Testigo de Jehová Clodean ex in nanqʼin Sudáfrica, xi toj hospital tuʼn tok jun operación kwest tiʼj. Ax ikx, tuʼnju tzaj nim yabʼil tiʼj iltoq tiʼj tuʼn tkubʼ t-ximen alkye qʼanbʼil kʼajbʼel tuʼn tiʼj tkyaqilju tzaj qʼamaʼn te. Tej naʼmxtoq tok ex tej otoq tzʼok operación tiʼj, kubʼ tnaʼn siktleʼn, kʼixkʼoj ex estrés. Tej otoq tzikʼ chʼixme 10 semana tej tmeltzʼaj tja, naʼmxtoq tbʼant tuʼn tkubʼ qeʼ ex tuʼnju tzaj COVID-19, mi jun jakutoq pon visitaril te.

 Nyatoq taj Clodean tuʼn ttzaj tbʼis tiʼjx, tuʼntzunju xi tqanin tipumal te Dios tuʼn t-xi tqʼuqbʼaʼn kykʼuʼj txqantl. Tej otoq bʼant tuʼn tkubʼ qeʼ, xi tllamarin jun xuʼj aju terman tvecin, otoq xnaqʼtzan xuʼj lu kyukʼil testigos de Jehová pero kyaj ttzaqpiʼn tuʼn t-xnaqʼtzan. Xi tuʼjin Clodean junjun tbʼanelxix taqikʼ Tyol Dios te xuʼj ex onin jlu tiʼj tuʼn t-xnaqʼtzan juntl maj. Ax ikx xi tqʼamaʼn Clodean te qa ma tzʼok tconectarin tibʼ kyoj chmabʼil, nim jaku tzʼonin tiʼj. Tuʼntzunju, ok tilil tuʼn Clodean tuʼn t-xi tyekʼin te tzeʼn jaku tzʼok tconectarin tibʼ. Ok tconectarin tibʼ xuʼj toj chmabʼil axpe ikx xi tqʼoʼn jun tyol.

 Yajxitl yolin Clodean tukʼil titzʼin xuʼj in xnaqʼtzantoq tukʼil, aju ax ikx tajtoq tuʼn tel tnikʼ tiʼj Tyol Dios. Axpe ikx xi tqʼamaʼn te Clodean qa ojtzqiʼn junjuntl xjal tuʼn aʼyeju kyajtoq tuʼn kyxnaqʼtzan tiʼj Biblia. Tuʼn jlu xi tzyet tuʼn t-xi tqʼoʼn Clodean xnaqʼtzbʼil kye kyaje xuʼj. Pero nya oʼkx qe jlu e xnaqʼtzan.

 Ok tilil tuʼn Clodean tuʼn t-ximen kyiʼj txqantl ex tuʼn jlu xi tzyet tuʼn t-xi tqʼoʼn xnaqʼtzbʼil kye juntl 10 xuʼj. Tuʼn tkyaqil xi tqʼoʼn 16 xnaqʼtzbʼil tiʼj Tyol Dios, ¡ex bʼaj jlu toj ambʼil te pandemia! Ateʼ junjun kyxol xjal lu ya in nok kyconectarin kyibʼ kyoj chmabʼil toj videoconferencia. Tuʼnju o tzʼonin Clodean kyiʼj nim xjal tuʼn tok kyojtzqiʼn Jehová, a jlu o tzʼonin tiʼj tuʼn miʼn t-ximenxix tiʼjju nya bʼaʼn o tzaj toj tanqʼibʼil. In kubʼ tnaʼn qa a Jehová aju Dios «kukx in tqʼuqbʼaʼn qkʼuʼj» tzaj qʼuqbʼante tkʼuʼj tej tok weʼ kywitz nya bʼaʼn, ax ikx te Clodean o txi tqʼuqbʼaʼn kykʼuʼj txqantl (2 Corintios 1:3, 4).

 ¿Tiʼ in tzaj kyqʼamaʼn xuʼj in che xnaqʼtzan tukʼil Clodean tiʼjju o tzʼel kynikʼ tiʼj? In tzaj tqʼamaʼn jun kye jlu: «Nim ma tzʼonin wiʼje. Pero aju mas tbʼanel, aju tej tel nnikʼe tiʼj tbʼi Dios. Tuʼn jlu o chin pon laqʼeʼye mas ttxlaj Jehová». ¿Yajtzun tnejel xuʼj xnaqʼtzan tukʼil Clodean? Ya taj tuʼn tbautisarin. In kubʼ tnaʼn Clodean nim tzalajbʼil tuʼn tkyaqil jlu, ax ikx ya chʼinx tel bʼaʼn operación ok tiʼj.