¿Jakupe tzʼonin Tyol Dios wiʼje qa ya nya waje tuʼn wanqʼine ex qa in kubʼ nximane tuʼn tkubʼ nbʼyon wibʼe?
Aju in tzaj ttzaqʼweʼn Tyol Dios
Jaku tzʼonin. ¿Tiquʼn? Tuʼnju atzun Tyol Dios ex in tzaj tqʼuqbʼaʼn Dios kykʼuʼj qeju in che bʼisun (2 Corintios 7:6). Mintiʼ in nok Tyol Dios ik tzeʼn jun uʼj in yolin kyiʼj qʼanbʼil, pero o tzʼonin kyiʼj nim xjal tuʼn miʼn tkubʼ kybʼyon kyibʼ. Ax ikx jaku che onin nabʼil tkuʼx toj tiʼja.
¿Alkyeqe nabʼil tkuʼx toj Tyol Dios jaku che onin qiʼj?
● Qʼamanxa tiʼ in kubʼ tnaʼna.
Aju in tzaj tqʼamaʼn Tyol Dios: «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17).
Aju t-xilen: Aj in kubʼ qximen qa in tzaj bʼaj qkʼuʼj kyiʼj junjun tiʼchaq, il tiʼj tuʼn qjyon onbʼil.
Qa mintiʼ in xi tqʼamaʼna te juntl aju in kubʼ tnaʼna, jaku tzʼok jlu te jun iqtz ex mlay tzikʼx tuʼna. Pero qa ma txi tqʼamaʼna te juntl aju in kubʼ tnaʼna moqa aju in kubʼ t-ximana, jaku tzʼonin jlu tiʼja tuʼn tten t-ximbʼetza toj tumel kyiʼj tiʼchaq in nok weʼya twitz.
Jaku txi tbʼinchaʼna jlu: Yolina de una vez tukʼil jun toj tjaya moqa tukʼil jun tamiwa aju in nok qeʼ tkʼuʼja tiʼj. a Ax ikx, jaku kubʼ ttzʼibʼina toj jun uʼj aju in kubʼ tnaʼna.
● Bʼaʼn tuʼn t-xiʼya tukʼil jun doctor.
Aju in tzaj tqʼamaʼn Tyol Dios: «Qe xjal mya yabʼ, mya il tiʼj jun qʼanal kye, noq oʼkx qe xjal yabʼ» (Mateo 9:12).
Aju t-xilen: Qa ma tzaj yabʼil qiʼj, il tiʼj tuʼn qxiʼ tukʼil jun doctor.
Aj in kubʼ t-ximen jun xjal tuʼn tkubʼ tbʼyon tibʼ, in bʼaj jlu tuʼnju atlo jun yabʼil toj twiʼ moqa tiʼjju in kubʼ tnaʼn. Mintiʼ in qo tzaj chʼixwi aj ttzaj jun yabʼil qiʼj, ax ikx mintiʼ tuʼn ttzaj qchʼixwi aj ttzaj jun yabʼil tiʼj qximbʼetz. At qʼanbʼil kyiʼj yabʼil lu.
Jaku txi tbʼinchaʼna jlu: Miʼn kubʼ tyoʼna nim ambʼil tuʼn tjyona onbʼil tukʼil jun doctor.
● Bʼaʼn tuʼn ttzaj tnaʼna qa nim toklena toj twitz Dios.
Aju in tzaj tqʼamaʼn Tyol Dios: «¿Mintiʼpe in che kʼayinjtz jweʼ tal chyuʼj tuʼn kabʼe sentav? Pero mi jun kye nnikʼ tnaʼl tuʼn Dios. [...] Kyjaʼtzun miʼn che xobʼe; aqeye mas maʼ kyxilene kywitz nimku tal chyuʼj» (Lucas 12:6, 7).
Aju t-xilen: Nim toklena toj twitz Dios.
Bʼalo in kubʼ tnaʼna qa tjunalxa ata, pero nya ikju. In nel tnikʼ Dios tiʼjju in bʼaj tiʼja. Maske ya nya taja tuʼn tanqʼina, in ximen Dios tiʼja. In tzaj tqʼamaʼn Salmo 51:17 qa mintiʼ in nel tikʼun Dios jun xjal in «tzaj tbʼis». Tuʼn jlu in nel qnikʼ tiʼj qa kʼujlaʼna tuʼn Dios ex taj tuʼn kukx tanqʼina.
