Tej tyolin Jesús tiʼj xjal qʼinun ex tiʼj Lázaro, noq jun techel qe jlu tuʼn ttzaj tqʼamaʼn jun txʼolbʼabʼil (Lucas 16:19-31). Kubʼ kyechlaʼn xjal lu kabʼe kʼloj xjal: tnejel, kubʼ kyechlaʼn qe nejenel jaw kynimsan kyibʼ kye xjal judiy toj ambʼil tej tten Jesús ex tkabʼin, kubʼ kyechlaʼn qe xjal kubʼ kyin kyibʼ ex xi kybʼiʼn tbʼanel tqanil xi tqʼamaʼn Jesús kye.

Toj xnaqʼtzbʼil lu kxel qqʼoʼn tzaqʼwebʼil kyiʼj xjel lu:

•  ¿Tiʼ tqʼama Jesús tiʼj xjal qʼinun ex tiʼj Lázaro?

•  ¿Axpe tok bʼaj txʼolbʼabʼil lu?

•  ¿In tzajpe tyekʼin txʼolbʼabʼil lu qa ax tok at infierno?

•  ¿Tiʼ t-xilen txʼolbʼabʼil lu?

 Toj capítulo 16 te Lucas, yolin Jesús tiʼj kabʼe xjal chʼexpaj qe tiʼchaq toj kyanqʼibʼil.

 ¿Alqiʼj in yolin txʼolbʼabʼil? In yolin txʼolbʼabʼil tiʼj jun xjal qʼinun ex attoq nim tiʼchaq te. In kyajtoq qʼoʼn jun xjal prow Lázaro tbʼi ttzi tja tuʼntzun t-xi twaʼn aju wabʼj mintiʼ in bʼaj tuʼn qʼinun. Tej tikʼ chʼin ambʼil, kyim Lázaro ex xi qʼiʼn kyuʼn anjel ttxlaj Abrahán. Ax ikx kyim xjal qʼinun ex kux maquʼn. Kukx in yolin txʼolbʼabʼil lu ik tzeʼn itzʼx qe. In bʼajtoq tzʼeʼy qʼinun tuʼn qʼaqʼ, tuʼntzunju xi tqanin te Abrahán tuʼn t-xi tsamaʼn Lázaro, tuʼn t-xi tiʼn chʼin aʼ twi tqʼabʼ ex tuʼn tkubʼ tqʼoʼn twiʼ taqʼ tuʼntzun tchewix. Xi tqʼamaʼn Abrahán te xjal qʼinun qa otoq chʼexpaj kyanqʼibʼil ex qa mlay bʼant tuʼn t-xi tbʼinchen aju in xitoq tqanin te.

 Miʼn. Noq jun techel ajbʼen tuʼn Jesús tuʼn ttzaj tqʼoʼn xnaqʼtzbʼil. Ateʼ junjun xjal at kyojtzqibʼil o tzʼel kynikʼ tiʼj qa nya ax tok bʼaj txʼolbʼabʼil lu. Jun techel, toj Biblia bʼant tuʼn Lutero te 1912, in tzaj tqʼamaʼn jun subtítulo qa noq jun techel txʼolbʼabʼil lu. Ex toj Biblia de Jerusalén, aju in ajbʼen kyuʼn católico, in tzaj tqʼamaʼn toj jun nota qa noq jun txʼolbʼabʼil lu moqa noq jun techel ex mintiʼ toklen tukʼilju o bʼaj kyiʼj xjal, toj juntl yol, jaku txi qqʼamaʼn qa nya ax tok bʼaj lu.

 ¿Tajpe Jesús tuʼn ttzaj tqʼamaʼn qa kukx in che anqʼin xjal otoqxi che kyim? ¿Tajpe tuʼn ttzaj tyekʼin qa ateʼ xjal in cheʼx toj infierno ex qa atztoq taʼ Abrahán ex Lázaro toj kyaʼj? Miʼn. At nim yekʼbʼil tiʼj tiquʼn in xi qqʼamaʼn qa nya atoq jlu tajtoq Jesús tuʼn tkyaj t-xnaqʼtzaʼn.

