In nul itzʼje atz Calgary, te tnam Alberta (Canadá). Tej kʼwaltoq qine, el kypan kyibʼ ntate ex o xiʼye anqʼil tukʼil ntxuʼye kyja n-aweloye. Kʼujlaʼntoq qoʼye kyuʼn ex nim in tzalaje tej ntene kyukʼil tuʼnju attoq mujbʼabʼil qxole. Kukx in che tzaj nnaʼne ambʼil aju tukʼil nim kʼujlabʼil.

 Chʼexpaj wanqʼibʼile tej qʼiʼntoq 7 abʼqʼi wuʼne. Kubʼ mojeʼ juntl maj ntxuʼye tukʼil ntate ex o xiʼye anqʼil atz San Luis, Misuri (Estados Unidos). El nnikʼe tiʼj qa txʼuʼj twiʼ ntate. Jun maj, tej nmeltzʼaje tnejel qʼij toj tja xnaqʼtzbʼil, el tnikʼ ntate tiʼj qa otoq chin ok bʼyoʼne kyuʼn junjuntl kʼwal ex mintiʼ jun tiʼ otoq bʼant wuʼne. Tzaj nim tqʼoj ex mas in nok bʼyoʼne tuʼn ik tzeʼn kye kʼwal. Atxix toj ambʼil aju xi tzyet tuʼn tokx nqʼon wibʼe toj bʼiybʼil.

 Tzaj nim tqʼoj ntxuʼye tuʼnju nya bʼaʼn tmod ntate, tuʼn jlu in che jawtoq wulin ex in che bʼiyen kyxolx. Tej qʼiʼntoq 11 abʼqʼi wuʼne tzaj tzyet tuʼn nkʼane droga ex qʼeʼn. Ax ikx, mas bʼant nbʼiyene ex ngantoqe tuʼn nqʼojene kyukʼil junjuntl. Tej tetz bʼaj nxnaqʼtzbʼile, mas otoq chin oke te nya bʼaʼn xjal.

 Tej njapune twi 18 abʼqʼi, okx nqʼon wibʼe kyxol soldad te Infantería de Marina te Estados Unidos. Ngantoqe tuʼn nqʼojine, pero atz el nnikʼe tiʼj tzeʼn tuʼn kykyim xjal. Tej tikʼ jweʼ abʼqʼi, kyaj nqʼoʼne ejército ex xi tzyet tuʼn nxnaqʼtzane tiʼj Psicología tuʼntzun waqʼunane toj FBI. Xi tzyet tuʼn nxnaqʼtzane tiʼj carrera lu atz Estados Unidos, yajxitl atz Canadá.

 Tzaj nim nbʼise tej ntene toj universidad tuʼnju el nnikʼe tiʼj qa chʼixme kykyaqil xjal oʼkx in che ximen kyiʼjx. Kubʼ nnaʼne qa mintiʼtoq tajbʼen aju in bʼant kyuʼn xjal ex qa mlayxtoq kyaj bʼant kyiʼj nya bʼaʼn kyuʼn.

 Tej tkubʼ nnaʼne qa mintiʼtoq ttxolil wanqʼibʼile, in jyone tiʼj droga ex tiʼj qʼeʼn. Ax ikx oʼkxtoq in chin ximane tiʼj pwaq ex tiʼj yaẍbʼil. In chinxtoqe kyoj ninqʼij ex in chin kubʼ kuẍeye tukʼil jun ex juntl xuʼj. Kukx okx nqʼon wibʼe toj qʼoj tuʼnju kubʼ nnaʼne qa mlayxtoq kubʼ wiʼje tuʼn juntl xjal. Qa attoq jun xjal in qʼojin tiʼj juntl, kubʼ nximane tuʼn t-xi nbʼinchaʼne tiʼj nya bʼaʼn ex in qʼojine tiʼj xjal. Otoq chin naqʼete tuʼn nbʼiyene.