Jaku txi tbʼinchaʼna jlu: Jyonxa toj Biblia tuʼn tel tnikʼa tiʼj qa kʼujlaʼna tuʼn Dios. Jun techel, jaku kux tjyoʼna capítulo 24 toj libro Acerquémonos a Jehová ex kkanetel junjun yekʼbʼil tuʼna tiʼj tkʼujlabʼil Dios.
● Bʼaʼn tuʼn tnaʼna Dios.
Aju in tzaj tqʼamaʼn Tyol Dios: «Tkyaqilju in bʼaj kykʼuʼje tiʼj, kyqʼonxe tuj tkwent Dios, porke ate Dios kwentil kyeye» (1 Pedro 5:7).
Aju t-xilen: Taj Dios tuʼn t-xi tqʼamaʼna te tkyaqilju in bʼaj tkʼuʼja tiʼj ex tiʼ in kubʼ tnaʼna.
Jaku tzʼonin Dios tiʼja tuʼn tkubʼ tnaʼna bʼaʼn ex jaku tzaj tqʼoʼn tipumala tuʼn texa twitz nya bʼaʼn (Filipenses 4:6, 7, 13). Iktzun tten in nonin Dios kyiʼj xjal in che ok laqʼeʼ ttxlaj (Salmo 55:22).
Jaku txi tbʼinchaʼna jlu: Naʼna Dios. Jehová tbʼi ex qʼamanxa te aju in kubʼ tnaʼna (Salmo 83:18, TNM). Qaninxa onbʼil te tuʼn texa twitz nya bʼaʼn.
● Ximana tiʼj qʼuqbʼil qkʼuʼj in tzaj tqʼoʼn Tyol Dios tiʼj ambʼil tzul.
Aju in tzaj tqʼamaʼn Tyol Dios: «Aju oybʼil lu ik tten ik tzaʼn taqʼal barc, in ajbʼen te tzuybʼil te qanmi tuʼn tten qanmi segurxix ex tuʼn miʼn qyyukch» (Hebreos 6:19).
Aju t-xilen: Jaku qo jaw sutin tuʼn qximbʼetz ik tzeʼn in bʼaj tiʼj jun bark tuʼn kyqʼiqʼ jbʼal. Pero in nok qʼuqbʼil qkʼuʼj ik tzeʼn taqʼil bark tuʼnju in nonin qiʼj tuʼn qten segur.
Nya noq jun witzikʼ jlu, sino a Dios in tzaj tziyente qa kʼelel tiʼn tkyaqilju in tzaj qbʼis tuʼn (Apocalipsis 21:4).
Jaku txi tbʼinchaʼna jlu: Jaku jaw tuʼjina mas tqanil tiʼj qʼuqbʼil qkʼuʼj in tzaj tqʼoʼn Dios toj xnaqʼtzbʼil jweʼ toj uʼj Tbʼanel tqanil tzajni tukʼil Dios.
● Jaku txi tbʼinchaʼna jun tiʼ in tzalaja tiʼj.
Aju in tzaj tqʼamaʼn Tyol Dios: «Qa at tzalajbʼil tuj tanmi xjal, a jlu mer ik tzaʼn jun qʼanbʼil te te» (Proverbios 17:22).
Aju t-xilen: Qa ma txi qbʼinchaʼn junjun tiʼchaq in qo tzalaj tuʼn, jaku tzʼonin qiʼj tuʼn tkubʼ qnaʼn bʼaʼn ex tuʼn tten qximbʼetz toj tumel.
Jaku txi tbʼinchaʼna jlu: Jaku bʼant junjun tiʼchaq tuʼna aju in tzalaja tuʼn. Jun techel, bʼaʼn tuʼn tbʼina kyiʼj bʼitz in tzalaja tuʼn, uʼjinktza jun tiʼ tgana moqa bʼinchama jun tiʼ jaku tzʼonin tiʼja tuʼn ttzalaja. Ax ikx jaku tzalaja aj tonina kyiʼj txqantl maske nya nim toklen toj twitza (Hechos 20:35).
