Tbʼaneltoq kyanqʼibʼil Madián ex Marcela toj tnam Medellín (Colombia). Nimtoq twiʼ tkʼuʼj Madían in tzaj chjoʼn, tuʼntzunju in che anqʼintoq toj jun tbʼanel ja. Pero onin jun tiʼ kyiʼj tuʼn tkubʼ kyximen tiʼ in bʼanttoq kyuʼn toj kyanqʼibʼil. Tuʼnju testigo de Jehová qeʼ, e ten toj jun asamblea te jun qʼij toj 2006 aju tok tbʼi: «Mantengamos el ojo sencillo». Tzaj kyqʼamaʼn jlu: «Chʼixmi toj tkyaqil chmabʼil etz qʼamaʼn tiquʼn nim toklen tuʼn qanqʼin tukʼil nya nim tiʼchaq tuʼntzun qajbʼen mas te Dios. Tej tkubʼaj asamblea, el qnikʼe tiʼj qa mintiʼtoq in kubʼ qanqʼine aju etz qʼamaʼn. Tuʼnju qa ma tzʼok qkeʼyine qe tiʼchaq, jun rat naj in che tzaj qlaqʼoʼne ex attoq nim qkʼase».

 Nim onin asamblea kyiʼj Madián ex Marcela tuʼn tchʼexpaj kyximbʼetz ex toj ambʼil aju ok tilil kyuʼn tuʼn kyanqʼin tukʼil nya nim tiʼchaq. In tzaj kyqʼamaʼntl jlu: «Ya mintiʼ xi qnajsaʼne nim pwaq, o xiʼye anqʼil toj jun apartamento tal chʼin toj, xi qkʼayine qkarroye ex te t-xel tzaj qlaqʼoʼne jun moto». Nya oʼkxju, ya mintiʼ i eʼx kyoj centro comerciales tuʼntzun miʼn ttzaj kylaqʼoʼn mas qe tiʼchaq. Sino el kypaʼn mas ambʼil tuʼn kyyolin tiʼj Biblia kyukʼil xjal. Ok kyamiwen kyibʼ kyukʼil kabʼe precursor especial in che ajbʼen tukʼil nim tzalajbʼil te Jehová. a

 Tej tikʼ chʼin ambʼil, kubʼ kyximen Madián ex Marcela tuʼn kyxiʼ anqʼil ex onil toj jun congregación jatumel chʼin kybʼet erman. Tuʼn tbʼant jlu kyuʼn kyaj ttzaqpiʼn Madián taqʼun. Kubʼ t-ximen xuʼj nejenel toj aqʼuntl qa otoq tzʼok te loc, tuʼntzunju xi tchikʼbʼaʼn tiquʼn in bʼanttoq jlu tuʼn. Xi tqanin Madían jlu: «In kambʼet nim pwaq tuʼna, ¿pero in kubʼpe tnaʼna tzalajbʼil?». Tzaj tqʼamaʼn qa mintiʼ in kubʼ tnaʼn tzalajbʼil tuʼnju attoq nim tproblem. Xitzun ttzaqʼweʼn Madían jlu: «Nya oʼkx jaku qo tzalaj tuʼn pwaq in kambʼet quʼn, sino jaku qo tzalaj tiʼjju qgan tuʼn tbʼant quʼn. Aju in tzaj qʼonte tzalajbʼil weye tukʼil nxuʼjile aju tuʼn qonine kyiʼj xjal tuʼn tel kynikʼ tiʼj Dios, tuʼntzunju qaje tuʼn tel qpaʼne mas ambʼil tuʼn tbʼant jlu quʼne».

 Nimxix in che tzalaj Madián ex Marcela jaʼlo, tuʼnju aju mas nim toklen toj kyanqʼibʼil aju tuʼn kyajbʼen te Dios. Ya ma tzikʼ 13 abʼqʼi in che onin kyoj junjun congregación toj noroeste te Colombia jatumel kyaj erman mas onbʼil. Toj ambʼil jaʼlo precursor especial qeʼ.