«Tbʼanelxix aj tkubʼ qnaʼn tzalajbʼil tuʼnju in qoʼx pakbʼal jatumel nya nim kybʼet pakbʼal at». Atzun jlu el tnikʼ Joshua te Estados Unidos tiʼj tej tajbʼen toj tnam Guyana toj jun ambʼil. Ax jlu o kubʼ kynaʼn junjuntl testigo de Jehová tej kypakbʼan toj tnam Guyana te Sudamérica. At nim xjal kyaj tuʼn tel kynikʼ tiʼj Jehová toj tnam Guyana. a ¿Tiʼ xnaqʼtzbʼil jaku tzʼel qiʼn kyiʼj erman in cheʼx pakbʼal toj juntl tnam? ¿Jakupe tzʼel qkanoʼn qe tiʼchaq in bʼant kyuʼn qa in qo ximen tuʼn qxiʼ ajbʼel toj juntl lugar?

 Naʼmxtoq t-xiʼ jun ermano te Estados Unidos ajbʼel toj tnam Guyana, aju Linel tbʼi, tnejel, xiʼ kabʼe seman pakbʼal toj jun lugar te Estados Unidos jatumel nya nim kybʼet pakbʼal at. Tqʼama Linel jlu: «20 qbʼete xiʼ pakbʼal toj jun tal tnam te Virginia Occidental». Ex tqʼamatl jlu: «Chʼexpaj wanqʼibʼile kyoj kabʼe seman lu. In tzalaje tiʼj pakbʼabʼil ex tej ntene kyukʼil erman. Tkyaqil jlu onin wiʼje tuʼn tkubʼ nximane tuʼn wajbʼene mas te Jehová».

 Ax ikx kubʼ t-ximen Garth ex Érica tuʼn kyxiʼ pakbʼal toj juntl tnam. Atz i eʼx Guyana. ¿Tiquʼn? Tzaj tqʼamaʼn Érica jlu: «Otoq tzʼok qojtzqiʼne jun mejebʼleʼn tukʼil nchmile ex otoq cheʼx ajbʼel toj tnam Guyana. Onin qiʼje tej tok qkeʼyine qa in che tzalaj tiʼjju in bʼant kyuʼn». Tzalaj Garth ex Érica tej kyajbʼen oxe abʼqʼi toj tnam Guyana ex in kyqʼamaʼn «qa tbʼanel ok jlu ex mlayx tzikʼ tnaʼl kyuʼn». Tqʼama Garth jlu: «O xiʼye ajbʼel toj juntl tnam ex tbʼanel ela toj qwitze». Tej tikʼ chʼintl ambʼil, i eʼx toj Xnaqʼtzbʼil te Galaad, atzun jaʼlo in che ajbʼen toj tnam Bolivia.

 In tzaj tqʼamaʼn Biblia qa bʼaʼn tuʼn qanqʼin kyukʼil nya nim tiʼchaq (Hebreos 13:5). Ax ikx, in tzaj tqʼamaʼn qa bʼaʼn tuʼn tel qpaʼn ambʼil tuʼn qximen kyiʼj junjun tiʼchaq nim kyoklen naʼmxtoq t-xi qbʼinchaʼn (Lucas 14:26-33). Ex atzun jlu kbʼantel quʼn qa in qo ximen tiʼj tuʼn qxiʼ ajbʼel toj juntl tnam. Tqʼama Garth jlu: «Naʼmxtoq qxiʼye Guyana, ok tilil quʼne tuʼn qanqʼine kyukʼil nya nim tiʼchaq. Xi qkʼayine qkʼaẍjele, qjaye ex junjuntl tiʼchaq mintiʼx tajbʼen qeye. Xi tiʼn nim abʼqʼi tuʼn tbʼant jlu quʼne. Akux in pon ambʼil tuʼn qxiʼye ajbʼel Guyana, tkyaqil abʼqʼi o xiʼye pakbʼal toj tnam lu tuʼntzun miʼn tikʼ tnaʼl quʼne qa qaje tuʼn qxiʼye ajbʼel atz».

