Mintiʼ qʼanchaʼl Tajaw il moqa Satanás, toj juntl yol, mintiʼ t-xmilal at. Tuʼntzunju, mlayx bʼant tuʼn tok qkeʼyin (Efesios 6:11, 12).

 Chʼixme tkyaqil maj, in kubʼ dibujarin Tajaw il ik tzeʼn jun xjal ik keʼyin ik tzeʼn jun chip ateʼ tkach, at tjeʼ ex qʼiʼn jun kʼuxbʼil tuʼn. In kubʼ kyximen junjun xjal qa ma tzikʼ mas te mil abʼqʼi t-xilen tzyet tuʼn tkubʼ kydibujarin xjal tilbʼilal Tajaw il ik tzeʼn jlu. Kubʼlo kybʼinchaʼn xjal qe dibujo lu tej kyok lepeʼ tiʼjju nimen kyuʼn txqantl ex tiʼj kykostumbr.

•  ¿Tiʼ in tzaj tqʼamaʼn Tyol Dios tiʼj Tajaw il?

•  Qe texto in che yolin tiʼj Tajaw il

 Aj tyolin Tyol Dios tiʼj Tajaw il, in che ajbʼen junjun techel tuʼn tuʼn tonin qiʼj tuʼn tel qnikʼ tiʼj tmod ex nya tiʼjju tzeʼn keʼyin. Atzun junjun techel jlu:

•   Jun anjel in qoptzʼaj. In xi tqʼamaʼn Satanás kye xjal qa tbʼanel junjun tiʼchaq noq tuʼn kyok lepeʼ kyiʼj t-xnaqʼtzbʼil ex nya kyiʼj t-xnaqʼtzbʼil Dios (2 Corintios 11:14).

•   Jun león in tzanun. In nok tbʼinchaʼn nya bʼaʼn kyiʼj tmajen Dios (1 Pedro 5:8).

•   Jun nintz dragón. Xobʼajil, at nim tipumal ex in nok tbʼinchaʼn nim nya bʼaʼn kyiʼj xjal (Apocalipsis 12:9).