In nanqʼintoq Zarina toj tnam Rusia tej tbautizarin ex ok te testigo de Jehová. Tej tikʼ ambʼil, meltzʼaj toj Asia Central aju ttnam. Tajtoq tuʼn t-xi t-xnaqʼtzaʼn kye kabʼe tal aju otoq tzʼel tnikʼ tiʼj toj Biblia. Nyatoq nim tpwaq Zarina at, tuʼntzunju xiʼ anqʼil toj jun cuart junx kyukʼil qe tman, qe terman ex qe tcuñada. Mintiʼ xi qʼoʼn ambʼil te Zarina kyuʼn tman tuʼn tyolin tiʼj Biblia kyukʼil qe tal, ax ikx xi qʼamaʼn kye tal txin tuʼn miʼn kyyolin tiʼj Tyol Dios tukʼil kytxuʼ.

 Kubʼ t-ximen Zarina tzeʼn jaku tzʼonin kyiʼj qe tal tuʼn tel kynikʼ tiʼj Jehová (Proverbios 1:8). Kukx xi tqanin onbʼil te Dios tuʼn ttzaj tqʼoʼn tnabʼil tuʼn tel tnikʼ tiʼj tiʼ kbʼantel tuʼn. Xi tzyet tuʼn tex bʼetil kyukʼil tal tuʼntzun tyolin kyukʼil tiʼj tbʼinchbʼen Dios. Atzun jlu onin kyiʼj tuʼn tok kyojtzqiʼnxix aju Bʼinchal tkyaqil.

 Tej tikʼ chʼin ambʼil, ul jun tumel toj t-ximbʼetz Zarina tzeʼn tuʼn t-xi tqʼoʼn xnaqʼtzbʼil kye tukʼil libro ¿Tiʼ in tzaj t-xnaqʼtzaʼnxix Tyol Dios? a In che bʼajtoq tcopiarin qe párrafos ex qe xjel toj jun piẍ uʼj, ax ikx in che kuxtoq ttzʼibʼen junjun yol tuʼn tel kynikʼ tal tiʼj xnaqʼtzbʼil. Yajxitl in che kyaj tewin qe nota tukʼil jun lápiz tjaqʼ lavadora aju attoq toj baño. Aj kyokx tal txin toj baño, in jawtoq kyuʼjin ex in kubʼtoq kytzʼibʼen aju otoq tzʼel kynikʼ tiʼj.

 Tuʼnju bʼant jlu tuʼn Zarina, e xnaqʼtzan tiʼj kabʼe capítulo tiʼj uʼj ¿Tiʼ in tzaj t-xnaqʼtzaʼnxix Tyol Dios? naʼmxtoq kyxiʼ anqʼil kyjunalx toj juntl lugar. Tej tbʼant jlu kyuʼn, mintiʼ jun el qʼinte ambʼil te tuʼn t-xi tqʼoʼn xnaqʼtzbʼil kye tal. Toj octubre te 2016, e bautizarin qe kabʼe tal Zarina. Xi kyqʼoʼn txin chjonte te kytxuʼ tuʼnju jyon tumel tuʼn tonin kyiʼj tuʼn tel kynikʼ tiʼj axix tok in tzaj t-xnaqʼtzaʼn Biblia.