Qa taja tuʼn toka te tamiw Dios, tnejel il tiʼj tuʼn tok tojtzqiʼna ex tuʼn t-xi tbʼinchaʼna qe tiʼchaq bʼaʼn in che ela toj twitz. Qa ma bʼant jlu tuʼna, tzul laqʼeʼ Dios ttxlaja (Santiago 4:8). In tzaj tqʼamaʼn Biblia jlu: «Ate Dios mya najchaq taʼ ttxlaj junjun qe» (Hechos 17:27).

•  ¿Tiʼ il tiʼj tuʼn tbʼant tuʼna tuʼn toka te tamiw Dios?

•  Junjun nya ax tok xnaqʼtzbʼil tiʼj qamiwbʼil tukʼil Dios

 Uʼjinktza Tyol Dios

•  Aju in tzaj tqʼamaʼn Tyol Dios: «Tkyaqil aju tzʼibʼan tuj Tuʼjil, a Dios o qʼmante» (2 Timoteo 3:16).

•  Aju t-xilen: T-ximbʼetz Dios tkuʼx toj Biblia. Kubʼ tqʼoʼn t-ximbʼetz toj kywiʼ junjun xjal tuʼntzun tkubʼ kytzʼibʼin. In tzaj tqʼamaʼn Biblia tzeʼn taj Dios tuʼn qanqʼin ex in tzaj tqʼamaʼn tzeʼn tmod. Jun techel, in tzaj tqʼamaʼn qa at tkʼujlabʼil, qa tzʼaqli te ex qa in kubʼ tyekʼin qʼaqʼbʼil tkʼuʼj kyiʼj xjal (Éxodo 34:6; Deuteronomio 32:4).

•  Aju jaku bʼant tuʼna: Bʼaʼn tuʼn tjaw tuʼjina Tyol Dios tkyaqil qʼij (Josué 1:8). Ximana tiʼjju in jaw tuʼjina. Ximana tiʼj xjel lu: «¿Tiʼ in tzaj t-xnaqʼtzaʼn jlu weye tiʼj Dios?» (Salmo 77:12).

   Jun techel, jaku jaw tuʼjina Jeremías 29:11 ex xjelinkuya jlu: «¿Tzeʼn taj Dios tuʼn wanqʼine? ¿Tajpe tuʼn ntzalaje moqa tuʼn ttzaj nya bʼaʼn wiʼje? ¿In tzajpe tqʼoj Dios moqa taj tuʼn ntene bʼaʼn?».

 Qʼonka twitza tiʼj tbʼinchbʼen Dios

•  Aju in tzaj tqʼamaʼn Tyol Dios: «Maske mintiʼ qʼanchaʼl te Dios, pero jaku tzʼel qnikʼ tiʼj qa ma qo kubʼ ten ximal tiʼj tkyaqilju o tbʼincha» (Romanos 1:20).

•  Aju t-xilen: Jaku tzʼel qnikʼ tiʼj jun xjal kyuʼn aqʼuntl in bʼant tuʼn. Ax ikx te Dios, jaku tzʼel qnikʼ kyiʼj tbʼanel tmod noq tuʼnju o bʼant nim tiʼchaq tuʼn. Jun techel, jaku txi qqʼamaʼn qa at tnabʼil tuʼnju alkye tten kubʼ tbʼinchaʼn kycerebro xjal. Ex in nel qnikʼ tiʼj tipumal tuʼnju alkye tten kubʼ tbʼinchaʼn Qʼij ex qe cheʼw (Salmo 104:24; Isaías 40:26).

