Kyoj qe abʼqʼi o che ikʼ o tzaj mebʼayil atz Venezuela ex o tzaj nya bʼaʼn kyxol xjal. In tzaj tqʼamaʼn jun testigo de Jehová, aju Edgar tbʼi jlu: «Toj chʼin ambʼil, ya mintiʼxix pwaq tuʼn qanqʼin ik tten jlu ik tzeʼn in qoʼx anqʼil toj juntl tnam, pero mintiʼ in qoʼx».

 ¿Tiʼ bʼant tuʼn Edgar tuʼn tnaqʼet? In tzaj tqʼamaʼn jlu: «Jun tiʼ o tzʼonin tiʼj nxuʼjile Carmen ex wiʼje aju tej qximane tiʼjju o tzikʼ toj kyanqʼibʼil misionero, aqeju o cheʼx anqʼil toj juntl tnam nya qʼinun ex o tzʼok tilil kyuʼn tuʼn kyanqʼin tukʼil nya nim tiʼchaq kye. A jlu onin qiʼje tuʼn miʼn tten nim tiʼchaq qeye ex tuʼn tkubʼ qbʼinchaʼne junjun tiʼchaq naʼmxtoq kybʼant quʼne jun maj, ik tzeʼn tuʼn tkux qawaʼne junjun awal».

 Pero nya oʼkx jlu bʼant tuʼn Edgar ex Carmen. Ok tilil kyuʼn tuʼn t-xi kyqʼuqbʼaʼn kykʼuʼj junjun erman, axpe ikx qeju otoq tzaj depresión kyiʼj (1 Tesalonicenses 5:11). In tzaj tqʼamaʼntl Edgar jlu: «Nya oʼkx xi qqʼuqbʼaʼne kykʼuʼj erman, ax ikx xi qqʼoʼne onbʼil tuʼn tkubʼ kynaʼn tzalajbʼil aj t-xi kyqʼoʼn onbʼil kyiʼj qeju at-xix tajbʼen kye» (Hechos 20:35).

 Tej ttzaj tzyet COVID-19, kubʼ t-ximen Argenis tuʼn tpakbʼan kye tfamiliar, ex ateʼ junjun xi tzyet tuʼn kyxnaqʼtzan tiʼj Tyol Dios toj teléfono.

 Ax ikx tajtoq Argenis tuʼn tok kykeʼyin qe toj tja, aʼyeju mintiʼ kyinternet, aju asamblea te oxe qʼij te 2020. Jun testigo in nanqʼin nqayin tiʼj tnam xi tqʼoʼn qe grabación tiʼj programa kye. Tuʼn jlu xi kyqanin tfamiliar jun televisión majen ex junjun bocina, ex xi tllamarin Argenis qe toj tja tuʼn tok tqʼoʼn jun naʼj Dios junx kyukʼil naʼmxtoq txi tzyet programa. Tuʼnju ok tilil tuʼn Argenis, e ten 4 toj tja ex 15 xjal toj asamblea.

 Oʼkx Jairo ex Johana attoq kykar toj congregación. Pero in najbʼen kyuʼn tuʼn kyonin kyiʼj txqantl. E ok weʼ twitz jun nya bʼaʼn, kwesttoq tuʼn tkanet kygasolina. In tzaj tqʼamaʼn Jairo jlu: «O tzikʼ nim or in qo ayone, ex at maj o tzʼex tkyaqil qonikʼen atoʼye toj cola tuʼn ttzaj qlaqʼoʼne gasolina».

 In kubʼ t-ximen Jairo qa tbʼanelxix tuʼn qonin kyiʼj txqantl. In tzaj tqʼamaʼn jlu: «Aj t-xi qqʼoʼn aju at tajbʼen kye erman in qo jaw tzalaj aj ttzaj kyqʼoʼn chjonte, nya qeye, sino te Jehová, aju in xi qʼonte te ttnam tkyaqilju at tajbʼen te» (2 Corintios 9:11, 14).

 28 abʼqʼi Norianni ex kubʼ t-ximen qa jaku tzaj kyqʼamaʼn txqantl qa tzma kuʼxun ex mlay bʼant tuʼn tonin kyiʼj erman. Pero jaw tuʼjin 1 Timoteo 4:12 aju in tzaj tqʼamaʼn jlu: «Miʼn taqʼa ambʼil tuʼn tel ikʼuna kyuʼn okslal tuʼnju kuʼxuna; noq oʼkx tuʼn toka te jun yekʼbʼil kyxol okslal».

 Onin texto lu tiʼj Norianni tuʼn tel tpaʼn mas ambʼil tuʼn tten kyukʼil erman o che tijen toj tcongregación. Jun techel, onin kyiʼj tuʼn tkubʼ kytzʼibʼin carta axpe ikx xi tqʼoʼn txokbʼil kyiʼj tuʼn kyten tukʼil aj t-xi tqʼoʼn xnaqʼtzbʼil kye xjal. Ax ikx in chextoq tllamarin ex in xi tsamaʼn mensaje kye tuʼn t-xi tqʼuqbʼaʼn kykʼuʼj. In tzaj tqʼamaʼntl jlu: «Onin Jehová wiʼje tuʼn tel nnikʼe tiʼj qa jaku bʼant tuʼn wonine».

 In che ok weʼ erman te Venezuela kywitz nim nya bʼaʼn toj ambʼil kwest. Pero kukx in che tzalaj toj pakbʼabʼil ex tuʼnju nim in xi qʼuqbʼaʼn kykʼuʼj txqantl kyuʼn (Colosenses 4:11; 2 Timoteo 4:2)