In bʼant nim aqʼuntl kyuʼn testigos de Jehová atz Bulgaria, in xi kyxnaqʼtzan aju axix tok tiʼj Dios ex tiʼj Tyol kye xjal. Tuʼn tbʼant aqʼuntl lu kyuʼn, ateʼ junjuntl testigos de Jehová te junjuntl tnam o che pon ajbʼel toj tnam Bulgaria atxix toj abʼqʼi 2000. ¿Alkye junjun tiʼ in che ok weʼ junjun twitz aj kypakbʼan toj juntl tnam? ¿Tbʼanelpe aj qxiʼ ajbʼel toj juntl lugar? Atzun jlu in tzaj kyqʼamaʼn junjun o cheʼx anqʼil Bulgaria.

 In tzaj tqʼamaʼn Darren jlu aju in nanqʼintoq toj tnam Inglaterra: «Kukx qajtoqe tuʼn qxiʼye onil toj juntl tnam. Tej otoqxi chin kubʼ mojeʼye tukʼil nxuʼjile Dawn, o xiʼye anqʼil atz Londres tuʼn qpakbʼane kye xjal in che yolin ruso. Nimku maj kubʼ qximane tuʼn qxiʼye anqʼil toj juntl tnam, pero bʼaj junjun tiʼchaq ex tuʼn jlu ya mintiʼ o xiʼye. Kubʼ qximane qa ya mlaytoq bʼant jlu quʼne, pero onin jun qamiwe qiʼje tuʼn tel qnikʼe tiʼj qa otoq che chʼexpaj qe tiʼchaq toj qanqʼibʼile ex qa jakutoq qoʼxe ajbʼel toj juntl lugar». E jyon Darren ex Dawn tiʼj jun lugar jatumel kyajtoq xjal onbʼil tuʼn tel kynikʼ tiʼj Tyol Dios. Ex e xiʼ anqʼil toj tnam Bulgaria toj 2011.

 Aju tzalajbʼil in kubʼ kynaʼn qeju o cheʼx ajbʼel toj juntl tnam, o tzʼonin kyiʼj qeju mintiʼtoq in kubʼ kyximen tuʼn kyxiʼ ajbʼel toj juntl lugar. In tzaj tqʼamaʼn Giada jlu aju in nanqʼintoq toj tnam Italia tukʼil Luca, aju tchmil: «E ok wojtzqiʼne qe testigo de Jehová in che ajbʼentoq atz Sudamérica ex África, ex nimtoq in che tzalaj. Pon toj wanmiye tej tok nbʼiʼne tzeʼn in che onin kyiʼj xjal tuʼn tel kynikʼ tiʼj Dios ex onin wiʼje tuʼn kybʼant chʼixpubʼil wuʼne toj wajbʼebʼile te Jehová».

 In che anqʼintoq Tomasz ex Veronika atz República Checa kyukʼil kabʼe kykʼwal, aju Klara ex Mathias kybʼi, ex e xiʼ anqʼil atz Bulgaria toj 2015. ¿Tiquʼn kubʼ kyximen tuʼn tbʼant jlu kyuʼn? In tzaj tqʼamaʼn Tomasz jlu: «O xnaqʼtzane tiʼjju o bʼant kyuʼn junjun erman, ax ikx aju o bʼant kyuʼn junjun toj qjaye. Nya oʼkxju, ax ikx o ximane tiʼj junjun tiʼ o tzikʼ toj kyanqʼibʼil. O jaw labʼine tiʼjju tzalajbʼil in kubʼ kynaʼn erman ex nim maj o yoline tiʼj jlu kyukʼil toj qjaye». Jaʼlo, in tzalaj familia lu tuʼnju in che pakbʼan toj tnam Montana, atz Bulgaria.

 Testigo de Jehová Linda ex xiʼ anqʼil atz Bulgaria. In tzaj tqʼamaʼn jlu: «Ma tzikʼ nim abʼqʼi tej in xaje visitaril tnam Ecuador ex e ok wojtzqiʼne qe erman otoq che pon pakbʼal atz. Onin jlu wiʼje tuʼn tkubʼ nximane qa ax ikx weye jakutoq chinxe ajbʼel jatumel kyaj erman mas onbʼil». Ax ikx, ok tqʼoʼn jun mejebʼleʼn te Finlandia twitz tiʼj techel kubʼ kyqʼoʼn txqantl, aʼyeju Petteri ex Nadja kybʼi. In tzaj kyqʼamaʼn jlu: «Toj kʼloj okslal jatumel ok qchmon qibʼe, ate junjun pakbʼal otoq cheʼx anqʼil toj juntl lugar tuʼntzun t-xi kyxnaqʼtzan aju in tzaj tqʼamaʼn Tyol Dios kye xjal. Kukxtoq in che yolin tiʼj tzalajbʼil kubʼ kynaʼn kyoj ambʼil aju ex tzaj kyqʼamaʼn qa e ok abʼqʼi lu te mas tbʼanel toj kyanqʼibʼil».