 Qo yolin kyiʼj junjun techel:

•   Noqwit ax tok at xjal qʼinun toj qʼaqʼ, ¿mlaypetzulo bʼaj tzqij aʼ qʼiʼn tuʼn Lázaro twi tqʼabʼ?

•   Qatzun mlaytoq tzqij aʼ, ¿jakupe tzʼonin jun tal txut aʼ tuʼn tchewix t-xmilal xjal qʼinun?

•   Otoq tqʼama Jesús qa ni jun xjal otoq japun toj kyaʼj, ¿jakupe txi qqʼamaʼn qa atztoq in nanqʼin Abrahán toj kyaʼj? (Juan 3:13).

 Miʼn. Maske nya ax tok bʼaj txʼolbʼabʼil lu, ateʼ junjun xjal in tzaj kyqʼamaʼn qa in najbʼen te techel tuʼntzun t-xi qʼamet qa in cheʼx tbʼanel xjal toj kyaʼj, atzun qeju nya bʼaʼn xjal in cheʼx toj qʼaqʼ. a

 Pero ¿atpe ttxolil jlu? Mintiʼ.

 Aju xnaqʼtzbʼil tiʼj infierno, mintiʼ tmojbʼabʼil tibʼ tukʼilju in tzaj t-xnaqʼtzaʼn Tyol Dios tiʼjju jatumel ateʼ qe kyimni. Jun techel, mintiʼ in tzaj tqʼamaʼn Biblia qa kykyaqil tbʼanel xjal in cheʼx anqʼil toj kyaʼj ex mintiʼ in tzaj tqʼamaʼn qa in che bʼaj kʼixbʼisaʼn nya bʼaʼn xjal toj qʼaqʼ. Sino in tzaj tqʼamaʼn Biblia jlu: «Porke qe xjal itzʼx qe, bʼaʼn kyuʼn qa ok che kymel, atzun qe xjal kyimni qe, mintiʼ bʼaʼn kyuʼn» (Eclesiastés 9:5).

 In tzaj tyekʼin txʼolbʼabʼil lu qa chʼexpaj kyanqʼibʼil kabʼe kʼloj xjal.

 In nok xjal qʼinun te kyechel nejenel kye xjal judiy «tuʼnju atzun tokxix kykʼuʼj tiʼj qʼinumabʼl» (Lucas 16:14). Ok kybʼiʼn tqanil tqʼama Jesús, pero el kyikʼun. Axpe ikx el kyikʼun qe xjal nya nim kyoklen (Juan 7:49).

 Atzunte Lázaro ok te kyechel qe xjal nya nim kyoklen tuʼnju xi kybʼiʼn tbʼanel tqanil yolin Jesús tiʼj, maske i el ikʼun kyuʼn nejenel kye xjal judiy.

 Chʼexpaj nim tiʼchaq toj kyanqʼibʼil kabʼe kʼloj xjal lu.

•   Kubʼ kyximen nejenel kye okslabʼil qa in tzalajtoq Dios kyiʼj, pero e ok qʼoʼn ik tzeʼn qe xjal otoq che kyim tuʼnju mintiʼ xi kybʼiʼn tbʼanel tqanil xi tqʼamaʼn Jesús kye ex tuʼntzunju i el ikʼun tuʼn Dios ex aju kykʼulbʼil Axpe ikx nya bʼaʼn ela toj kywitz ex tzaj kyqʼoj tej tpakbʼan Jesús ex qe t-xnaqʼtzbʼen (Mateo 23:29, 30; Hechos 5:29-33)

•   Maske mintiʼ xi qʼoʼn xnaqʼtzbʼil kye xjal kyuʼn nejenel kye okslabʼil, pero ya jakutoq che ok laqʼeʼ ttxlaj Dios Nim kye xi kybʼiʼn tqanil pakbʼan Jesús tiʼj ex nim onin kyiʼj Ax ikx, xi tqʼoʼn jlu ambʼil kye tuʼn ttzalaj Dios kyiʼj (Juan 17:3).