In nanqʼin Rachel atz República Dominicana ex in tzaj tqʼamaʼn aju o bʼaj toj tanqʼibʼil: «Testigo de Jehová qe nmane tej wul itzʼje. Noqtzun tuʼnj, tej qʼiʼntoq wuq abʼqʼi wuʼne, ya nya tajtoq nmane tuʼn tten kyukʼil erman, tuʼn tok tbʼiʼn mas tiʼj axix tok ex nimtoq in qʼojin. Jyon nim tumel tuʼn miʼn wajbʼene te Jehová. Ax ikx, tzaj toyin nim tiʼchaq weye, ik tzeʼn jun celular, jun viaje atz Disneyland ex jun tarjeta de crédito noq tuʼn tkyaj ntzaqpiʼne wajbʼebʼile te Jehová. Kyoj junjuntl maj, ok tbʼinchan nya bʼaʼn wiʼje tuʼntzun ‹tkyaj ntzaqpiʼne tuʼn wajbʼene te Jehová›, tuʼnju qa mintiʼ ma chin bʼete ex qa mintiʼ ma bʼant nyoline, mlay bʼant nxiʼye kyoj chmabʼil. Maske bʼant nim tiʼchaq tuʼn nmane, kukx in nok tilil wuʼne tuʼn nxiʼye kyoj chmabʼil.

 «Ok tilil tuʼn nmane tuʼn miʼn tok tkeʼyin ntxuʼye qa in chin oktoq bʼyoʼne tuʼn. Tzaj tqʼamaʼn weye tuʼn miʼn t-xi nqʼamaʼne te ntxuʼye, tuʼnju tqʼama qa ax ikx jaku tzʼok tk’ixbʼisa’n. Ex xi tqʼamaʼn te ntxuʼye qa otoq chin kʼixbʼiye tuʼnju in nok tilil wuʼne toj clase te artes marciales in tzaj tqʼoʼntoq weʼye.

 «Tuʼnju tzmatoq in chin chʼiye, nimtoq in chʼin tzaj xobʼe te nmane. Tuʼn jlu mintiʼ xi nqʼamaʼne te ntxuʼye aju in bʼajtoq wiʼje sino oʼkx te Jehová xi nqʼamaʼne. Ax ikx, in chin extoqe bʼetel nim or toj bosque at tiʼjxi njaye atz Maryland (Estados Unidos). Toj bosque lu at jun matij tzeʼ roble tbʼi ex tbʼanelxix keʼyin. In chin jaxe tibʼaj, aj tkanet jun tqʼabʼ tbʼanelxix wuʼne, in chin kubʼ qeye tibʼaj ex in chin ok tene naʼl Dios te Jehová. In xi nqʼamaʼne te aju in kubʼ nnaʼne ex aju waje tuʼn tbʼant wuʼne tiʼj aj nchʼiye, ax tok, oʼkx qa ma tzʼonin wiʼje tuʼn kukx wanqʼine. Xi nqʼamaʼne te tiʼjju waje tuʼn tbʼant wuʼne toj akʼaj twitz txʼotxʼ, kyiʼj nfamiliaye. Ax ikx, xi nqʼamaʼne te qa ya mlay kubʼ nnaʼne kʼixkʼoj nix xobʼajil, oʼkx tzalajbʼil ex mujbʼabʼil.

 «Tej tok tilil tuʼn nmane tuʼn wok kʼixbʼisane tuʼn ex tuʼn ttzaj tqʼon oyaj weye noq tuʼn tkyaj ntzaqpiʼne tuʼn wajbʼene te Dios, kukx kubʼ nnaʼne qa a Jehová tzaj qʼonte wipumale ex qʼuqbʼil nkʼuʼje. Onin wiʼje tuʼn ntene kyuw ex tuʼn ntene tzʼaqli.

 «Akux qʼiʼntoq 10 abʼqʼi wuʼne in bautisarine ex tej tikʼ kabʼe abʼqʼi xi tzyet tuʼn wajbʼene te precursora. Mintiʼtoq bʼiʼn jlu tuʼn nmane pero tej tok tbʼiʼn tzaj nim tqʼoj ex tuʼn jlu toq tbʼaqil ntziye tej wok kʼixbʼisane tuʼn.