 Nim toklen tuʼn tbʼaj kybʼinchaʼnxix kyten qeju kyaj tuʼn kyxiʼ ajbʼel toj juntl tnam (Lucas 14:28-30). In tzaj tqʼamaʼn Nele te tnam Bélgica jlu: «Tej tkubʼ nximane tuʼn nxiʼye ajbʼel toj juntl tnam, in naʼne Dios ex tzaj njyone junjun xnaqʼtzbʼil kyoj quʼj aju in yolin tiʼj jlu. E kubʼ nxnaqʼtzane ex ok tilil wuʼne tuʼn tel nnikʼe tiʼj alkyeqe tiʼchaq tuʼn tbʼant wuʼne tuʼntzun nxiʼye anqʼil toj juntl tnam».

 Te tnam Polonia Kristian ex Irmina, pero ma tzikʼ mas te 9 abʼqʼi in che anqʼin atz Bulgaria. Aj kyximen tiʼjju o bʼaj kyiʼj, in tzaj kyqʼamaʼn qa nim onin kyiʼj tej kyajbʼen toj jun grupo te yol búlgara te tnam Polonia. Bʼant jlu kyuʼn tej naʼmxtoq kyxiʼ atz Bulgaria, ex onin jlu kyiʼj tuʼn tbʼant yol kyuʼn. In tzaj kyqʼamaʼn jlu: «El qnikʼe tiʼj qa in xqʼuqin Jehová qiʼj ex qa in tzaj tqʼoʼn tkyaqilju at tajbʼen qe aj qxiʼ ajbʼel toj juntl lugar. Tbʼanel aj tok qqʼoʼn qwitz tiʼj jlu. Ax ikx aj t-xi qqʼamaʼn jlu te Jehová: ‹Lu qine lu, chin t-samanxa›, jaku che bʼant tiʼchaq quʼn aʼyeju mintiʼ otoq kubʼ qximen» (Isaías 6:8).

 Te tnam Suiza Reto ex Cornelia. Kubʼ kyximen tuʼn kyanqʼin tukʼil nya nim tiʼchaq tuʼntzun t-xi kykʼuʼn pwaq tuʼn tajbʼen kyuʼn aj kyxiʼ toj juntl lugar. In tzaj kyqʼamaʼn jlu: «Tej atxtoq jun abʼqʼi tuʼn qxiʼye toj tnam Bulgaria, o xaje jun seman keʼyil tnam tuʼntzun tok qojtzqiʼne. Atz o yoline tukʼil jun mejebʼleʼn in che ajbʼen te misionero ex tzaj kyqʼoʼn junjun tbʼanel consej qeye». Xi kybʼiʼn Reto ex Cornelia aju xi qʼamaʼn kye, ex ma tzikʼ mas te 20 abʼqʼi in che ajbʼen atz Bulgaria.

 Aʼyeju in cheʼx anqʼil toj juntl tnam il tiʼj tuʼn kynaqʼet kyiʼj akʼaj tiʼchaq ex at maj kwest jlu (Hechos 16:9, 10; 1 Corintios 9:19-23). Jun tiʼ kwest in nela toj kywitz nimku aju tuʼn tbʼant jun yol kyuʼn. In tzaj tqʼamaʼn Luca jlu aju ma qo yolin tiʼj: «Tbʼanel in nela te qeye tuʼn t-xi qqʼoʼne jun qyole toj qexe qyol kyoj chmabʼil, pero at maj kwest ela toj qwitze tuʼn tkubʼ qbʼinchaʼne jun qyole toj yol búlgaro maske nya nim tqan. Kubʼ qnaʼne qa jun tal kʼwal qoʼye. Noqtzun tuʼnj, mas tbʼaneltoq kyyol kʼwal in xi kyqʼoʼn kyoj chmabʼil».

