«Mintiʼ kubʼ nximane qa nimtoq chin ajbʼele te Jehová». Atzun jlu in kubʼ tnaʼn Gwen, jun ermana te Inglaterra in ajbʼen toj Albania toj jun lugar jatumel mintiʼ qeʼxix pakbʼal. a

 A jun Gwen, jun kyxol qe testigo de Jehová o che pon onil atz Albania, tuʼn ttzaj kyiʼn kyqʼinumabʼil nasyon (Ageo 2:7). ¿Tiquʼn o cheʼx anqʼil atztzu? ¿Tiʼ o bʼant kyuʼn tuʼn kyxiʼ toj tnam lu? Ex ¿tiʼ o tzʼonin kyiʼj tuʼn tikʼx nya bʼaʼn kyuʼn?

 Kykyaqil qeju o cheʼx onil atz Albania, kʼujlaʼn Jehová kyuʼn ex kyaj tuʼn kyonin tuʼn tel kynikʼ xjal tiʼj.

 Bʼant junjun chʼixpubʼil kyuʼn tej naʼmxtoq kyxiʼ ajbʼel, a jlu onin kyiʼj tuʼn kyex twitz nya bʼaʼn e ok weʼ twitz toj juntl tnam. Tzaj tqʼamaʼn Gwen: «Aju bʼant wuʼne tnejel, inxe toj jun grupo in che yolin toj albanés atz jatumel in chin anqʼine. Yajxitl, inxe toj jun asamblea atz Albania. Tej tbʼet ambʼil in meltzʼaje jun ambʼil tuʼn tbʼant-xix yol albanés wuʼne».

 Atzunte Manuela, jun ermana te Italia, xiʼ ajbʼel toj jun lugar tex ttnam tej qʼiʼntoq 23 abʼqʼi tuʼn. Tuʼn tonin jatumel nya nim kybʼet erman. Tqʼama jlu: «Kyaje abʼqʼi in ajbʼene toj lugar lu. Ok nbʼiʼne qa mintiʼ qeʼxix pakbʼal atz Albania. Tuʼntzunju kubʼ nximane tuʼn wajbʼene junjun xjaw te precursora toj tnam lu».

 Qʼiʼntoq 7 abʼqʼi tuʼn Federica tej tok tbʼiʼn jun tqanil tiʼj Albania toj jun asamblea. In tzaj tnaʼn jlu. Etz tqʼamaʼn ermano toj tqanil qa at nim xjal in xi tzyet tuʼn kyxnaqʼtzan atz Albania ex qa aqeju kygan ya in che pon kyoj chmabʼil. In nok tene qʼamalte kye nmane qa wajtoqe tuʼn nxiʼye ajbʼel atz Albania. Mintiʼ ximen kyuʼn qa kxel nqʼamaʼne jlu kye. Pero tzaj tqʼamaʼn nmane. Qa ikju, qʼamanxa te Jehová ex qa ax tajbʼil, tzul ttzaqʼweʼn tnaʼj Diosa. Tej tikʼ chʼin ambʼil, tzaj qʼamaʼn kye toj njaye tuʼn kyxiʼ ajbʼel atz Albania. Ma tzikʼ nim ambʼil ex kukx in najbʼen Federica atz Albania. In che ajbʼen toj tkyaqil ambʼil tukʼil tchmil aju Orges tbʼi.

 Te Italia Gianpiero ex Gloria. Xiʼ mejebʼleʼn lu atz Albania tej tjubilarin Gianpiero. Tqʼama Gianpiero lu: «Atz e jaw chʼiy qkʼwale atz Italia. I eʼx oxe ajbʼel jatumel mintiʼ qexix pakbʼal. At jun xnaqʼtzbʼil etz aju tok tbʼi: ‹¿Puede usted pasar a Macedonia?›, aju etz toj jun Xqʼuqil, onin qiʼje tuʼn tbʼant axju quʼne. O kubʼ tene ximel tiʼj tiʼ jakutoq bʼant quʼne tuʼn tkanin pwaq in tzaj qʼoʼn weye tuʼn qanqʼine atz Albania».

 Tuʼn qxiʼ ajbʼel jatumel mintiʼ qeʼxix pakbʼal, tbʼanel tuʼn qximen tiʼ jaku bʼant ex tuʼn tbʼant junjun chʼixpubʼil (Lucas 14:28). Jun kyxol qeju il tiʼj tuʼn tbʼaj ximet aju alkye kyaqʼun ktel tuʼntzun kyanqʼin. Ik tzeʼn te Gwen, tej atxtoq Inglaterra, xiʼ anqʼil tukʼil ttzik tuʼn t-xi tkʼuʼn chʼin tpwaq. Ax ikx te Sophia tukʼil Christopher te Inglaterra qe, kyqʼama jlu: «Xi qkʼayine qkarroye ex junjuntl tiʼchaq qajtoqe tuʼn qtene jun abʼqʼi Albania, pero e kyaj ten mas ambʼil».

