Maske in kubʼ t-ximen jun xjal qa at jun tiquʼn tuʼn taj tqʼoʼn t-xel nya bʼaʼn tiʼj juntl, mintiʼ in tzaj tqʼoʼn Tyol Dios ambʼil te tuʼn tbʼant jlu tuʼn. In tzaj tqʼamaʼn jlu: «Miʼn kubʼ t-ximana tuʼn taj tqʼoʼna t-xel mya bʼaʼn, mi tuʼn tbʼinchanteya tiʼj juntl ik tzaʼnx otoq tbʼincha tiʼja» (Proverbios 24:29). O che onin consej tkuʼx toj Tyol Dios kyiʼj nimku xjal tuʼn miʼn taj kyqʼoʼn t-xel nya bʼaʼn o tzʼok bʼinchaʼn kyiʼj.

Toj xnaqʼtzbʼil lu, kʼelel qnikʼ tiʼj jlu:

•  ¿Tiquʼn nya toj tumel tuʼn tkubʼ qximen tuʼn taj qqʼoʼn t-xel nya bʼaʼn?

•  ¿Tiʼ in bʼant tuʼn Dios tuʼn tkubʼ tqʼoʼn kykastiw qeju in nok kybʼinchaʼn nya bʼaʼn qiʼj?

•  ¿Tiʼ jaku tzʼonin qiʼj tuʼn miʼn taj qqʼoʼn t-xel nya bʼaʼn?

•  Qe ximbʼetz nya toj tumel tiʼjju tuʼn taj qqʼoʼn t-xel nya bʼaʼn

 Toj tumel aj ttzaj qqʼoj ex aj tkubʼ qximen tuʼn taj qqʼoʼn t-xel jun nya bʼaʼn aj tok bʼinchaʼn qiʼj. Noqtzun tuʼnj, mintiʼ in tzaj tqʼoʼn Tyol Dios ambʼil tuʼn taj qqʼoʼn t-xel nya bʼaʼn. ¿Tiquʼn?

 Nya bʼaʼn in nel toj twitz Dios tuʼn taj kyqʼoʼn xjal t-xel nya bʼaʼn in nok bʼinchaʼn kyiʼj. In tzaj tqʼamaʼn Jehová jlu qe toj Tyol: a «Wuʼne kʼajel t-xel; aqine chin qʼolte castiw» (Romanos 12:19). In tzaj tqʼoʼn Tyol Dios txokbʼil qiʼj tuʼn miʼn taj qqʼoʼn t-xel nya bʼaʼn ex tuʼn tok tilil quʼn tuʼn tten mujbʼabʼil qxol kyukʼil txqantl (Romanos 12:18). ¿Tiʼ jaku bʼant quʼn qa mintiʼ in kyaj jun nya bʼaʼn toj ttxolil maske toj tumel in xi qbʼinchaʼn tiʼj? ¿Moqa tiʼ jaku bʼant quʼn qa mintiʼ in kanet jun tumel quʼn tuʼn tkyaj toj ttxolil? Toj ambʼil lu, in tzaj tqʼamaʼn Tyol Dios tuʼn tok qeʼ qkʼuʼj tiʼj Jehová qa kxel tbʼinchaʼn aju tzʼaqli (Salmo 42:10, 11).

 Toj ambʼil jaʼlo, in tzaj tqʼoʼn Dios ambʼil te gobierno tuʼn tkubʼ tqʼoʼn kykastiw qeju in kubʼ kybʼinchaʼn nya bʼaʼn (Romanos 13:1-4). Atzun toj ambʼil tzul, kbʼel tqʼoʼn kykastiw qeju in nok kybʼinchaʼn nya bʼaʼn kyiʼj txqantl ex mlay txi tqʼoʼn ambʼil tuʼn ttzaj qbʼis (Isaías 11:4).

•   Miʼn kubʼ tbʼinchaʼna jun tiʼ aj ttzaj tqʼoja (Proverbios 17:27). Chʼixme tkyaqil maj, in tzaj qbʼis kyiʼj tiʼchaq in che bʼant quʼn aj ttzaj qqʼoj. Pero qa ma qo ximen tnejel tiʼjju kxel qbʼinchaʼn, kjawel qskʼoʼn aju mas tbʼanel (Proverbios 29:11).

•   Jyona tqanil tiʼj tiquʼn ok bʼinchaʼn nya bʼaʼn tiʼja (Proverbios 18:13). Qa o tzʼok bʼinchaʼn jun nya bʼaʼn tiʼja, xjelinkuya jlu: «Ojtzqiʼnpe tkyaqil tqanil wuʼne tiʼj tiquʼn ok tbʼinchaʼn xjal nya bʼaʼn wiʼje? ¿Bʼantpe tuʼn tuʼnju in tzaj bʼajtoq tkʼuʼj? ¿Noqpe el tzpet tej tbʼant jlu tuʼn?». At maj, jaku kubʼ qnaʼn qa kubʼ t-ximen jun xjal tuʼn tok tbʼinchaʼn jun nya bʼaʼn qiʼj, pero noq el tzpet.

 Aju in kubʼ kyximen junjun xjal: Tuʼnju mintiʼ in tzaj tqʼoʼn Tyol Dios ambʼil tuʼn taj qqʼoʼn t-xel jun nya bʼaʼn, mlay bʼant jun tiʼ quʼn aj qok kʼixbʼisaʼn.

 Aju axix tok: Qa in nok bʼinchaʼn jun nya bʼaʼn tiʼj jun xjal, jaku txi tjyoʼn tumel tuʼn tklet ex jaku t-xi tjyoʼn onbʼil kyukʼil polisiy. Pero in tzaj tqʼamaʼn Tyol Dios tuʼn tok tilil quʼn tuʼn miʼn qok ten ilil kyukʼil txqantl (Proverbios 17:14).