•  Aju jaku bʼant tuʼna: Paʼmila ambʼil tuʼn t-ximana tiʼjju o bʼant tuʼn Dios ex ximana tiʼj tiʼ xnaqʼtzbʼil jaku tzʼel tiʼna tiʼj. Aj tbʼant jlu tuʼna, xjelinkuya jlu: «¿Tiʼ in tzaj tyekʼin jlu weye tiʼj Dios?». a Ax tok, at nim tiʼchaq o bʼant tuʼn Dios, pero nya oʼkx jlu jaku tzʼonin qiʼj tuʼn tel qnikʼ tiʼj. Tuʼntzunju, o tzaj tqʼoʼn Biblia tuʼn tel qnikʼ tiʼj.

 Bʼaʼn tuʼn tajbʼen tbʼi Dios tuʼna

•  Aju in tzaj tqʼamaʼn Tyol Dios: «Ok kletel ju okslal wuʼne, [...] tuʼnju ma tzʼel tnikʼ wiʼje [...]. Ok tkubʼsan nwitze ktzajel nqʼoʼne te aju in tqanin» (Salmo 91:14, 15).

•  Aju t-xilen: Jehová tbʼi Dios. In nok tqʼoʼn twiʼ kyiʼj xjal o tzʼel kynikʼ tiʼj tbʼi, in nok kyqʼoʼn toklen ex in najbʼen kyuʼn (Salmo 83:18, TNM, La Biblia. Traducción del Nuevo Mundo; Malaquías 3:16). b Ax Dios in tzaj qʼamante tbʼi toj Tyol: «Aqine Jehová porke atzun nbʼiye» (Isaías 42:8).

•  Aju jaku bʼant tuʼna: Bʼaʼn tuʼn tajbʼen bʼibʼaj Jehová tuʼna aj tyolina tiʼj Dios.

 Yolina tukʼil Jehová

•  Aju in tzaj tqʼamaʼn Tyol Dios: «Niqayin taʼ Qman kyiʼj qeju in che kubʼsan twitz» (Salmo 145:18).

•  Aju t-xilen: In tzaj laqʼeʼ Jehová kytxlaj qeju in che naʼn Dios tukʼil qʼuqbʼil qkʼuʼj. Aj qnaʼn Dios, in qo kʼulin te Jehová ex in kubʼ qyekʼin qa in nok qqʼoʼn toklen.

•  Aju jaku bʼant tuʼna: Xnaqʼtzanx tibʼa tuʼn tnaʼna Dios (1 Tesalonicenses 5:17). Qʼamanxa te Dios tiʼ in kubʼ tnaʼna ex tiʼ in tzaj bʼaj tkʼuʼja tiʼj (Salmo 62:8). c

 Xnaqʼtzanx tibʼa tuʼn tok qeʼ tkʼuʼja tiʼj Dios

•  Aju in tzaj tqʼamaʼn Tyol Dios: «Qa mintiʼ qokslabʼl mlayx tzalaj Dios qiʼj» (Hebreos 11:6).

•  Aju t-xilen: Qa taja tuʼn tok laqʼeʼya ttxlaj Dios, il tiʼj tuʼn tten qʼuqbʼil tkʼuʼja tiʼj. Aj tyolin Biblia tiʼj qʼuqbʼil qkʼuʼj, nya oʼkx in yolin tiʼjju tuʼn tok qeʼ qkʼuʼj tiʼj qa at Dios. Sino ax ikx a t-xilen tuʼn tok qeʼxix qkʼuʼj tiʼj qa kjapunel twi t-ximbʼetz ex qa tbʼanel qe tkawbʼil. Nim toklen tuʼn tten qʼuqbʼil qkʼuʼj qa qaj tuʼn qok te tamiw Dios.

•  Aju jaku bʼant tuʼna: Tuʼn tkubʼ qyekʼin axix tok qʼuqbʼil qkʼuʼj, il tiʼj tuʼn tten qojtzqibʼil (Romanos 10:17). Qa ma xnaqʼtzana tiʼjju in tzaj tqʼamaʼn Biblia, kʼelel tnikʼa tiʼj qa jaku tzʼok qeʼ tkʼuʼja tiʼj Dios ex kyiʼj tconsej. Che tzalajel testigo de Jehová tuʼn kyonin tiʼja tuʼn tel mas tnikʼa tiʼj Biblia. d

 Bʼinchanxa aju in tzalaj Dios tiʼj

•  Aju in tzaj tqʼamaʼn Tyol Dios: «Qa kʼujlaʼn Dios quʼn, che japunel qe tmandamyent quʼn; ex qe tmandamyent mya kyuw qe» (1 Juan 5:3).

