Jaku. In ximen Dios kyiʼj tmajen kukx in che ajbʼen te ex tok jun yabʼil kyiʼj. Tuʼntzunju in tzaj tziyen jlu toj Tyol: «Kxel tqʼoʼn Qman tipun ok ttzaj yabʼil tiʼj» (Salmo 41:3). Tzalu in tzaj qʼoʼn oxe onbʼil qe qa tok jun yabʼil qiʼj.

1.   Tuʼn t-xi qqanin qipumal te Dios tuʼn tikʼx quʼn. Kqebʼil qkʼuʼj «tuʼn Dios; mas maʼ t-xilen jlu twitz tkyaqil kynabʼl xjal» ex kʼonil qiʼj tuʼn miʼn ttzaj bʼajxix qkʼuʼj, ax ikx tzul tqʼoʼn qipumal tuʼn kukx tok tilil quʼn (Filipenses 4:6, 7).

2.   Tuʼn tten jun tbʼanel qximbʼetz. In tzaj tqʼamaʼn Tyol Dios jlu: «Qa at tzalajbʼil tuj tanmi xjal, a jlu mer ik tzaʼn jun qʼanbʼil te te, qatzun in bʼisun, in bʼaj tipun t-ximlal tuʼn» (Proverbios 17:22). Qa ma ten tbʼanel qximbʼetz, nya oʼkx kʼelel bʼis qiʼj tuʼn, ax ikx kʼonil tuʼn miʼn ttzajxix yabʼil qiʼj.

3.   Tuʼn tchʼiy qʼuqbʼil qkʼuʼj. In nonin qʼuqbʼil qkʼuʼj qiʼj tuʼn qtzalaj maske tok jun yabʼil qiʼj (Romanos 12:12). In tzaj ttziyen Tyol Dios qa kpol jun qʼij jatumel miʼn jun xjal tzul tqʼamaʼn: «Yabʼ qine, chiwt» (Isaías 33:24). Kʼelel tiʼn Dios tkyaqil yabʼil aju mintiʼ o bʼant tuʼn tel kyiʼn xjal at kyojtzqibʼil. Ax ikx, chebʼe chebʼe kʼelel tiʼn aju nya bʼaʼn o tzaj kyiʼj xjal aj kytijen, in tzaj tqʼamaʼn Tyol Dios jlu: «Kʼeleltzun yabʼil tiʼj ex kʼokel juntl maj ik tzaʼn tej kuʼxunxtoq» (Job 33:25).

 Tqanil. In nok qeʼ kykʼuʼj testigos de Jehová tiʼj onbʼil in tzaj tqʼoʼn Dios, noqtzun tuʼnj, ax ikx in qoʼxe kyukʼil doctor aj ttzaj jun yabʼil qiʼje (Marcos 2:17). Ex mintiʼ in xi qqʼamaʼne alkye qʼanbʼil tuʼn t-xi kykʼaʼn xjal, tuʼnju teyele junjun kbʼel t-ximen tiʼ kbʼantel tuʼn.