Maske ojtxe tkubʼlen bʼinchaʼn Biblia, jaku tzʼonin qiʼj tuʼnju ateʼ nabʼil toj. Ax ikx, in tzaj tqʼoʼn tzaqʼwebʼil kyiʼj xjel nim kyoklen ex in nonin tuʼn qtzalaj. Qo xnaqʼtzan kyiʼj junjun xjel lu:

1.   ¿Atpe jun Bʼinchal qe? At, in tzaj tqʼamaʼn Biblia qa a Dios «bʼinchante tkyaqil» (Apocalipsis 4:11). Tuʼnju a Bʼinchal qe, ojtzqiʼn tuʼn alkye aju at tajbʼen qe tuʼn qtzalaj.

2.   ¿In ximen Dios qiʼj? In ximen. Axpe ikx ik tzaj tqʼamaʼn Biblia jlu: «Ax tok ate Dios mya najchaq taʼ ttxlaj junjun qe» (Hechos 17:27). In nok tqʼoʼn twitz qiʼj, taj tuʼn qtzalaj ex tuʼn qten bʼaʼn (Isaías 48:​17, 18; 1 Pedro 5:7).

3.   Qa ma tzʼok wojtzqiʼne Dios, ¿tzeʼn jaku tzʼonin toj wanqʼibʼile? O kubʼ tbʼinchaʼn Dios tuʼn tel qnikʼ tiʼj qa «qa at tajbʼen Dios» qe, ax ikx tuʼn tel qnikʼ tiʼj tiʼ tajbʼen qchwinqlal (Mateo 5:3). A jlu in nonin qiʼj tuʼn tok qojtzqiʼn mas aju Bʼinchal qe ex tuʼn tten jun qamiwbʼil tukʼil. Tbʼanel in nela toj twitz Dios qa ma tzʼok tilil quʼn tuʼn tok qojtzqiʼn. In tzaj tqʼamaʼn Biblia: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

 Nim millón xjal o tzʼel kynikʼ tiʼj qa ma ten jun tbʼanel kyamiwbʼil tukʼil Dios, in nonin toj kyanqʼibʼil ex mas in che tzalaj. Ax tok, nya a t-xilen jlu qa aj tok qojtzqiʼn Dios ya mlaytl tzaj nya bʼaʼn qiʼj. Noqtzun tuʼnj, aqeju consej ateʼkux toj Biblia, jaku che onin qiʼj ik tzeʼn jlu:

•   Tuʼn qtzalaj kyukʼil toj qja.

•   Tuʼn tten mujbʼabʼil qxol kyukʼil txqantl.

•   Ex qa tok depresión qiʼj moqa in qo tzaj bʼaj tiʼj miʼn in kanin qpwaq ax ikx qa at yabʼil qiʼj.

 Ateʼ nim okslabʼil in najbʼen Biblia kyuʼn, pero mintiʼ in kubʼ kybʼinchaʼn aju in tzaj tqʼamaʼn. Atzun qe ateʼkx toj axix tok okslabʼil, in kubʼ kyanqʼin aju in tzaj tqʼamaʼn Biblia ex jaku tzʼonin tiʼja tuʼn tok tojtzqiʼnxixa Dios.