● Bʼaʼn tuʼn tok t-xqʼuqina t-xmilala.
Aju in tzaj tqʼamaʼn Tyol Dios: «Porke aju tuʼn tnuqpaj qximlal, noq chʼin tajbʼen» (1 Timoteo 4:8).
Aju t-xilen: Qa ma bʼinchana ejercicio, qa ma jtana bʼaʼn ex qa ma waʼna tiʼj tbʼanel wabʼj, jaku tzʼonin tuʼn miʼn ttzaj yabʼil tiʼja.
Jaku txi tbʼinchaʼna jlu: Bʼaʼn tuʼn texa bʼetil ex tuʼn tojqelina jun rat, maske noq 15 minut.
● Bʼaʼn tuʼn ttzaj tnaʼna qa jaku chʼexpaj qximbʼetz ik tzeʼn junjuntl tiʼchaq in bʼaj qiʼj.
Aju in tzaj tqʼamaʼn Tyol Dios: «Mintiʼ bʼaʼn kyuʼne aju tzul te nchiʼj» (Santiago 4:14).
Aju t-xilen: Aj tbʼet ambʼil, chebʼe in che kyaj nya bʼaʼn toj ttxolil, axpe ikx qeju in kubʼ qximen qa mintiʼx tumel tuʼn qex kywitz.
Maske kwest jun nya bʼaʼn in qo ok weʼ twitz jaʼlo, jaku chʼexpaj toj juntl qʼij. Tuʼntzunju, miʼn sikta (2 Corintios 4:8). Qa at jun tiʼ in bʼaj tkʼuʼja tiʼj toj ambʼil jaʼlo, jaku chʼexpaj aj tbʼet ambʼil, pero qa ma kubʼ tbʼyon tibʼa, ya mlayx bʼant jun tiʼ tuʼna.
Jaku txi tbʼinchaʼna jlu: Jaku kux tjyoʼna toj Tyol Dios alkyeqe xjal tzaj bʼaj kykʼuʼj ex kyajtoq tuʼn kykyim. Bʼaʼn tuʼn tel tnikʼa tiʼj tiʼ onin kyiʼj tej tikʼ ambʼil ex at maj mintiʼtoq ximen kyuʼn. Qo xnaqʼtzan kyiʼj junjun techel.
¿In yolinpe Tyol Dios kyiʼj xjal kyajtoq tuʼn kykyim?
Ikju. In yolin Tyol Dios kyiʼj junjun xjal kyajtoq tuʼn kykyim. Mintiʼ tzaj tqʼoj Dios kyiʼj, sino onin kyiʼj. Ax jlu jaku bʼant tuʼn tiʼja.
Elías
● ¿Alkyetzun ok te Elías? Ok Elías te jun profeta ex mintiʼ tzaj xobʼ, maske ikju, at maj tzaj bʼaj tkʼuʼj. In tzaj tqʼamaʼn Santiago 5:17 qa ikx «ttzajlen [Elías] ik tzaʼn qe».
● ¿Tiquʼn tajtoq tuʼn tkyim? Toj jun ambʼil, kubʼ tnaʼn Elías qa tjunalxtoq at, tzaj xobʼ ex kubʼ t-ximen qa mintiʼtoq tajbʼen. Tuʼntzunju, xi tqʼamaʼn jlu te Jehová: «Akuxtzun jaʼlo Nman, chin tbʼyonkuya» (1 Reyes 19:4).
● ¿Tiʼ onin tiʼj? Naʼn Elías Dios ex xi tqʼamaʼn tkyaqilju in kubʼtoq tnaʼn. ¿Tzeʼn xi tqʼuqbʼaʼn Jehová tkʼuʼj? Kubʼ tyekʼin qa ximen tiʼj Elías ex xi tqʼoʼn ambʼil te tuʼn tok tkeʼyin tipumal. Ax ikx xi tqʼamaʼn Jehová te qa nimtoq toklen toj twitz ex xi tqʼoʼn jun onil te aju jakutoq xqʼuqin tiʼj.