 Jun maj, o tene toj t-sótano njaye ex xi qkʼaʼne nim droga tukʼil jun wamiwe. Ax ikx bʼaj qbʼinchaʼne jun paquete marihuana tuʼn t-xi qkʼayine toj ewaj. Toj ambʼil aju tzaj tqanin wamiwe weye qa in nok qeʼ nkʼuʼje tiʼj Dios. Xi nqʼamaʼne te: «Qa a Dios at tpaj tiʼj yajbʼil in tzaj kyiʼj xjal, nya waje tuʼn tel nnikʼe tiʼj». Toj juntl qiʼj, in xiʼye tnejel maj toj akʼaj waqʼune ex tzaj tqanin jun wukʼile jlu weye, aju testigo de Jehová: «¿In kubʼpe t-ximana qa a Dios at tpaj tiʼj yajbʼil in tzaj kyiʼj xjal?». Noq in jaw labʼine tej ttzaj tqanin jlu weye ex oʼkx otoq tzikʼ jun qʼij tkubʼlen nxjeline jlu. Wajtoqe tuʼn tel nnikʼe tiʼj xjel lu. Tuʼntzunju kyoj qeju qaq xjaw e ikʼ, nimku maj o yoline ex tzaj tqʼoʼn tzaqʼwebʼil tukʼil Tyol Dios kyiʼj xjel otoq chin ximane tiʼj.

 Aju txin in nanqʼintoqe wukʼile toj ambʼil aju, nya tajtoq tuʼn t-xi nqʼamaʼne jun tiʼ te tiʼjju in neltoq nnikʼe tiʼj. Toj jun domingo xi nqʼamaʼne te qa otoq che tzaj ntxkoʼne testigos de Jehová tuʼn ttzaj kyqʼoʼn xnaqʼtzbʼil qeye tiʼj Tyol Dios. Toj juntl qʼij, tej nmeltzʼaje toj aqʼuntl, ok nqʼoʼn nwitze tiʼj qa otoq che ex tiʼn qe tiʼchaq te ex otoq tzʼex oq. In nexe toj bʼe, in nok tene oqʼel ex xi nqanine te Dios tuʼn tonin wiʼje. Atzun tnejel maj ajbʼen tbʼi Dios wuʼne, aju Jehová (Salmo 83:18).

 Tej tikʼ kabʼe qʼij, xi tzyet tuʼn nxnaqʼtzane tiʼj Tyol Dios tukʼil jun mejebʼleʼn testigo de Jehová. Tej kyaj, jaw wuʼjine uʼj Usted puede vivir para siempre en el paraíso en la Tierra, aju in najbʼentoq kyuʼn tuʼn kyqʼon xnaqʼtzbʼil. Toj junx qonikʼen jaw wuʼjine. a Kuʼpin toj wanmiye aju el nnikʼe tiʼj Jehová ex tiʼj Jesús. El nnikʼe tiʼj qa at qʼaqʼbʼil tkʼuʼj Jehová ex qa in kux choʼn toj tanmi aj ttzaj nya bʼaʼn kyiʼj xjal (Isaías 63:9). Jun tiʼ tbʼanel ela toj nwitze, aju tej tel nnikʼe tiʼj qa kʼujlaʼn qine tuʼn Jehová ex qa otoq kyim Tkʼwal wiʼje (1 Juan 4:10). El nnikʼe tiʼj qa otoq ten nim tpasens wiʼje tuʼnju nya taj «tuʼn tnaj jun xjal, noq oʼkx tajbʼil tuʼn tajtz tiʼj kyanmi kykyaqil» (2 Pedro 3:9). El nnikʼe tiʼj qa tajtoq Jehová tuʼn wok laqʼeʼye ttxlaj (Juan 6:44).

 Toj seman aju xi tzyet tuʼn nxiʼye kyoj chmabʼil. Jakutoq che tzaj xobʼ xjal weye tuʼnju matij ttzmal nwiʼye ex tuʼnju tokx toj nẍkyine. Pero kubʼ kyyekʼin testigos de Jehová tbʼanel kymod wukʼile, ik tzeʼn naʼmxtoq tok kykeʼyin jun toj kyja toj nimku ambʼil. El nnikʼe tiʼj qa axix tok okslal qe. In tzalaje tej ntene kyukʼil ik tzeʼn tej ntene kyja n-aweloye, pero mastoq tbʼanel jlu.

