Nya tuʼn pwaq. Mintiʼ in tzaj tqʼamaʼn Tyol Dios qa nya bʼaʼn aju pwaq ex mintiʼ in tzaj tqʼamaʼn qa tuʼn pwaq in tzaj tkyaqil nya bʼaʼn. At jun yol in kyqʼamaʼn xjal kyjalu: «Tuʼn pwaq in tzaj tkyaqil nya bʼaʼn», ex in kubʼ kyximen xjal qa atz in jatz txol yol lu toj Tyol Dios. ¿Pero axpe tok jlu? Nya ikju. Tuʼnju in tzaj tqʼamaʼn Tyol Dios jlu: «Aju tuʼn tpon qkʼuʼj tiʼj pwaq, atzun tlokʼ tkyaqil mya bʼaʼn» (1 Timoteo 6:10).

•  ¿Tiʼ in tzaj tqʼamaʼn Tyol Dios tiʼj pwaq?

•  ¿Tiquʼn nya bʼaʼn tuʼn tpon qkʼuʼj tiʼj pwaq?

•  Aqeju tbʼanel in tzaj aj tkubʼ qbʼinchaʼn aju in tzaj tqʼamaʼn Tyol Dios

•  Aqeju nabʼil in tzaj tqʼamaʼn Tyol Dios tiʼj alkye tten tuʼn tajbʼen pwaq

 In tzaj tqʼamaʼn Tyol Dios qa ma tzʼajbʼen pwaq quʼn toj tumel jaku tzʼonin qiʼj, axpe ikx, jaku qo ok xqʼuqin tuʼn (Eclesiastés 7:12). Ax ikx, in yolin Tyol Dios bʼaʼn kyiʼj xjal bʼaʼn che qʼon oyaj ex in che onin kyiʼj txqantl tukʼil kypwaq (Proverbios 11:25).

 Noqtzun tuʼnj, tenx qnabʼil, tuʼnju in tzaj tnaʼn Tyol Dios qe qa mintiʼ tuʼn tok qqʼoʼn pwaq te mas nim toklen toj qanqʼibʼil. In tzaj tqʼamaʼn Hebreos 13:5 jlu: «Miʼn pon kykʼuʼje tiʼj pwaq; che tzalaje tiʼj chʼin at kyeye jaʼlo». ¿Tiʼ in tzaj tyekʼin jlu qe? Qa at tajbʼen pwaq, noqtzun tuʼn, mintiʼ tuʼn tok te mas nim toklen. Aju tuʼn tbʼant quʼn, aju tuʼn qtzalaj tiʼjju at-xix tajbʼen qe ik tzeʼn qwa, qxbʼalun ex jun qja (1 Timoteo 6:8).

 Aqeju xjal in pon kykʼuʼj tiʼj nim pwaq mlay che anqʼin te jumajx (Efesios 5:5). Tnejel, tuʼnju in nok jlu te jun kʼulbʼil (Colosenses 3:5). Ex tkabʼin, tuʼn tkambʼet aju kyajbʼil ya mintiʼ in kubʼ kybʼinchaʼn xjal lu aju bʼaʼn. In tzaj tqʼamaʼn Proverbios 28:20 qa aju xjal taj tuʼn tok naj te qʼinun, ok kbʼel tbʼinchaʼn nya bʼaʼn. Aqeju xjal lu, jaku che elqʼan, jaku che sbʼun, jaku tzʼel kyqanin pwaq kye txqantl, axpe ikx jaku txi kysecuestrarin moqa jaku kubʼ kybʼyoʼn jun xjal.

 Ex maske mintiʼ xbʼant jun tiʼ nya bʼaʼn quʼn, pero qa ma tzʼok qkʼujlaʼn pwaq jaku tzaj tiʼn nim nya bʼaʼn qiʼj. In tzaj tqʼamaʼn Tyol Dios jlu: «Aqeju kyaj tuʼn kyok qʼinun, in che ok tuj joybʼil kyiʼj ex in che kubʼ tzʼaq tuj kʼobʼil, tuʼnju in pon kykʼuʼj tiʼj nimku mintiʼ tajbʼen, ex in che kʼixbʼi tuʼn» (1 Timoteo 6:9).

 Qa kukx ma txi qnimen aju t-xim Dios tiʼj jlu ex qa mintiʼ xkubʼ qbʼinchaʼn jun nya bʼaʼn noq tuʼn tkambʼet pwaq, mlay naj qoklen ex kukx ktzalajel Dios qiʼj. Nya oʼkxju, ax ikx qa ma tzʼok tilil quʼn tuʼn qximen tiʼj Dios, in tzaj ttziyen jlu qe: «Mlay kyaj nkoline, ex mlay kyaj nqʼoʼne» (Hebreos 13:5, 6). Ax ikx, in tzaj tqʼamaʼn jlu qe te qʼuqbʼil qkʼuʼj: «Aju xjal axix tok yolin, kbʼel kyʼiwlaʼn nimxix» (Proverbios 28:20).