Pon jun superintendente te circuito aju Artur tbʼi, visitaril toj jun congregación kye testigo de Jehová toj ttnam Armenia. Ok tbʼiʼn qa mintiʼ in che ex erman pakbʼal kyukʼil carrito jatumel ateʼ nim xjal. Tuʼn tonin kyiʼj erman tuʼn tbʼant jlu kyuʼn, ok tilil tuʼn Artur ex Ana aju t-xuʼjil junx tukʼil juntl ermano Yiraír tbʼi tuʼn kypakbʼan toj jun aldea kyukʼil carrito. Xi kyjyoʼn jun lugar jatumel in che ikʼ nim xjal.

 Tej tok kyqʼoʼn xjal kywitz kyiʼj carrito, ateʼ junjun tzaj kygan tuʼn t-xi kyiʼn junjun kyuʼj. Pero tuʼn akʼaj tten pakbʼabʼil lu, nya bʼaʼn ela toj kywitz junjun xjal. E pon kabʼe pal keʼyil carrito ex jun kyxol noq minabʼen ok tpatadin. Te tibʼajxi jlu ok ttzʼajen toj ttzi Artur ex kubʼ tzʼaq qe tlentes twitz txʼotxʼ. Ok tilil tuʼn Artur, Ana ex Yiraír tuʼn miʼn ttzaj mas kyqʼoj. Pero mintiʼ kubʼ tiʼj kykʼuʼj qe pal kyuʼn, tuʼntzunju e jax weʼ tibʼaj carrito ex i el sputj qe uʼj. Tej tbʼaj kyqʼamaʼn nya bʼaʼn yol kye erman xi kyqʼamaʼn qa kʼokeltoq kybʼinchaʼn nya bʼaʼn kyiʼj Testigo qa kukx in che pakbʼan ex e ikʼ bʼet.

 Xiʼ Artur, Ana ex Yiraír qʼolte jun denuncia moqa jun tqanil kye polisiy. E ok ten qʼamalte tiʼ otoq bʼaj, ax ikx e yolin jun rat tiʼj Biblia kyukʼil polisiy ex kyukʼil junjuntl at kyoklen. Yajxitl xi qʼiʼn Artur, Ana ex Yiraír twitz nejenel kye polisiy, tuʼnju tajtoq tuʼn tok tbʼiʼn tiʼxix otoq bʼaj. Tej tok tbʼiʼn qa mintiʼ aj tqʼoʼn Artur t-xel nya bʼaʼn otoq tzʼok bʼinchan tiʼj, maske nim twaʼlil ex tipumal, ya mintiʼ xi tqanin nejenel mastl xjel tiʼjju otoq bʼaj, sino xi tqanin tiʼjju nimen kyuʼn Testigo. Tej otoq tzikʼ kyaje or in che yolin, nim jaw labʼin nejenel te polisiy ex tqʼama jlu: «¡Tbʼanelxix kyokslabʼile, waje tuʼn nxiʼye kyukʼile!».

 Toj juntl qʼij, xi Artur juntl maj pakbʼal tukʼil carrito. Pon laqʼeʼ jun xjal aju otoq tzʼok tqʼoʼn twitz tiʼjju bʼaj ex xi tqʼamaʼn tbʼanel yol te Artur tuʼnju mintiʼ ok ten qʼojel kyukʼil pal. Ax ikx tqʼama qa ya mlaytoq respetarin kye pal, tuʼn tkyaqil otoq bʼant kyuʼn.

 Ax qonikʼen aju, pon llamarin nejenel kye polisiy te Artur tuʼn tmeltzʼaj tukʼil. Nya tuʼnju tajtoq tuʼn t-xi tqanin mastl tqanil tiʼjju otoq bʼaj, sino tajtoq tuʼn t-xi tqʼanin junjuntl t-xjel tiʼj Biblia. Ax ikx e ten kabʼe polisiy tukʼil tej kyyolin.

 Xiʼ juntl maj Artur visitaril te nejenel te polisiy tuʼn t-xi tyekʼin junjun video tiʼj Biblia ex e tzaj ttxkoʼn nejenel junjuntl polisiy tuʼn tok kyqʼoʼn kywitz kyiʼj video.

 Tuʼn nya bʼaʼn kymod pal kubʼ kyyekʼin onin kyiʼj nim polisiy tuʼn tok kybʼiʼn tnejel maj tbʼanel tqanil in tzaj tqʼamaʼn Biblia ex tbʼanel ela kymod testigo de Jehová toj kywitz.