 Ax ikx bʼaʼn tuʼn qximen tiʼj tzeʼn qo anqʼil toj juntl tnam. Ateʼ junjun tnam in tzaj tqʼoʼn ley ambʼil kye xjal te juntl tnam tuʼn kyaqʼunan tojxju tnam jatumel in che pon. Atzun kye junjuntl erman mintiʼ in kyaj kytzaqpiʼn kyaqʼun ex in che aqʼunan en línea toj jun computadora. Atzun junjuntl in kubʼ kyximen tuʼn kymeltzʼaj toj kytnam tuʼntzun kyaqʼunan toj jun ambʼil. In meltzʼaj Paul ex Sinead aqʼunal toj tnam Irlanda jun maj toj abʼqʼi. Onin jlu kyiʼj tuʼn kypakbʼan nim ambʼil toj tnam Guyana. Axpe ikx, e kyaj ten juntl wuq abʼqʼi tej tul itzʼj jun tal kymeʼjel. Tuʼn tkyaqil, e tzalaj tej kyajbʼen 18 abʼqʼi toj tnam Guyana.

 In tzaj tqʼamaʼn Salmo 37:5 jlu: «Oqxenanx tibʼa tuj tqʼabʼ Qman, qeʼk tkʼuʼja tiʼj ex tzul onil teya». Xi kyqanin Christopher ex Lorissa te tnam Estados Unidos onbʼil te Jehová tuʼn kyxiʼ ajbʼel toj juntl tnam. Ax ikx, e yolin tiʼjju kbʼantel kyuʼn aj kyxiʼ ajbʼel toj juntl tnam tej tok kykʼulbʼil te Jehová ex kubʼ kytzʼibʼin aju jaku tzʼonin kyiʼj ex aju mlay tzʼonin kyiʼj. Tzaj bʼaj kykʼuʼj tuʼn tbʼant juntl yol kyuʼn, tuʼntzunju kubʼ kyximen tuʼn kyxiʼ Guyana tuʼnju mas in che yolin xjal toj yol inglés toj tnam aju.

 Ax ikx e ximen tiʼjju in tzaj tqʼamaʼn Proverbios 15:22, jatumel in tzaj tqʼamaʼn jlu: «Mintiʼ in japun aju in kubʼ kyximan xjal qa mi aʼl jun qʼol kyconsej; ex qa at nim qʼol consej bʼaʼn nneʼla jlu». Tuʼntzunju, xi kytzʼibʼin te sucursal in nok tqʼoʼn twitz tiʼj pakbʼabʼil in bʼant toj tnam Guyana tuʼntzun t-xi kyqanin tiʼ jaku bʼant kyuʼn ex tuʼn t-xi kyqʼamaʼn tiʼ in bʼaj kyiʼj. b Ax ikx, xi kyqanin qa at cheʼw moqa kyaq, xi kyqanin tqanil kyiʼj doctor ex tiʼj kykostumbr xjal. Xi tqʼoʼn sucursal tzaqʼwebʼil tiʼj kyxjel ex tqʼama tzeʼn tuʼn kyyolin kyukʼil ansyan te lugar jatumel tuʼn kypon.

 Ya in najbʼen Linel, aju ma qo yolin tiʼj te superintendente toj tnam Guyana. Naʼmxtoq t-xiʼ ajbʼel toj tnam lu, ax ikx te ximen tiʼjju in tzaj tqʼamaʼn Proverbios 15:22. Tqʼama jlu: «Nya oʼkx xi nkʼuʼne chʼin pwaq naʼmxtoq nxiʼye ajbʼel, sino ax ikx in yoline kyukʼil erman otoq cheʼx ajbʼel toj juntl tnam. Ax ikx, xi nqʼamaʼne kye toj njaye, kye ansyan ex te ansyan in bʼet kyojele Ja te Chmabʼil aju otoq kubʼ nximane. Ex jaw wuʼjine junjun xnaqʼtzbʼil in che etz toj quʼj, aju in che yolin tiʼjju tuʼn qxiʼ ajbʼel jatumel kyaj erman onbʼil».

 Ateʼ nim erman tnejel in cheʼx visitaril tnam naʼmxtoq kyxiʼ ajbʼel atz ex nim o tzʼonin jlu kyiʼj. Tqʼama Joseph ex Christina jlu: «Tej qxiʼye tnejel maj toj tnam Guyana, o tene oxe jaw. Toj ambʼil lu, el qnikʼe tiʼj tzeʼnxix tnam. Tibʼajxi jlu, o meltzʼaje qjaye, bʼaj qbʼinchaʼne qe tiʼchaq qeye ex o xiʼye toj tnam Guyana».