 «Ate’ junjun tzaj kyqʼamaʼn weye tuʼn miʼn woke te precursora tuʼnju tzmatoq kʼwalx qine, tuʼnju in tzaj bʼajtoq kykʼuʼj qa mintiʼ in nel nnikʼe tiʼjju in bʼant wuʼne. Tej tikʼ ambʼil ok nqʼoʼne nwitze kyiʼj nim kuʼxun testigo de Jehová jatumel in chin anqʼine mintiʼtoq in nok tilil kyuʼn tuʼn kyajbʼen te Jehová; oʼkx kyajtoq tuʼn kyxi kyoj fiesta ex tuʼn kytzalaj. Pero kwest ela toj nwitze tuʼn miʼn wok lepeʼye tiʼjju in bʼant kyuʼn tuʼnju wajtoqe tuʼn ntzalaje ik tzeʼn kye. Pero kubʼ nxjeline qa ilpe tiʼj tuʼn npakbʼane mastl or moqa oʼkx tuʼn ntzalaje kyukʼil txqantl kuʼxun. Aj tkubʼ nnane jlu kukxtoq in xi nqʼamaʼne te Jehová.

 «Tej qʼiʼntoq 15 abʼqʼi wuʼne, tzaj llamarin jun agencia kye modelo nim toklen wiʼje. Ex kyqʼamaʼn qa tzultoq kyqʼoʼn nim pwaq weye qa matoq chin aqʼunane kyukʼil atz Milán, toj tnam Italia. Tbʼanel ela jlu toj nwitze, tej ttzaj kyqʼamaʼn qa jakutoq chin oke te modelo, jaku tzʼex nfotoye kyoj revista ex jaku tzʼok nxbʼalune in xi tiʼn nim pwaq twiʼ, tuʼntzun tok kykeʼyin nim xjal. Toj ambʼil aju qʼiʼntoq chʼixme oxe abʼqʼi wuʼne te precursora regular ex kubʼ nximane qa: ‹Tuʼn aqʼuntl lu, jaku ten npwaqe ex jaku tzʼonin wiʼje tuʼn kukx wajbʼene te precursora toj nim ambʼil›. Ex tuʼnju otoq qo kyaj tzaqpiʼne tuʼn nmane, kubʼ nximane qa ax ikx jaku tzʼonin pwaq lu tiʼj ntxuʼye.

 «Ok tene naʼl Dios tiʼjju in bʼajtoq wiʼje. Ex xiʼ nqʼamaʼne te ntxuʼye aju qʼiʼntoq nim abʼqʼi tuʼn te precursora, ax ikx in yoline tukʼil jun ansyan kʼujlan wuʼne ex nimtoq toklen toj nwitze. Ex ik tzeʼn in bʼant wuʼne in xiʼye ex in jaxe twiʼ tzeʼ aju ngane tuʼntzun nnaʼne Dios. Tzaj ttzaqʼweʼn Jehová nnaʼj Diose tej ttzaj tuʼjin ansyan Eclesiastés 5:4 weye. Aju texto lu in tzaj tqʼamaʼn qa ma txi qtziyen jun qyol te Dios il tiʼj tuʼn tjapun quʼn. In tzaj tqʼamaʼn ik tzeʼn jlu ‹Japunx tuʼna aju in xi ttziyana›. Otoq txi ntziyene te Jehová qa ok chin ajbʼele te tuʼn tkyaqil wanmiye ex el nnikʼe tiʼj qa ma txi nkʼamoʼne aqʼuntl, jaku tzaj nya bʼaʼn tiʼj wamiwbʼile tukʼil. Tuʼntzunju mintiʼ xiʼ nkʼamoʼne aqʼuntl lu.

 «Maske in ok weye kywitz nim nya bʼaʼn tej kuʼxun qiʼne i exe kywitz ex toj ambʼil jaʼlo nimxix in chin tzalaje. In chin anqʼine tukʼil nchmile Jaser ex tukʼil qkʼwale Connor te 9 abʼqʼi. O tzaj qʼoʼn toklen nchmile te ansyan, atzun te Connor te pakbʼal naʼmx tjaw aʼ twiʼ. Atzun weye ya qiʼn chʼixme 27 abʼqʼi in chin ajbʼene te Jehová toj tkyaqil ambʼil.

 «Nimku maj in tzaj nnaʼne tej in yoline tukʼil Jehová toj nim ambʼil, akux qʼuqli qine tibʼaj jun tzeʼ roble toj bosque at tiʼjxi njaye. Kukxtoq in chin kubʼsane te Jehová tuʼn tonin wiʼje ex bʼant jlu tuʼn toj jun tten aju mintiʼ kubʼ nximane. Tzaj tqʼoʼn wipumale, qʼuqbʼil nkʼuʼje ex nnabʼile tiʼjju tuʼn tbʼant wuʼne. Toj tkyaqil wanqʼibʼile o tzeʼl nnikʼe tiʼj alkye tbʼanel mambʼaj: Oʼkx Jehová tbʼanelxix mambʼaj. Mintiʼ in tzaj bʼaj nkʼuʼje tuʼnju jaw njyone tuʼn wajbʼene te Jehová tukʼil tkyaqil wanmiye. Atzun jlu mas tbʼanel o jaw njyone toj wanqʼibʼile».