Testigo de Jehová Virginia ex at jun yabʼil tiʼj. Síndrome del enclaustramiento moqa del cautiverio tbʼi yabʼil tok tiʼj. Ya mintiʼ in yukch t-xmilal, ya mintiʼ in yolin ex mintiʼ in bʼant twaʼn. Oʼkx in bʼant tkeʼyin, tbʼin, tuʼn tjaw tjaqoʼn qe twitz, tuʼn tkubʼ tmaltzʼuʼn ex tuʼn t-xi tyukin chʼin twiʼ. Pero nya iktoq tanqʼibʼil tej tjaw chʼiy. Mintiʼtoq yabʼil tiʼj Virginia ex puro aqʼunal xjal. Noqtzun tuʼnj, chʼexpaj tanqʼibʼil toj 1997 tej ttzaj choʼn twiʼ ex mintiʼtoq in nel tchʼonil twiʼ. Xi qʼiʼn toj spital tuʼn tchmil ex toj qonikʼen aju ya mintiʼ ul tnabʼil. Tzmaxi ul tnabʼil tej tikʼ kabʼe seman ex atztoq taʼ toj intensivo. Mintiʼtoq in yukch t-xmilal ex conectarin oxígeno tiʼj. Ya mintiʼtoq naʼn qe tiʼchaq tuʼn, axpe ikx ya mintiʼtoq naʼn tuʼn alkyetoq.

 Tqʼama Virginia tiʼ bʼaj yajxitl: «Chebʼe chebʼe el ul qe tiʼchaq toj nwiʼye juntl maj. In naʼne Dios te Jehová, nyatoq waje tuʼn nkyime tuʼntzun miʼn tkyaj ten wale te 9 abʼqʼi tjunalx. Tuʼn tten wipumale ex tuʼn miʼn ttzaj bʼaj nkʼuʼje, ok tilil wuʼne tuʼn ttzaj nnaʼne kykyaqil versículo ojtzqiʼn wuʼne».

 «Tej tikʼ ambʼil, ya mintiʼ in tene toj sala te intensivo. Tej otoqxi chin tene qaq xjaw toj junxichaq spital ex toj jun centro de rehabilitación, in xi samaʼne njaye. Mintiʼtoq in yukch nximlale, wajtoqe onbʼil tiʼj tkyaqil ex otoq tzaj bʼaj nkʼuʼje. Kubʼ nnaʼne qa mlayxtoq bʼant jun tiʼ wuʼne tiʼj Jehová ex kyiʼj txqantl. Ax ikx, tzaj bʼaj nkʼuʼje tej tkubʼ nximane qa ya mlay chin nxqʼuqine tiʼj wale».

 «Xi tzyet tuʼn tjaw wuʼjine aju in nikʼ kyiʼj junjuntl erman, aqeju chʼixme ax yabʼil at kyiʼj ik tzeʼn weye ex in jaw labʼine tiʼj tkyaqilju in bʼant kyuʼn toj kyajbʼebʼil te Jehová. Tuʼntzunju, ok tilil wuʼne tuʼn tten nximbʼetze toj tumel ex tuʼn tok nqʼoʼne nwiʼye tiʼjju jaku bʼant wuʼne. Tnejel, mintiʼtoq in kanet ambʼil wuʼne tuʼn nxnaqʼtzane tiʼj Biblia, tuʼn npakbʼane ex tuʼn nnaʼne Dios. Pero toj ambʼil aju, attoq ambʼil wiʼje toj enter qʼij ex tkyaqil qʼij. Tuʼntzunju, mintiʼ xi nqʼoʼne ambʼil tuʼn nkubʼ numje, sino xi nqʼoʼne tkyaqil ambʼil te Jehová».

