Te tnam Sudáfrica jun txin Danielle tbʼi ex o tzʼok te testigo de Jehová. Kanet tmaletín jun xjal tuʼn toj jun cafetería. Tkuʼxtoq tpwaq xjal toj maletín ex qe tarjeta de crédito. Tuʼnju tajtoq Danielle tuʼn t-xi tqʼoʼn maletín te tajaw, ok ten jyol jun dirección moqa jun número de teléfono, pero oʼkx kanet tbʼi jun xjal tuʼn. Xiʼ toj banco tuʼntzun tkanet xjal lu tuʼn, pero mintiʼ tzaj onin. Yajxitl, kanet jun receta in netz tqʼoʼn jun doctor tuʼn ex xi llamarin toj número tkuʼx toj. Tej t-xi tllamarin, tzaj qʼamaʼn te qa atztoq in llamarin toj jun consultorio médico ex tqʼama recepcionista tuʼn t-xi tqʼoʼn tnúmero Danielle te tajaw maletín.

 Jaw labʼin xjal tej kypon llamarin tiʼj, xi qʼamaʼn te qa otoq kanet tmaletín ex kyajtoq tuʼn t-xi kyqʼoʼn te. Tej tpon xjal qʼilte tmaletín, attoq Danielle tukʼil tman. Ajbʼen ambʼil lu kyuʼn tuʼn t-xi kychikʼbʼaʼn te tiquʼn otoq tzʼok tilil kyuʼn tuʼn tkanet tajaw maletín. Xi kyqʼamaʼn te qa testigo de Jehová qe ex qa in nok tilil kyuʼn tuʼn tkubʼ kybʼinchaʼn aju in tzaj tqʼamaʼn Biblia. Ex xi kyqʼamaʼn te qa nim toklen tuʼn miʼn kysbʼun (Hebreos 13:18).

 Tej tikʼ junjun or, xi tsamaʼn xjal jun mensaje te Danielle ex te tman tuʼn t-xi tqʼoʼn chjonte kye. Xi ttzʼibʼin jlu kye: «Chjonte kyeye tuʼnju ma tzʼok tilil kyuʼne tuʼn nkanete. Tbʼanelxix tuʼnju ma che ok wojtzqiʼne. Mlay tzikʼ tnaʼl wuʼne aju tbʼanel kymode ma kubʼ kyyekʼine wukʼile ex waje tuʼn t-xi nqʼoʼne jun onbʼil kyeye. Ojtzqiʼn wuʼne qa kukx in nok tilil kyuʼne tuʼn t-xi kybʼinchaʼne aqʼuntl o tzaj toqxenin Dios kyeye. Tuʼnju mintiʼ ma tzʼelqʼan Danielle, in tzaj tyekʼin jlu tiʼ kymode at. Tuʼntzunju, in xi nqʼoʼne chjonte kyeye juntl maj ex awt Dios tzaj kʼiwlante aqʼuntl in bʼant kyuʼne».

 Tej tikʼ junjun xjaw, yolin xjal tukʼil tman Danielle ex xi tqʼamaʼn te tiʼ otoq bʼaj tiʼj. Tqʼama xjal qa jaw tskʼoʼn jun tkubʼel pwaq twitz txʼotxʼ akux in laqʼon. Xi tjyoʼn alkye tajaw tkubʼel pwaq ex tej tkanet tuʼn, xi tqʼoʼn juntl maj ex xi tqʼamaʼn te tiquʼn otoq bʼant jlu tuʼn. Xi tqʼamaʼn qa chʼixme ax jlu otoq bʼaj tiʼj ex qa e pon xjal qʼolte qe tiʼchaq te. Tqʼama jlu: «Jaku tzʼonin jun tbʼanel qmod tiʼj juntl ex qa mintiʼ ma qo sbʼun, mas tbʼanel jaku tzʼok kyanqʼibʼil kykyaqil xjal».