Tej otoqxi kubʼ tbʼinchaʼn Dios tnejel xinaq moqa ichan ex tnejel xuʼj, e kubʼ tmojbʼaʼn. Tzaj tqʼoʼn mejebʼleʼn tuʼntzun tok tmojbʼaʼn tibʼ jun xinaq tukʼil jun xuʼj ex tuʼn jlu jaku che ten familia (Génesis 1:27, 28; 2:18).

 Taj Dios tuʼn kytzalaj mejebʼleʼn (Proverbios 5:18). Tuʼntzunju, in tzaj tqʼoʼn consej ex nabʼil toj Biblia tuʼntzun tel bʼaʼn jun mejebʼleʼn.

Toj xnaqʼtzbʼil lu, kʼelel qnikʼ kyiʼj xjel lu:

•  ¿Alkyeqe kawbʼil o tzaj tqʼoʼn Dios tiʼj mejebʼleʼn?

•  ¿Tiʼ t-ximbʼetz Dios kyiʼj mejebʼleʼn in nel kypan kyibʼ ex in che divorciarin?

•  ¿Ilpe tiʼj tuʼn kyxiʼ kabʼe xjal tzʼibʼil kymejebʼleʼn twitz ley tuʼntzun tel bʼaʼn kymejebʼleʼn toj twitz Dios?

•  Ik tzeʼn in tzaj tqʼamaʼn Biblia, ¿tiʼ il tiʼj tuʼn tbʼant tuʼn chmilbʼaj ex xuʼjilbʼaj?

•  ¿In tzajpe tqʼamaʼn Dios qa il tiʼj tuʼn tten kykʼwal qeju o che kubʼ mojeʼ?

•  ¿Jakupe tzʼonin Biblia tiʼj nmejebʼleʼne?

•  Junjun texto in che yolin tiʼj mejebʼleʼn

 Kukx o ten t-ximbʼetz Dios tuʼn tmojeʼ jun xinaq tukʼil jun xuʼj (Génesis 2:24). Nya bʼaʼn in ela toj twitz Dios tuʼn tten nim t-xuʼjil jun xjal, tuʼn tten jun xinaq tukʼil juntl xinaq ex nya tgan qa nya casad qe xjal (1 Corintios 6:9; 1 Tesalonicenses 4:3). Xi t-xnaqʼtzan Jesús kye t-xnaqʼtzbʼen tuʼn t-xi kynimen qe tkawbʼil Dios tiʼj mejebʼleʼn (Marcos 10:6-8).

 Nya te jun rat mejebʼleʼn toj twitz Dios. Aj tkubʼ mojeʼ jun xinaq tukʼil jun xuʼj in xi kytziyen jun kyyol tuʼn kyten tzʼaqli ex tuʼn kyanqʼin junx akux itzʼqe. Taj Dios tuʼn tjapun twi kyyol in xi kytziyen (Marcos 10:9).

 Atlo maj mlay ten chmilbʼaj tukʼil t-xuʼjil toj jun ambʼil, jun techel, qa noq minabʼen saj qʼamaʼn tuʼn t-xi jun kye kyxol xqʼuqil jun tfamiliar. Pero mintiʼ in tzaj tqʼamaʼn Biblia tuʼn tel kypan kyibʼ jun mejebʼleʼn aj tzaj jun nya bʼaʼn. Sino aju in tzaj tqʼamaʼn aju tuʼn tok tilil kyuʼn tuʼn tkubʼ naj nya bʼaʼn kyxol (1 Corintios 7:10).

 In tzaj tqʼamaʼn Biblia qa oʼkx jaku che divorciarin jun mejebʼleʼn qa at jun kyxol ma kubʼ tjyoʼn juntl (Mateo 19:9). Tuʼntzunju, qa ma kubʼ kyximen qeju o che kubʼ mojeʼ tuʼn tel kypan kyibʼ moqa tuʼn tkubʼ kydivorciarin kyibʼ noq tuʼn juntl alkyexku tiʼ, ni jun kye jaku casarin tukʼil juntl (Mateo 5:32; 1 Corintios 7:11).

 Taj Dios tuʼn t-xi kynimen okslal aqeju tley o che kubʼ tqʼoʼn tiʼj mejebʼleʼn (Tito 3:1). Il tiʼj tuʼn tok tilil kyuʼn kabʼe xjal tuʼn tokx kytzʼibʼin kymejebʼleʼn twitz ley. Qa ma bʼant jlu kyuʼn, in kubʼ kyyekʼin qa in nok kyqʼoʼn kyoklen aj kawil ex qa ax kyximbʼetz ik tzeʼn te Dios tiʼj mejebʼleʼn tuʼn kukx kyten junx. a

•   Aju il tiʼj tuʼn tbʼant kyuʼn kykabʼil. Il tiʼj tuʼn tkubʼ tyekʼin chmilbʼaj ex xuʼjilbʼaj kʼujlabʼil kyxolx ex tuʼn tok kyqʼoʼn kyoklen kyxolx (Efesios 5:33). Il tuʼn tkubʼ kyyekʼin kykʼujlabʼil aj kykubʼ ten junx ex tuʼn kyten tzʼaqli toj tkyaqil tten kyanqʼibʼil (1 Corintios 7:3; Hebreos 13:4). Qa ateʼ kykʼwal il tiʼj tuʼn kyonin kykabʼil tuʼn kychʼiyset (Proverbios 6:20).