 «In nok tene xnaqʼtzal tiʼj tzeʼn tuʼn tajbʼen jun computadora wuʼne. In najbʼen jun programa wuʼne ex in nel tnikʼ tiʼj aj t-xi nyukine nwiʼye. Maske in chin sikte, in nonin computadora ex junjuntl tiʼchaq tuʼn nxnaqʼtzane tiʼj Biblia, tuʼn nyoline tiʼj qʼuqbʼil nkʼuʼje kyoj carta moqa kyoj correo electrónico. Tuʼn nyoline kyukʼil qeju in che ten wukʼile, in najbʼen jun tal pizzarón wuʼne kyukʼil junjun letra. In tzaj tyekʼin xjal teyele junjun letra weye. Qa junxitl letra in tzaj yekʼin weye, nim in jaw njaqoʼne qe nwitze, qatzun a letra in tzaj yekʼin weye, in kubʼ nmutzʼine. Ax jlu in bʼant quʼne tuʼntzun tel qnikʼe tiʼj jun yol moqa tiʼj jun txol yol. Ateʼ junjun ermana in che ten nim ambʼil wukʼile ex ya ojtzqiʼn kyuʼn tiʼ waje tuʼn t-xi nqʼamaʼne. At maj noq in xi qtzeʼne qa junxitl yol in tzaj kyqʼamaʼn».

 «Ngane tuʼn wonine tiʼjju in bʼant kyuʼn erman toj congregación. Kukx in nok nconectarin wibʼe kyoj chmabʼil. Qa waje tuʼn t-xi nqʼoʼne jun nyole, in kubʼ ntzʼibʼine ex aj tex qʼet plaj chmabʼil, in jaw tuʼjin juntl erman. Ax ikx, tkyaqil xjaw in nok nconectarin wibʼe kyukʼil junjun erman tuʼntzun tok qkeʼyine programa te JW Broadcasting». a

 «Ma tzikʼ 23 abʼqʼi wuʼne tukʼil síndrome del enclaustramiento. At maj in tzaj nbʼise, pero aj nnaʼne Dios, aj ntene kyukʼil erman ex aj tbʼant junjun tiʼchaq wuʼne toj wajbʼebʼile te Jehová, in nonin wiʼje tuʼn tkubʼ tiʼj bʼis wuʼne. Tuʼnju in che onin erman wiʼje, ma tzikʼ mas te 6 abʼqʼi in chin ajbʼene te precursora auxiliar. In nok tilil wuʼne tuʼn tkubʼ nqʼoʼne jun tbʼanel techel twitz wale Alessandro. Ya o kubʼ mojeʼ ex in najbʼen te ansyan toj congregación. Ax ikx in najbʼen te precursor regular junx tukʼil t-xuʼjil».

 «Nim maj in chin ximane kyiʼj tiʼchaq kbʼantel wuʼne toj Paraíso. Tnejel, waje tuʼn tajbʼen tqʼajqʼajel nwiʼye tuʼn nyoline tiʼj Jehová. Ex waje tuʼn wexe bʼetel tjaqʼ tzeʼ maske noq tuʼn tok nbʼiʼne tqʼajqʼajel twiʼ aʼ. Ma tzikʼ 20 abʼqʼi in najbʼen jun tubo wuʼne tuʼntzun t-xi nkʼaʼne jun tiʼ. Tuʼntzunju, waje tuʼn tpon ambʼil jatumel jaku tzaj ntzyuʼne jun mansan tuʼntzun t-xi nloʼne. Ex tuʼnju te Italia qine, in kubʼ nximane qa ya in chin bʼinchane tiʼj jun tbʼanel wabʼj ik tzeʼn..., ¡jun tbʼanel pizza!».

 «In nonin qʼuqbʼil nkʼuʼje wiʼje tuʼn tten nximbʼetze toj tumel (1 Tesalonicenses 5:8). Mlay bʼant nim tiʼchaq wuʼne toj ambʼil jaʼlo tuʼn tpaj yabʼil, pero qʼuqli nkʼuʼje tiʼj qa ya chʼix tel qʼiʼn. Tuʼntzunju, in chin tzalaje aj nximane tiʼj qa ya atine toj akʼaj twitz Txʼotxʼ. Waje tuʼn tpon ambʼil tuʼn ttzaj nkʼamoʼne ‹chwinqlal axix tok›. Atzun chwinqlal jlu o tzaj ttziyen Jehová tuʼn ttzaj tqʼoʼn qeʼ tjaqʼ Tkawbʼil (1 Timoteo 6:19; Mateo 6:9, 10)».