 Ateʼ junjun pakbʼal, tnejel in cheʼx anqʼil jun ambʼil atz Albania. Yajxitl in cheʼx juntl ambʼil aqʼunal toj kytnam. Ajtzun tkanet chʼin kypwaq in che meltzʼaj Albania. Atzun jlu bʼant tuʼn Eliseo ex Miriam. Tqʼama Eliseo lu: «Ateʼ nim turista jatumel tzajni Miriam. Tuʼntzunju nya kwest tuʼn tkanet qaqʼun toj qʼijl. Tkyaqil abʼqʼi oʼkx oxe xjaw in qo aqʼunane. Atzun kyoj 9 xjaw in qo anqʼine tiʼjju otoq kambʼet quʼne. Toj jweʼ abʼqʼi bʼant jlu quʼne».

 Aqeju erman in cheʼx ajbʼel toj juntl tnam il tiʼj tuʼn kynaqʼet kyiʼj junjuntl tiʼchaq. Pero aqeju consej in tzaj kyqʼoʼn erman in che anqʼin toj lugar in che onin kyiʼj. In tzaj tqʼamaʼn Sophia jlu, aju ma qo yolin tiʼj: «Toj tqʼij cheʼw mas cheʼw qe ja atz Albania twitzju jatumel in chin anqʼintoqe. In nok nqʼoʼne nwitze tiʼj, tiʼ in najbʼentoq kyuʼn ermana aj ttzaj cheʼw. Onin jlu wiʼje tuʼn tel nnikʼe tiʼj tiʼ jakutoq tzʼajbʼen wuʼne». Xiʼ Grzegorz ex Sona, aju t-xuʼjil ajbʼel atz Prizren te Kosovo. b Tqʼama Grzegorz jlu: «Mintiʼ in jaw kynimen kyibʼ erman, in kubʼ kyyekʼin tbʼanel kymod ex in kubʼ kyyekʼin nim kypasens. Nya oʼkx in tzaj kyxnaqʼtzaʼn kyyol qeye, sino ax ikx, in tzaj kyyekʼin junjuntl tiʼchaq. Jun techel, in tzaj kymaʼn jatumel mas varat qe tiʼchaq. Ex tzeʼn jaku tzaj qlaqʼoʼne qwaye toj plas».

 Aqeju erman in cheʼx ajbʼel kyoj junjuntl lugar, in che ok te kyamiw erman ex in nok kyojtzqiʼn junjuntl kostumbr. In tzaj tqʼamaʼn Sona jlu: «O tzʼok nqʼoʼne nwitze tiʼj qa nimxix tipumal tkʼujlabʼil Jehová. In chʼiy qʼuqbʼil nkʼuʼje aj tok nqʼoʼne nwitze kyiʼj chʼixpubʼil o bʼant kyuʼn erman tuʼn kyajbʼen te Jehová. In nel qnikʼe tiʼj alkye qoklene at toj ttnam Jehová ex in kubʼ qnaʼne qa at qajbʼene toj. In qo ajbʼene te Jehová kyukʼil erman ex jaʼlo, ya o che ok te qamiwe» (Marcos 10:29, 30). Tqʼama Gloria jlu: «Tbʼanelxix in nela toj nwitze aj nximane kyiʼj ermana, aqeju ikʼx ikʼbʼil kyuʼn tuʼn kykʼujlabʼil tiʼj Jehová tej kyok lipen vesin kyiʼj testigo de Jehová».

 Juntl xnaqʼtzbʼil jaku tzʼel kyiʼn erman in cheʼx ajbʼel toj juntl tnam aju aj tel kynikʼ kyiʼj junjuntl tiʼchaq toj tnam jatumel in che pon. Jun techel, o tzʼel kynikʼ tiʼj qa mas in che tzalaj aj kyxiʼ ajbʼel toj juntl tnam tuʼnju in xi kyqʼoʼn mas te Jehová. Tqʼama Stefano jlu: «Tej in chin pakbʼantoqe toj tnam jatumel tzajni qine, chʼixmi tkyaqil maj, chʼin ambʼil in chin yolintoqe toj intercomunicador. Atzun kye xjal te Albania, kygan tuʼn kyyolin nim ambʼil. Ex mas qa at kycafé tiʼj. Tuʼnju nim in chin tzaj xobʼe tuʼn nyoline, mintiʼtoq in nel nnikʼe tiʼ mastl tuʼn t-xi nqʼamaʼne. Pero tej tbʼet ambʼil, mas in ximane kyiʼj xjal. Ex jaʼlo, ngane tuʼn nyoline kyukʼil. ¡Mas in chin tzalaje tiʼj pakbʼabʼil!».