•  Aju t-xilen: Qa ma txi tyekʼina te Jehová qa kʼujlaʼn tuʼna ex qa ma tzʼok tilil tuʼna tuʼn tnimana te, tzul laqʼeʼ ttxlaja.

•  Aju jaku bʼant tuʼna: Akux in xnaqʼtzana tiʼj Biblia, kʼelel tnikʼa tiʼj tiʼ in tzalaj Dios tiʼj ex tiʼ nya bʼaʼn in nela toj twitz. Xjelinkuya jlu: «¿Alkyeqe chʼixpubʼil il tiʼj tuʼn tbʼant wuʼne tuʼntzun ttzalaj Dios wiʼje?» (1 Tesalonicenses 4:1).

 Bʼinxa qe tconsej Dios ex qʼonka twitza tiʼj tkʼujlabʼil

•  Aju in tzaj tqʼamaʼn Tyol Dios: «Che nikʼbʼenchaqe tiʼj, tzʼelx kynikʼe tiʼj, ate Qman puro bʼaʼn» (Salmo 34:8).

•  Aju t-xilen: In xi tqʼoʼn Dios txokbʼil tiʼja tuʼn tel tnikʼa tiʼj qa puro bʼaʼn te. Aj tkubʼ tnaʼna tkʼujlabʼil, kʼonil tiʼja tuʼn tok laqʼeʼya mas ttxlaj.

•  Aju jaku bʼant tuʼna: Aj tjaw tuʼjina Tyol Dios, bʼaʼn tuʼn tkubʼ tbʼinchaʼna aju in tzaj tqʼamaʼn. Qa ma bʼant jlu tuʼna, bʼaʼn kʼelel tkyaqil toj tanqʼibʼila (Isaías 48:17, 18). Ax ikx, jaku tzʼok tqʼoʼn twitza tiʼj tzeʼn o tzʼonin Dios kyiʼj junjun xjal tuʼn kyex kywitz nya bʼaʼn, tuʼn tten jun tbʼanel kyanqʼibʼil kyukʼil toj kyja ex tuʼn tkubʼ kynaʼn axix tok tzalajbʼil. e

 Aju in kubʼ kyximen junjun xjal: Mlay qo ok te tamiw Dios tuʼnju mlayx tzʼel qnikʼ tiʼj.

 Aju axix tok: Atlo junjun tiʼchaq kwest tuʼn tel qnikʼ tiʼj Dios ik tzeʼn qa jun xewbʼaj te. Pero jaku qo ok te tamiw. In tzaj tqʼamaʼn Biblia qa nim toklen tuʼn tel qnikʼ tiʼj Dios tuʼntzun ttzaj tqʼoʼn qchwinqlal te jumajx (Juan 17:3). Nya kwest qe yol in che ajbʼen tuʼn Biblia tuʼntzun tel qnikʼ tiʼj Dios. In tzaj tqʼamaʼn qe tzeʼn tmod, tiʼ t-ximbʼetz at kyiʼj xjal ex tiʼj Txʼotxʼ ex qe tkawbʼil (Isaías 45:18, 19; 1 Timoteo 2:4). Ex ik tzeʼn ma tzʼel qnikʼ tiʼj, in tzaj tqʼamaʼn tbʼi qe (Salmo 83:18, TNM). Tuʼntzunju, nya oʼkx jaku tzʼel qnikʼ tiʼj Dios, sino ax ikx jaku qo ok te tamiw (Santiago 4:8).