 In tzaj tqʼamaʼn Ravil te Alemania jlu: «Nim in sikte tej nxnaqʼtzane tiʼj yol. Pero kukxtoq in tzaj nnaʼne jlu: ‹Miʼn tzaj tqʼoja qa in nel tzpeta, mas bʼaʼn qa ma txi ttzeʼna›. Tej wok weye twitz jun tiʼ, mintiʼ ok nqʼoʼne te jun nya bʼaʼn, sino kubʼ nximane qa in bʼaj jlu qiʼj aj qajbʼen te Jehová».

 In tzaj tqʼamaʼn Linda jlu aju ma qo yolin tiʼj: «Kwest tuʼn tbʼant jun yol wuʼne ex nya fácil tuʼn tbʼant yol búlgaro quʼn. Tuʼntzunju, kubʼ nximane tuʼn ya miʼn nxnaqʼtzane tiʼj yol. Aj mintiʼ in bʼant tyolina kyukʼil xjal ex aj mintiʼ in nel tnikʼa tiʼjju in tzaj kyqʼamaʼn teya, in kubʼ tnaʼna qa tjunalxa ata. Pero tuʼn kukx tten jun tbʼanel wamiwbʼile tukʼil Jehová, kubʼ nxnaqʼtzane tkyaqil toj yol sueco, aju weye nyol. Tej tikʼ ambʼil, bʼant yol búlgaro wuʼne noq tuʼnju e onin erman wiʼje».

 Juntl tiʼ jaku qo ok weʼ twitz, aju bʼis. Aʼyeju in cheʼx anqʼil toj juntl tnam in kyaj kytzaqpiʼn qe toj kyja ex qe kyamiw. In tzaj tqʼamaʼn Eva jlu, aju xiʼ ajbʼel atz Bulgaria junx tukʼil tchmil, aju Yianis tbʼi: «Tnejel kubʼ nnaʼne qa njunalxe atine. Pero kubʼ qximane tuʼn kukx qyoline kyukʼil toj qjaye ex kyukʼil qamiwe. Ax ikx o che kanet akʼaj qamiwe tzalu».

 In tzaj tqʼamaʼn jun mejebʼleʼn te Suiza junjun tiʼ o che ok weʼ twitz, aju Robert ex Liana kybʼi: «Kwest ela te qeye aju kyanqʼibʼil xjal ex aju kyyol. Nyatoq bʼantni qtene aj tpon ambʼil te cheʼw tzalu». Noqtzun tuʼnj, tuʼnju o ten t-ximbʼetz mejebʼleʼn lu toj tumel ex tuʼnju in xi kytzeʼn aju in bʼaj kyiʼj, nim o tzʼonin kyiʼj tuʼn kukx kyajbʼen te Jehová atz Bulgaria kyoj qeju 14 abʼqʼi tzma in che ikʼ.

 In tzaj tqʼamaʼn Lilly tiquʼn tbʼanel tuʼn qxiʼ pakbʼal jatumel mintiʼxix qe pakbʼal at: «O tzʼok nkeʼyine tzeʼn o tzʼonin Jehová wiʼje, mintiʼwtlo o tzʼok nkeʼyine jlu noqwit ax in kyaj tene toj weye ntnam. Tzalu, mas jaku chin onine kyiʼj txqantl ex in nonin jlu wiʼje tuʼn wok laqʼeʼye mas ttxlaj Jehová ex tuʼn ntzalaje». Ax jlu in tzaj tqʼamaʼn Ravil, aju tchmil Lilly. Chi: «Mintiʼ juntl anqʼibʼil mas tbʼanel ik tzeʼn jlu. Jun tbʼanel qoklen aj tok qojtzqiʼn qe erman te junxichaq tnam, aʼyeju at kyojtzqibʼil tuʼn kyqʼon xnaqʼtzbʼil tiʼj Tyol Dios. O tzʼel wiʼne nim xnaqʼtzbʼil kyiʼj».

 Tuʼnju o kubʼ kyximen erman tuʼn kyonin ex tuʼn kyxiʼ ajbʼel kyoj junjuntl lugar, o tzʼonin tuʼn t-xi pakbʼet tbʼanel tqanil tiʼj Tkawbʼil Dios «tuj tkyaqil twitz txʼotxʼ» (Mateo 24:14). Noq tuʼnju o bʼant jlu kyuʼn erman o cheʼx ajbʼel atz Bulgaria, o tzʼok kykeʼyin tzeʼn o txi tqʼoʼn Jehová tkyaqilju tajbʼil kyanmi ex tzeʼn o tzʼonin kyiʼj tuʼn tel bʼaʼn tkyaqilju o kubʼ kyximen (Salmo 20:1-4).