 Te Estados Unidos Leah ex William, aju tchmil, ex i eʼx ajbʼel atz Albania. Tqʼama Leah jlu: «Tuʼnju in qo ajbʼene tzalu, ma jaqet mas qnabʼile. Ax ikx ma tzʼonin qiʼje tuʼn qbʼinchane xtalbʼil, tuʼn tok qqʼoʼne kyoklen txqantl ex tuʼn kyten qamiwe. O bʼant qpakbʼane toj junjuntl tten ex tuʼn kyximen xjal tiʼjju in tzaj tqʼamaʼn Biblia». Tqʼama William jlu: «Chʼixmi kykyaqil xjal in che ul Albania, tbʼanel in nel ttzi mar toj kywitz. Bay weʼ mas ngane tuʼn nxiʼye kywiʼ witz te Albania. Pero aju mas ngane tiʼj lugar lu, aʼye xjal. Toj nimku tnam jatumel in qo pakbʼane, oʼkx o qoʼxe pakbʼal kyoj junjun campaña. Tuʼntzunju, aj qxiʼye pakbʼal kyoj lugar lu, at maj oʼkx in qo yoline tukʼil kabʼe moqa oxe familia».

 Pero aju mas in che tzalaj erman lu tiʼj aju aj tkubʼ kybʼiʼn xjal tbʼanel tqanil. (1 Tesalonicenses 2:19, 20). Xiʼ Laura anqʼil atz Albania tej txinxtoq ex naʼmxtoq tkubʼ mojeʼ. Tqʼama jlu: «In najbʼene jun ambʼil toj tnam Fier, ex tej tikʼ mas chʼin te kabʼe abʼqʼi, e ok mas te 120 xjal te pakbʼal. Kyxol qe xjal lu, 16 xi nqʼoʼne xnaqʼtzbʼil kye». At juntl ermana Sandra tbʼi, tqʼama jlu: «Xi npakbʼaʼne te jun xuʼj in naqʼunantoq toj merkad, bautisarin ex meltzʼaj toj ttnam. Ex ok nbʼiʼne qa otoq t-xi tzyet tuʼn t-xi tqʼoʼn xnaqʼtzbʼil kye 15 xjal».

 Ma tzikʼ ambʼil kyxilen junjun erman ajbʼel atz Albania. Kukx ateʼ atztzu ex in che tzalaj. At maj, yajxi in che jaw tzalaj aj tok kybʼiʼn qa ateʼ junjun xjal, ya in che ajbʼen te Jehová (Eclesiastés 11:6). In tzaj tqʼamaʼn Christopher jlu, aju ma qo yolin tiʼj: «Xi tzyet tuʼn t-xi nqʼoʼne xnaqʼtzbʼil te xjal, tej tzmatoq in chin pone atz Albania. Kanet xjal lu wuʼne yajxitl ex nim in jaw tzalaje tej ttzaj tqʼamaʼn weye aju o xnaqʼtzane tiʼj. Atzun jaʼlo, o che bautisarin junx tukʼil t-xuʼjil». Ax ikx tzaj tqʼamaʼn Federica jlu, aju ma qo yolin tiʼj: «Ul jun ermana qʼolbʼel weye toj jun congregación ex tzaj tqanin qa naʼnx wuʼne. Tzaj tqʼamaʼn qa otoq tzikʼ 9 abʼqʼi tej npakbʼane te. Tej otoq chinxe toj juntl tnam, xi tzyet tuʼn t-xnaqʼtzan ex bautisarin. Otoq kubʼ nximane qa mintiʼxtoq tajbʼen aju otoq bʼant quʼne atz Albania, ¡pero nya ax toktoq nxime jlu!»

 Nim in che tzalaj erman o cheʼx ajbʼel Albania ex Kosovo. O tzʼok kyqʼoʼn kywitz tiʼj alkye tten o che tzaj kʼiwlaʼn tuʼn Jehová ex in che tzalaj tuʼn jlu. Ma tzikʼ nim ambʼil at Eliseo atz Albania ex in tzaj tqʼamaʼn jlu: «Chʼixmi kykyaqil xjal in kubʼ kysbʼun kyibʼ aj tkubʼ kyximen qa a tbʼanel anqʼibʼil ju aju in kyqʼamaʼn xjal. Pero nya ax tok jlu. Sino atz in nok qanqʼibʼil te tbʼanel qa ma chex qbʼiʼn qe nabʼil in tzaj tqʼoʼn Jehová ex tuʼnju in chin ajbʼene atz Albania, in nonin jlu wiʼje tuʼn tten jun tbʼanel wanqʼibʼile. In naʼne qa at wajbʼene ex at woklene. At nim wamiwe ax jlu in bʼant kyuʼn». Chʼixmi ax t-ximbʼetz Sandra jlu, tqʼamaʼn jlu: «Tej nxiʼye onil kubʼ nnaʼne qa in tzajtoq tqʼoʼn Jehová ambʼil weye tuʼn tjapun twiʼ nxime aju tuʼn woke te misionera. Bʼajx tzaj nbʼise tuʼnju o chin ule ajbʼel atz Albania. Bʼajxtoq kubʼ nnaʼne nim tzalajbʼil ik tzeʼn jlu».