 Qa qaj tuʼn qtzalaj aj qxiʼ ajbʼel toj juntl tnam, il tiʼj tuʼn tbʼant junjun chʼixpubʼil quʼn ex tuʼn qnaqʼet tiʼj kykostumbr xjal. Jun techel, aqeju in che anqʼin jatumel at cheʼw ex in cheʼx ajbʼel toj jun lugar jatumel at kyaq, in nel kynikʼ tiʼj qa at nim zancudo, qe tal us ex junjuntl tal txkup. Tqʼama Joshua jlu, aju ma qo yolin tiʼj: «Nyatoq naqʼli qine tuʼn tok nkeʼyine qe zancudo ex junjuntl tal txkup. Ex mas matij moqa nimaq qe tal txkup lu toj tnam Guyana. Bueno, atzun weye ok nkeʼyin. Pero chebʼe chebʼe in naqʼete tiʼj lugar. Ax ikx, el nnikʼe tiʼj qa mlayxix che ten tal txkup toj qja qa in bʼaj qlimpiarin. A t-xilen jlu qa il tiʼj tuʼn tbʼaj qtxʼajoʼn qe laq, tuʼn tbʼaj qlimpiarin qe tiʼchaq toj qja ex tuʼn tetz qiʼn tzʼis».

 Tuʼn qnaqʼet toj juntl tnam, ax ikx il tiʼj tuʼn qnaqʼet tiʼj kywa xjal ex tuʼn tbʼant qbʼinchan tiʼj. Tzaj tnaʼn Joshua jlu: «Xi nqanine tukʼil wukʼile toj kwart kye junjun erman tuʼn ttzaj kyyekʼin qeye tiʼ in kux kyqʼoʼn te tkʼokʼjal kywa. Tej tbʼant qbʼinchane tiʼj jun akʼaj wabʼj, e tzaj qtxkoʼne junjun erman tuʼntzun t-xi kyprobarin. Tuʼnju bʼant jlu quʼne, e ok qojtzqiʼne qe erman ex e ten mas qamiwe».

 Aj qyolin tiʼj kykostumbr xjal, tqʼama Paul ex Kathleen jlu: «Junxitl kymod xjal ex alkye tten in bʼaj kyxbʼalumin kyibʼ toj jun lugar jatumel at nim kyaq. Tuʼntzunju, iltoq tiʼj tuʼn tkubʼ qin qibʼe ex tuʼn tbʼant junjun chʼixpubʼil quʼne. Pero mintiʼ ikʼ tnaʼl quʼne aju in tzaj tqʼamaʼn Tyol Dios. Tuʼnju o naqʼete tiʼj kykostumbr xjal, onin qiʼje tuʼn qtene kyukʼil erman ex onin qiʼje toj pakbʼabʼil».

 Tqʼama Joseph ex Christina tiʼ kubʼ kynaʼn ex axju in kubʼ kynaʼn txqantl erman. Kyqʼama jlu: «Mas nim kʼiwlabʼil tzaj qkʼamoʼne kywitzju nya bʼaʼn o qo ok weʼye kywitz. Tej qetze toj lugar jatumel in qo anqʼintoqe, onin qiʼje tuʼn tel qnikʼe tiʼj alkye mas nim toklen. Aqeju tiʼchaq ok qqʼoʼne kyoklen tnejel, ya mintiʼxix in nok qqʼoʼne kyoklen jaʼlo. Tej tikʼ junjun tbʼanel tiʼchaq qiʼje, onin jlu tuʼn t-xi qqʼoʼne aju mas tbʼanel te Jehová. Mas o tzalaje tiʼj qanqʼibʼile».

 Tqʼama Érica jlu: «El qnikʼe tiʼj tiʼ t-xilen tuʼn tok qeʼ qkʼuʼj tiʼj Jehová. Kubʼ qnaʼne qa mas onin Jehová qiʼje. Ex tkyaqilju ikʼ toj qanqʼibʼile, onin qiʼje tuʼn tten mas tzalajbʼil toj qmejebʼleʼne».