 41:8; Santiago 2:23).