▸ Uʼjinktza txʼolbʼabʼil tiʼj Elías: 1 Reyes 19:2-18.
Job
● ¿Alkyetzun ok te Job? Jun xjal ten nim tqʼinumabʼil ex ateʼtoq nim toj tja, ax ikx ok tilil tuʼn tuʼn kukx tajbʼen te Dios.
● ¿Tiquʼn tajtoq tuʼn tkyim? Chʼexpaj tanqʼibʼil Job ex mintiʼtoq ximen tuʼn. Naj tkyaqil tiʼchaq te, e kyim qe tkʼwal ex tzaj yabʼil tiʼj. Nya oʼkxju, ax ikx xi qʼamaʼn te qa tuʼnx otoq tzaj nya bʼaʼn tiʼj ex nya toj tumel xi qʼamaʼn te. Otoq tzaj nim tbʼis Job, tuʼntzunju tqʼama jlu: «Mlay tzikʼx mastl wuʼne. Mi wajtle tuʼn wanqʼine» (Job 7:16).
● ¿Tiʼ onin tiʼj? Ok ten Job naʼl Dios, ax ikx yolin kyukʼil junjuntl xjal (Job 10:1-3). Xi qʼuqbʼaʼn tkʼuʼj tuʼn Elihú, aju tamiw ex onin tiʼj tuʼn tbʼaj tchʼexpuʼn t-ximbʼetz kyiʼj nya bʼaʼn otoq che tzaj tiʼj. Ex aju mas nim toklen, xi tkʼamoʼn onbʼil xi qʼoʼn te tuʼn Dios.
▸ Uʼjinktza txʼolbʼabʼil tiʼj Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moisés
● ¿Alkyetzun ok te Moisés? Kubʼ nej Moisés kywitz tmajen Dios toj ambʼil ojtxe ex ok te jun profeta.
● ¿Tiquʼn tajtoq tuʼn tkyim? Attoq nim aqʼuntl tuʼn t-xi tbʼinchaʼn Moisés, e xmayin xjal tiʼj ex kubʼ tnaʼn qa nim otoq sikt. Tuʼntzunju, xi tqʼamaʼn jlu te Dios: «Chin tbʼyonkuya» (Números 11:11, 15).
● ¿Tiʼ onin tiʼj? Xi tqʼamaʼn Moisés te Dios tiʼtoq in kubʼ tnaʼn. Xi tjyoʼn Dios tumel tzeʼn tuʼn tonin tiʼj tuʼntzun miʼn tkubʼ tnaʼn nim siktleʼn.
▸ Uʼjinktza txʼolbʼabʼil tiʼj Moisés: Números 11:4-6, 10-17.
a Qa mintiʼ jun toj tjaya moqa jun tamiwa jaku tzʼonin tiʼja toj qʼij jatumel taja tuʼn tkubʼ tbʼyon tibʼa, jaku txi llamarina toj teléfono jatumel in tzaj qʼoʼn onbʼil kye xjal tuʼn miʼn tkubʼ kybʼyon kyibʼ.
Bʼalo ax ikx tgana jlu
KYXJEL KUʼXUN
¿Tiʼ jaku bʼant wuʼne qa waje tuʼn tkubʼ nbʼyon wibʼe?
¿In kubʼpe t-ximana qa noqx gan in nanqʼina? Jaku che onin kyaje consej lu tiʼja.
AJU XQʼUQIL
¿Atpe jun tiquʼn tuʼn kukx tanqʼina?
¿Atpe jun tiʼ o bʼaj aju kubʼ t-xjelina qa ilpe tiʼj tuʼn kukx tanqʼina?
QE XNAQʼTZBʼIL NIM KYOKLEN TOJ TYOL DIOS
¿Tiquʼn in tzaj tqʼoʼn Dios ambʼil te yajbʼil?
In kanet tzaqʼwebʼil quʼn toj Tyol Dios aju in tzaj tqʼuqbʼaʼn qkʼuʼj.
TQANIL KYIʼJ TESTIGOS DE JEHOVÁ
Qaninxa tuʼn tpon jun testigo de Jehová visitaril teya
Qaninxa jun t-xjela kyiʼj testigo de Jehová moqa ojtzqinka mas tqanil kyiʼj.