 Tej tikʼ chʼin ambʼil, onin Tyol Dios wiʼje tuʼn tchʼexpaj wanqʼibʼile. El wiʼne ttzmal nwiʼye, ya mintiʼ in yaẍine ex ya mintiʼ in kʼane qʼeʼn nix droga (1 Corintios 6:9, 10; 11:14). Wajtoqe tuʼn ttzalaj Jehová wiʼje. Tuʼntzunju tej tel nnikʼe tiʼj qa nya bʼaʼn junjun tiʼchaq in bʼanttoq wuʼne, kux choʼn toj wanmiye ex nqʼamaye jlu: «Mlay kubʼ nbʼinchaʼne jlu juntl maj». Mintiʼ kubʼ nximane kabʼe maj, ok tilil wuʼne tuʼn tchʼexpaj nximbʼetze ex nmode. Tej tbʼant jlu wuʼne, jun rat el nnikʼe tiʼj qa in tzaj tbʼanel qe aj t-xi qbʼinchaʼn qe tiʼchaq ik tzeʼn taj Jehová. Tej otoq tzikʼ qaq xjaw ttzajlen tzyet tuʼn nxnaqʼtzane tiʼj Tyol Dios, jaw aʼ nwiʼye toj 29 te julio te 1989 ex in noke te testigo de Jehová.

 O tzʼonin Tyol Dios wiʼje tuʼn tchʼexpaj nmode. Qa attoq jun xjal in nok tbʼinchaʼn jun tiʼ wiʼje, jun rattoq in tzaj nqʼoje. Atzun jaʼlo, in nok tilil wuʼne tuʼn ntene «bʼaʼn kyukʼil kykyaqil xjal» (Romanos 12:18). Pero nya wuʼnxe o bʼant chʼixpubʼil lu. Sino noq tuʼn tonbʼil Jehová, tuʼn tonbʼil xewbʼaj xjan ex Xjan Uʼj (Gálatas 5:22, 23; Hebreos 4:12).

 Toj ambʼil jaʼlo, ya mintiʼ in chin bʼiyine, ya mintiʼ in chin yaẍine ex mintiʼ in chin kʼane droga, sino in nok tilil wuʼne tuʼn ttzalaj Jehová ex tuʼn t-xi nqʼoʼne aju mas tbʼanel te. Ax ikx in chin onine kyiʼj xjal tuʼn tel kynikʼ tiʼj Dios. Tej tikʼ junjun abʼqʼi tjawlen aʼ nwiʼye, in xiʼye anqʼil toj juntl tnam jatumel mintiʼxix pakbʼal at tuʼntzun t-xi nqʼamaʼne tbʼanel tqanil kye xjal. Toj nim abʼqʼi o chin tzalaje tuʼn t-xi nqʼoʼne xnaqʼtzbʼil tiʼj Tyol Dios kye xjal ex o tzʼok nkeʼyine alkye tten o chʼexpaj kyanqʼibʼil. Ax ikx in chin tzalaje tuʼnju o tzʼok ntxuʼye te testigo de Jehová, bʼant jlu tuʼn tuʼnju chʼexpaj wanqʼibʼile ex nmode.

 Toj 1999 in graduarine toj jun xnaqʼtzbʼil atz El Salvador aju tok tbʼi toj ambʼil jaʼlo te Xnaqʼtzbʼil kye Pakbʼal tiʼj Tkawbʼil Dios. Atz tzaj qʼoʼn xnaqʼtzbʼil weye tuʼn woke te tbʼanel pakbʼal, tuʼn tex nqʼoʼne xnaqʼtzbʼil toj kʼloj okslal ex tuʼn nxqʼuqine kyiʼj erman. Tojx abʼqʼi aju in kubʼ mojeʼye tukʼil Eugenia. Ex toj ambʼil jaʼlo in qo ajbʼene toj tkyaqil ambʼil te Jehová toj tnam Guatemala.

 Ya mintiʼ in tzaj bʼaj nkʼuʼje, sino at ttxolil wanqʼibʼile ex nimxix in chin tzalaje. O chin tzaqpaje tiʼj bʼiybʼil ex tiʼj yaẍbʼil tuʼn tonbʼil Tyol Dios. Ax ikx in nonin wiʼje tuʼn tkubʼ nnaʼne bʼaʼn ex tuʼn tkubʼ nyekʼine axix tok kʼujlabʼil.