Ok qʼoʼn jun triángulo púrpura tiʼj kyxbʼalun
Testigo de Jehová Maud ex in nanqʼin atz toj tnam Francia. Ex in nonin kyiʼj kʼwal nya tzʼaqli kyxmilal toj jun escuela. Tej tikʼ chʼin ambʼil, yolin jun aj xnaqʼtzal tiʼjju tej kykubʼ bʼyoʼn nim xjal ex tej tok bʼinchaʼn nya bʼaʼn kyiʼj kyoj campo de concentración nazi. Ex tqʼama qa iltoq tiʼj tuʼn tok kyslepin xjal ateʼkx toj cárcel jun piẍ xbʼalun tiʼj ky-uniforme. Tuʼnju color ex tuʼnju alkye tten bʼinchaʼn maj xbʼalun, el nikʼbʼaj tiʼj tiquʼn otoq che okx qʼoʼn toj cárcel.
Tej kyyolin tiʼj jun piẍ xbʼalun bʼinchaʼn maj ik tzeʼn tríangulo, tqʼama maestro jlu: «Bʼalo ok qʼoʼn jlu kyiʼj xjal ok kyqʼon kyibʼ te xinaq moqa te xuʼj». Tej tkubʼaj xnaqʼtzbʼil, yolin Maud tukʼil maestro ex xi tqʼamaʼn te qa aju xbʼalun púrpura keʼyin ex bʼinchaʼn ik tzeʼn tríangulo, ok qʼoʼn kyiʼj testigos de Jehová. a Ax ikx, xi tqʼamaʼn Maud qa jaku yolin chʼintl tiʼj jlu. Bʼaʼn ela toj twitz maestro ex xi tqʼoʼn ambʼil te tuʼn tyolin tiʼj jlu kywitz txqantl.
Tej kyyolin maestro tiʼj xnaqʼtzbʼil lu toj juntl maj, yolin jun maestra tiʼj junxichaq techel tok tiʼj kyxbʼalun xjal ateʼ toj cárcel. Jun rat el nikʼbʼaj tiʼj qa oʼkx qe testigos de Jehová tok tríangulo púrpura tiʼj kyxbʼalun. Ax ikx, ajbʼen ambʼil lu tuʼn Maud tuʼn tyolin tiʼj xnaqʼtzbʼil lu tukʼil maestra. Tbʼanel ela toj twitz maestra ex xi tqʼamaʼn te tuʼn t-xi tchikʼbʼaʼn kywitz kʼwal.
In tzaj tyekʼin Maud alkyeqe uʼj e ajbʼen tuʼn.
Tej t-xi qʼoʼn ambʼil te Maud tnejel maj, bʼaj tbʼinchaʼn xnaqʼtzbʼil te 15 minut, pero tej tpon ambʼil lu, xi qʼamaʼn jlu te: «Jaku tzaj tchikʼbʼaʼna jlu toj jun or». Tej t-xi tzyet tyolin Maud, ok tqʼoʼn jun video jatumel tzaj yekʼin tiʼ nya bʼaʼn ok bʼinchaʼn kyiʼj testigos de Jehová tjaqʼ tkawbʼil Alemania nazi. Tej tetz qʼamaʼn toj video qa el tpaʼn Alemania 800 kʼwal kyiʼj kytat, jaw tuʼjin Maud junjun txʼolbʼabʼil kyiʼj oxe kʼwal. Ex tej tkubʼaj video, jaw tuʼjin Maud jun carta kubʼ ttzʼibʼin Gerhard Steinacher jun testigo de Jehová toj 1940. Qʼiʼntoq 19 abʼqʼi tuʼn kuʼxun lu ex te tnam Austria. Kubʼ ttzʼibʼin carta tuʼntzun tkyaj tqʼamaʼn qe mankbʼil tyol kye tman tuʼnju chʼixtoq tkubʼ bʼyoʼn kyuʼn nazi. b
Tej t-xi qʼoʼn juntl maj ambʼil te Maud, chʼixme axju tyol xi tqʼamaʼn ik tzeʼn tnejel. Tuʼnju mintiʼ tzaj xobʼ Maud, toj ambʼil jaʼlo, kukx in che yolin kabʼe maestro kyiʼj testigos de Jehová toj clase aj ttzaj kynaʼn aju nya bʼaʼn ok bʼinchaʼn kyiʼj toj campo de concentración nazi.
a Tej tok Tkabʼ Nimaq Qʼoj twitz Tkyaqil Txʼotxʼ, e okx qʼoʼn testigos de Jehová te tnam Alemania toj cárcel tuʼnju mintiʼ e onin kyiʼj nazi. Ax ikx, ok qʼoʼn kybʼi testigos de Jehová lu te Bibelforscher, moqa Xnaqʼtzal tiʼj Tyol Dios.
b Kubʼ bʼyoʼn Gerhard Steinacher tuʼnju mintiʼ okx tqʼon tibʼ kyxol soldad te Alemania. Toj carta kubʼ ttzʼibʼin, kyaj tqʼamaʼn qe yol lu: «Tzma kuʼxun qine. Oʼkx jaku tzikʼx wuʼne qa ma tzaj tqʼoʼn Qman wipumale ex atzun jlu o txi nqanine te». Toj juntl qʼij, kubʼ bʼyoʼn. Ok tzʼibʼin jlu tiʼj tpanteón: «Kyim tuʼnju jaw tnimsaʼn tbʼi Dios».
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tiʼ bʼaj kyiʼj testigo de Jehová tej kykubʼ bʼyoʼn xjal kyuʼn nazi?
Bʼalo jaku jaw labʼina tiʼj tzaqʼwebʼil.
QE XJEL TIʼJ TYOL DIOS
¿Tiquʼn e kubʼ bʼyoʼn nim aj Judiy? ¿Tiquʼn xi tqʼoʼn Dios ambʼil tuʼn tbʼaj jlu?
O kubʼ kyxjelin nim xjal tiquʼn in tzaj tqʼoʼn Dios te kʼujlabʼil ambʼil te nya bʼaʼn. Kkanetel tbʼanel tzaqʼwebʼil tuʼna toj Tyol Dios.