Testigo de Jehová te Marta ex atz in nanqʼin toj tnam Guatemala. In xnaqʼtzan Marta tiʼj yol kekchí tuʼntzun tpakbʼan tiʼj Tyol Dios kye xjal. Jun qʼij, ok tkeʼyin etz jun xjal toj spital ex kubʼ t-ximen qa in yolin xjal lu toj yol kekchí, ex qa tzajni toj jun tal tnam jatumel mintiʼxix in che pakbʼan testigo de Jehová. Xi laqʼeʼ Marta ttxlaj xjal ex xi yolin te toj yol kekchí maske nyaxix ojtzqiʼn yol lu tuʼn.

 Xi tqanin Marta te xjal qa jaku xnaqʼtzan tiʼj Tyol. Xi tqʼamaʼn xjal te Marta qa jaku, noqtzun tuʼnj, xi tqʼamaʼn qa mintiʼtoq tpwaq tuʼn t-xi tchjoʼn. Xi tchikʼbʼaʼn Marta te qa noq kukx in xi kyqʼoʼn testigo de Jehová xnaqʼtzbʼil tiʼj Tyol Dios. Ax ikx, xi tqʼamaʼn Marta te xjal qa jakutoq che xnaqʼtzan toj teléfono ex qa jakutoq che ten qe toj tja. Bʼaʼn ela jlu toj twitz xjal. Xi tqʼoʼn Marta uʼj ¿Tiʼ in tzaj t-xnaqʼtzaʼnxix Tyol Dios? te. Ex tuʼnju bʼaʼn yolin xjal toj kastiy, xi tqʼoʼn Marta jun Biblia toj kastiy te, aju Traducción del Nuevo Mundo. Tej tikʼ jun seman, xi tzyet tuʼn t-xnaqʼtzan xjal tukʼil t-xuʼjil ex kabʼe tkʼwal toj teléfono tukʼil Marta. In che xnaqʼtzantoq kabʼe maj toj seman. In tzaj tqʼamaʼn Marta jlu: «Tuʼnju mintiʼxix in bʼant nyoline toj kekchí, o xnaqʼtzane toj kastiy. In neltoq kynikʼ kʼwal tiʼj yol kastiy, atzunte xjal in xitoq tqʼamaʼn te t-xuʼjil toj yol kekchí».

 In najbʼentoq xjal te pastor ex xi tqʼamaʼn kye xjal in che pon toj iglesia aju in neltoq tnikʼ tiʼj. Tbʼanel ela xnaqʼtzbʼil toj kywitz xjal ex xi kyqanin te jatumel otoq che tzaj tiʼn xnaqʼtzbʼil lu. Tej t-xi tqʼamaʼn kye qa in xnaqʼtzantoq tiʼj Tyol Dios, chebʼe chebʼe ok kymojbʼan kyibʼ junjuntl xjal tukʼil. Tej tikʼ chʼintl ambʼil, in noktoq kychmon kyibʼ junlo 15 xjal junjun seman tuʼn kyxnaqʼtzan tiʼj Tyol Dios tukʼil Marta toj teléfono. Yajxitl, ok kyqʼoʼn jun micrófono ttxlaj teléfono tuʼntzun tok kybʼiʼn aju in xitoq tqʼamaʼn Marta.

 Tej t-xi tqʼamaʼn Marta kye ansyan jatumel in nok tchmon tibʼ qa in xnaqʼtzan jun kʼloj xjal tukʼil, kubʼ t-ximen jun ansyan tuʼn t-xiʼ visitaril kye xjal lu toj tnam jatumel in che anqʼin. Tej tpon ansyan, xi tqʼoʼn txokbʼil kyiʼj xjal tuʼn kyxiʼ bʼil jun chikʼbʼabʼil kʼeletztoq tqʼoʼn ansyan in bʼet kyojele Ja te Chmabʼil toj juntl tnam. a Tuʼn kypon toj tnam aju, iltoq tiʼj tuʼn t-xi kybʼetin jun or toj kar ex kabʼe or tuʼn kyqan. Kyxol xjal lu, i eʼx 17 bʼilte chikʼbʼabʼil.

 Tej tikʼ junjuntl seman, xiʼ ansyan in bʼet kyojele Ja te Chmabʼil ex junjuntl testigo de Jehová visitaril qe xjal lu ex e ten kyaje qʼij kyukʼil. Te prim, in noktoq kyqʼoʼn kywitz kyiʼj video ateʼ jw.org toj yol kekchí ex in kubʼtoq kyxnaqʼtzaʼn uʼj ¿Alkyeqe in kubʼ kybʼinchaʼn tajbʼil Jehová toj ambʼil jaʼlo? Ex te qale, ok kykeʼyin qe programa te JW Broadcasting. Ax ikx, xi tqʼamaʼn ansyan in bʼet kyojele Ja te Chmabʼil tuʼn t-xi qʼet xnaqʼtzbʼil tiʼj Tyol Dios te teyele junjun xjal.

 Kyoj qeju kyaje qʼij, ax ikx e pakbʼan testigo de Jehová kyoj tnam nqayin ateʼ jatumel in che yolin xjal toj yol kekchí, ex xi kyqʼoʼn txokbʼil kye tuʼn kyten toj jun chmabʼil nim toklen. E ten 47 xjal toj chmabʼil lu ex xi qʼamaʼn kye kykyaqil qa jaku txi qʼet xnaqʼtzbʼil tiʼj Tyol Dios te teyele junjun kye. Xi kykʼamoʼn 11 familia txokbʼil lu.

 Tej tikʼ junjun xjaw, kubʼ kyximen ansyan tuʼn kyok chmabʼil aj tjapun junjun seman toj tnam jatumel in nanqʼin xjal xi tzyet tuʼn t-xnaqʼtzan. Toj ambʼil jaʼlo, tkyaqil seman in nok kychmon kyibʼ junlo 40 xjal. Ex toj Nabʼitz Tkyimlen Jesucristo, e pon 91 xjal. ¡Tbʼanelxix jlu!

 Aj ttzaj tnaʼn Marta alkye tten xi tzyet tkyaqil ex tiʼ bʼaj yajxitl, in tzaj tqʼamaʼn jlu: «In xi nqʼoʼne chjonte te Jehová. At maj in kubʼ nnaʼne qa nya nim jaku bʼant wuʼne, pero in qo ajbʼen tuʼn Jehová. Ojtzqiʼntoq tuʼn tiʼ tkuʼx toj kyanmi xjal lu ex e tzaj tiʼn toj ttnam. ¡Qʼanchaʼlxix qa kʼujlaʼnxix qe xjal lu tuʼn Jehová!».