Mintiʼ jun taqikʼ Tyol Dios in yolin tiʼjju aj tel tiʼn jun xuʼj moqa qya tal. Pero ateʼ junjun versículo in tzaj kyyekʼin tiʼ t-ximbʼetz Dios at tiʼj chwinqlal, axpe ikx aju kychwinqlal tal neʼ moqa neʼẍ naʼmx kyul itzʼj.

 Jun oyaj qchwinqlal tuʼn Dios (Génesis 9:6; Salmo 36:9). Nim toklen tkyaqil chwinqlal toj twitz Dios, ax ikx tchwinqlal jun tal neʼ at toj talbʼil ttxuʼ. Tuʼntzunju, qa at jun xjal ma tzʼel tiʼn tchwinqlal jun tal neʼ naʼmxtoq tul itzʼj, axju in bʼant tuʼn ik tzeʼn qa ma kubʼ tbʼyon jun xjal.

 Toj Ley xi tqʼoʼn Dios kye aj Israel, tqʼama jlu: «Qa ma che jaw qʼojl xinaq, ex tkʼulbʼaku ma tzaʼw jun xuʼj kyuʼn, aju otoq tzʼok ten tal, ex qa tuʼn jlu ma tzʼel tal, ex qa mintiʼ ma kyim xuʼj, kʼelel tmult xjal otoq tzaʼw xuʼj tuʼn, ik tzaʼn tajlal ok ttzaj tqanin chmilbʼaj ex ik tzaʼn ok kymaʼ jwes. Qatzun ma kʼixbʼi xuʼj, il tiʼj kchjetel tuʼnju xinaq otoq kʼixbʼisante te. Qa ma kyim xuʼj tuʼn, ax ikx te il tiʼj tuʼn tkyim» (Éxodo 21:22, 23). a

•  ¿Alkye ambʼil in xi tzyet tanqʼibʼil jun xjal?

•  ¿Jakupe kubʼ tnajsaʼn Dios til jun xuʼj o tzʼel tiʼn tal?

•  Yajtzun qa jaku kyim txubʼaj moqa tal neʼ, ¿jakupe txi qʼamet qa jun il aj tel qʼiʼn tchwinqlal tal neʼ?

 Toj twitz Dios, in xi tzyet tchwinqlal jun xjal aj tok ten tal jun xuʼj. Toj Biblia, in nok tqʼoʼn Dios jun tal neʼ naʼmx tul itzʼj ik tzeʼn jun xjal. Toj twitz Dios, junx taʼ tchwinqlal jun tal neʼ naʼmx tul itzʼj tukʼilju tal neʼ tzma in nul itzʼj. Qo xnaqʼtzan kyiʼj junjun techel jatumel in tzaj yekʼin jlu.

•   Ax Dios onin tiʼj aj kawil David tuʼn t-xi tqʼamaʼn jlu te: «Tilya tej intoq tbʼinchaʼntibʼjuʼ nxmilaleʼ tuʼn tchʼiy» (Salmo 139:16, XT). Tuʼntzunju, toj twitz Dios, ya otoq tzʼok David te jun xjal tej naʼmxtoq tul itzʼj.

•   Qo xnaqʼtzan tiʼj jun techel. Ya otoq bʼaj t-ximen Dios tiʼ aqʼuntl tuʼn t-xi tbʼinchaʼn Jeremías tej naʼmxtoq tul itzʼj. Xi tqʼamaʼn Dios jlu te: «Naʼnxtoq tok tena tuj talbʼil ttxuʼya ya otoq jaw nskʼoʼna, ex naʼnxtoq tul itzʼja ya otoq tzʼel npaʼna, ex bʼiʼx bʼanimaj wuʼne tuʼn toka te nsanjele, tuʼn t-xi tmaʼna nyole kye xjal ateʼ kyuj txqantl nasyon» (Jeremías 1:5).

•   Ax yol griego ajbʼen tuʼn Lucas, jun aj tzʼibʼil tiʼj Tyol Dios ex aj qʼanil, tej tyolin tiʼj jun tal neʼ naʼmxtoq tul itzʼj ex tej tyolin tiʼj jun tal neʼ tzmatoq in nul itzʼj (Lucas 1:41; 2:12, 16).

 Jaku. Jaku kubʼ tnajsaʼn Dios kyil xuʼj o tzʼel kyiʼn kyal. Qa ma ten kyximbʼetz tiʼj chwinqlal ik tzeʼn te Dios, mintiʼ tuʼn tkubʼ kynaʼn nya bʼaʼn tiʼjju otoq bʼant kyuʼn. In tzaj tqʼamaʼn Tyol Dios jlu: «In qʼaqʼan tkʼuʼj Qman qiʼj ex in tzʼeʼy tkʼuʼj qiʼj [...]. Ik tzaʼn tjawitz qʼij ex telex qʼij najchaq kyxol, ax ikxtzun qe qil najchaq ma tzʼel tlaqʼbʼaʼn Dios qiʼj» (Salmo 103:8-12). In kubʼ tnajsaʼn Dios kyil xjal qa ax tok ma tzʼajtz tiʼj kyanmi, ax ikx qeju xuʼj o tzʼel kyiʼn kyal (Salmo 86:5).

 In tzaj tqʼamaʼn Tyol Dios qa nim toklen tchwinqlal jun tal neʼ naʼmx tul itzʼj, tuʼntzunju, mlay txi qʼamet qa toj tumel aj tel qʼiʼn tal jun xuʼj maske jaku tzaj jun nya bʼaʼn tiʼj moqa tiʼj tal.

 ¿Yajtzun qa akux in nul itzʼj tal neʼ in tzaj kyqʼamaʼn doctor qa at jun nya bʼaʼn ex il tiʼj tuʼn tkubʼ ximet alkye kjel anqʼin? Nya tkyaqil maj in bʼaj jlu, pero qa ma bʼaj, oʼkx qeju at kyoklen tiʼj jlu kbʼel kyximen alkye kjel anqʼin.