   ¿Ex alkyetzun kʼelex aqʼunal ex alkye kxel bʼinchante aqʼuntl toj ja? Mintiʼ in tzaj tqʼoʼn Biblia tkyaqil tzaqʼwebʼil tiʼj jlu. Teyelex te junjun mejebʼleʼn kbʼajel t-ximen alkye mas kye toj tja.

•   Aju il tiʼj tuʼn tbʼant tuʼn chmilbʼaj. In tzaj tqʼamaʼn Biblia qa «ate xinaq nejenel te xuʼj» (Efesios 5:23). A t-xilen jlu, qa il tiʼj tuʼn tonin kyiʼj toj tja ex tuʼn tjaw tjyoʼn alkye mas bʼaʼn te t-xuʼjil ex kye tkʼwal.

   Il tiʼj tuʼn t-xqʼuqin tuʼn kywan qe toj tja, tuʼn kytzalaj ex tuʼn kyxnaqʼtzan tiʼj Tyol Dios (1 Timoteo 5:8). Qa ma tzʼaqʼunan junx tukʼil t-xuʼjil, qa ma txi tbʼiʼn aju in tzaj tqʼamaʼn ex qa in nok tqʼoʼn toklen aju in kubʼ tnaʼn aj tkubʼ t-ximen tuʼn tbʼant jun tiʼ tuʼn, in kubʼ tyekʼin qa nim toklen tmod ex aju in bʼant tuʼn (Proverbios 31:11, 28). In tzaj tqʼamaʼn Biblia qa il tiʼj tuʼn tjapun toklen chmilbʼaj tukʼil kʼujlabʼil (Colosenses 3:19).

•   Aju il tiʼj tuʼn tbʼant tuʼn xuʼjilbʼaj. In tzaj qʼamaʼn jlu toj Biblia: «Ax ikx te xuʼj nimanx tchmil» (Efesios 5:33). Tbʼanel in nela toj twitz Dios qa in ok kyqʼoʼn xuʼj kyoklen chmilbʼaj o tzaj qʼoʼn.

   Taj Dios tuʼn kyonin xuʼjilbʼaj tiʼj kychmil tuʼn tjaw kyjyoʼn aju mas bʼaʼn ex tuʼn kyonin tiʼj toklen te wibʼaj kye toj tja (Génesis 2:18). In yolin Biblia bʼaʼn kyiʼj xuʼj in japun kyoklen kyuʼn toj mejebʼleʼn (Proverbios 31:10).

 Mintiʼ. Maske toj ambʼil ojtxe tzaj tqʼamaʼn Dios kye junjun xjal tuʼn tten kykʼwal, pero toj ambʼil jaʼlo nya il tiʼj tuʼn tbʼant jlu kyuʼn okslal (Génesis 1:28; 9:1). Mintiʼ xi tqʼamaʼn Jesús kye t-xnaqʼtzbʼen tuʼn tten kykʼwal. Ax ikx qeju tnejel t-xnaqʼtzbʼen Jesús mintiʼ xi kyqʼamaʼn kye qeju otoq che kubʼ mojeʼ tuʼn tten kykʼwal. Teyele te junjun mejebʼleʼn kbʼajel t-ximen qa ktel kykʼwal moqa miʼn.

 Jaku, tuʼnju toj Biblia jaku che kanet qe consej ex qe nabʼil tuʼn tten jun tbʼanel qmejebʼleʼn, tuʼn tonin qiʼj aj kytzaj nya bʼaʼn ex tuʼn qex kywitz.

 Jaku tzʼonin Biblia kyiʼj mejebʼleʼn tuʼn tbʼant jlu:

•   Tuʼn tkubʼ kyyekʼin kʼujlabʼil axix tok (1 Corintios 13:4-7; Colosenses 3:14).

•   Tuʼn tok tilil tuʼn tkubʼ kyiʼj nya bʼaʼn kyuʼn (1 Corintios 10:24).

•   Tuʼn tok kyqʼoʼn kywiʼ tiʼj kyyol aj kyyolin kyxolx (Santiago 1:19).

•   Tuʼn kyrespetarin te kyibʼ (Romanos 12:10).

•   Tuʼn tkubʼ kynajsaʼn kyil kyxolx (1 Pedro 4:8).

•   Tuʼn kyten tzʼaqli (Marcos 10:9).

•   Tuʼn tten kypasens (Efesios 4:2, 3).

•   Tuʼn kyaqʼunan junx (Eclesiastés 4:9).

•   Tuʼn tok tilil kyuʼn tuʼn tkyuwset kymejebʼleʼn (El Cantar de los Cantares 8:7).