¿Tiʼ in tzaj tqʼamaʼn Tyol Dios kyiʼj txʼuʼj yabʼil?

TUʼN TOK QBʼIʼN TOJ

Aju in tzaj ttzaqʼweʼn Tyol Dios

In tzaj tqʼamaʼn Tyol Dios qa kyoj bʼajsbʼil tqʼijlalil che teltoq yabʼil ex txʼuʼj yabʼil twitz tkyaqil Txʼotxʼ (Lucas 21:11). Mintiʼ in che ajbʼen txʼuʼj yabʼil tuʼn Dios tuʼn tkubʼ tqʼoʼn kykastiw xjal. Axpe ikx kʼajbʼel Tkawbʼil tuʼn tuʼn tkubʼ tnajsaʼn qe yabʼil, qe txʼuʼj yabʼil moqa pandemia.

¿Kyajpe tqʼamaʼn Tyol Dios tuʼn kytzaj txʼuʼj yabʼil?

Mintiʼ kyaj tqʼamaʼn Xjan Uʼj alkyeqe yabʼil ex qe pandemia tuʼn kytzaj, ik tzeʼn COVID-19, sida ex gripe española, pero kyaj tqʼamaʼn qa che ultoq «txʼuʼj yabʼil» (Lucas 21:11; Apocalipsis 6:8). Kykyaqil yabʼil lu in che ok te techel qa in qo anqʼin kyoj «mankbʼil tqʼijlalil» (2 Timoteo 3:1; Mateo 24:3).

¿Ope tzʼajbʼen txʼuʼj yabʼil tuʼn Dios tuʼn tkubʼ tqʼoʼn kykastiw xjal?

In tzaj tqʼamaʼn Tyol Dios qa at maj ajbʼen txʼuʼj yabʼil tuʼn Dios tuʼn tkubʼ tqʼoʼn kykastiw xjal. Jun techel, tzaj tqʼoʼn lepra kyiʼj junjun xjal (Números 12:1-16; 2 Reyes 5:20-27; 2 Crónicas 26:16-21). Pero mintiʼ tzaj tqʼoʼn Dios txʼuʼj yabʼil lu kyiʼj tbʼanel xjal, sino oʼkx kyiʼj qeju e ok meltzʼaj tiʼj.

¿Junpe kastiw qe txʼuʼj yabʼil tuʼn Dios?

Miʼn. Ateʼ junjun xjal in tzaj kyqʼamaʼn qa in che ajbʼen txʼuʼj yabʼil tuʼn Dios tuʼn tkubʼ tqʼoʼn kykastiw xjal. Noqtzun tuʼnj, mintiʼ in tzaj tqʼamaʼn Tyol Dios jlu. ¿Tiquʼn in xi qqʼamaʼn jlu?

Ateʼ junjun tmajen Dios te ambʼil ojtxe ex te ambʼil jaʼlo in tzaj yabʼil kyiʼj. Jun techel, in tzaj tqʼamaʼn Tyol Dios qa kukx tzaj yabʼil tiʼj jun okslal Timoteo tbʼi (1 Timoteo 5:23). Pero mintiʼ in tzaj tqʼamaʼn qa bʼaj jlu tuʼnju tzaj tqʼoj Dios tiʼj. Ax ikx toj ambʼil jaʼlo, in tzaj junxichaq yabʼil kyiʼj junjun tmajen Dios. Nim maj, in tzaj yabʼil kyiʼj xjal tuʼnju in nel kyiqen moqa tuʼnju ateʼ toj nya bʼaʼn lugar (Eclesiastés 9:12).

Ax ikx, in tzaj t-xnaqʼtzaʼn Xjan Uʼj qa naʼmx tpon ambʼil tuʼn tkubʼ tqʼoʼn Dios kykastiw nya bʼaʼn xjal. Sino in qo anqʼin toj «tqʼijlalil kolbʼil», toj juntl yol, aju ambʼil jatumel in xi tqʼoʼn Dios txokbʼil kye xjal tuʼn kyok laqʼeʼ ttxlaj tuʼntzun kyklet (2 Corintios 6:2). Jun tumel tzeʼn in xi tqʼoʼn Dios txokbʼil kyiʼj xjal, aju aj kyajbʼen tmajen tuʼn tuʼn kypakbʼan tiʼj tbʼanel tqanil twitz tkyaqil Txʼotxʼ (Mateo 24:14).

¿Kpolpe jun qʼij jatumel ya mlay tzaj txʼuʼj yabʼil kyiʼj xjal?

Ok. In tzaj tqʼamaʼn Tyol Dios qa kpol jun ambʼil jatumel ni jun xjal tzul yabʼil tiʼj. Aj qanqʼin tjaqʼ Tkawbʼil Dios, kʼelel tiʼn tkyaqil yabʼil (Isaías 33:24; 35:5, 6). Ax ikx kʼelel tiʼn yajbʼil, kʼixkʼoj ex kamik (Apocalipsis 21:4). Ex tuʼn Tkawbʼil Dios che jawil anqʼin xjal o che kyim, ex che tzalajel tiʼj kyanqʼibʼil toj Tbʼanel Najbʼil tzalu twitz Txʼotxʼ (Salmo 37:29; Hechos 24:15).

Qe taqikʼ Tyol Dios in yolin kyiʼj yabʼil

Mateo 4:23: «Bʼajtzun tbʼetin Jesús tuj tkyaqil Galilea in tqʼoʼn xnaqʼtzbʼil kyuj ja te kʼulbʼil kye judiy, in pakbʼan tiʼj tqanil bʼaʼn tiʼj tkawbʼil Dios, ex in che bʼanix qe yabʼ tuʼn noq alkyex kyyabʼil, kyukʼix qe xjal at kʼixkʼoj kyiʼj».

Aju t-xilen: Tej tkubʼ tqʼanin Jesús qe xjal tok yabʼil kyiʼj tej tten tzalu twitz Txʼotxʼ, kubʼ techlaʼn aju kbʼantel tuʼn Tkawbʼil Dios kyiʼj kykyaqil xjal toj chʼintl ambʼil.

Lucas 21:11: «Ktzajel [...] txʼuʼj yabʼil noq jachaq».

Aju t-xilen: Jun kyxol qe tiʼchaq tuʼn kybʼaj kyoj bʼajsbʼil tqʼijlalil, aju tuʼn kytzaj txʼuʼj yabʼil twitz tkyaqil Txʼotxʼ.

Apocalipsis 6:8: «Ex o wile, lu jun chej qʼan tiʼj, ex at jun xjal tjax tibʼaj, tok tbʼi Kamik, ex lepchix t-xiʼ kynajbʼil kyimni tiʼj; ex xi qʼoʼn toklen tiʼj tkyajin tnej xjal twitz txʼotxʼ tuʼn kykyim tuj qʼoj, tuʼn weʼyaj, tuʼn txʼuʼj yabʼil».

Aju t-xilen: Aju yol kyaj qʼamaʼn kyiʼj kyaje xjal in che chejin, aju tkuʼx toj uʼj te Apocalipsis, in tzaj tyekʼin qa tuʼn ttzaj nim yabʼil toj ambʼil jaʼlo.