Toj tnam Chile, in pakbʼantoq Osman kyukʼil yekʼbʼil uʼj tukʼil t-xuʼjil ex tmeʼjel twitz jun cementerio. Noq minabʼen, e pon xjal maqul jun kyimni ex in qʼajtoq bʼitz kyuʼn. Kubʼ kyximen junjun xjal qa a Osman pastor. Tuʼntzunju, e pon laqʼeʼ ttxlaj, tzaj kychleʼn ex xi kyqʼamaʼn jlu te: «Pastor, chjonte teya tuʼnju ma tzula. In qo ayone tiʼja».

 Xi tqʼamaʼn Osman qa nyatoq pastor, pero mintiʼ el kynikʼ xjal tiʼj jlu tuʼnju attoq nim bulla. Tej kyokx xjal toj cementerio, e meltzʼaj junjun ex xi kyqʼamaʼn jlu te: «Pastor, qkyaqilxe in qo ayone tiʼja».

 Tuʼnju ya mintiʼtoq bulla, xi tqʼamaʼn Osman kye xjal alkyetoq ex tiʼtoq in bʼant tuʼn atz. Tuʼntzunju, tzaj kyqʼoj xjal tuʼnju naʼmxtoq tpon pastor. Pero yajxitl xi kyqʼamaʼn jlu te Osman: «¿Jakupe tzaj tqʼamaʼna junjun yol tkuʼx toj Biblia qeye?». Xi tqʼamaʼn Osman qa jaku.

 Akux in bʼet kyxiʼ, xi tqanin Osman junjun tqanil tiʼj xjal otoq kyim ex ximen kyiʼj junjun texto jakutoq che jaw tuʼjin. Tej tpon, xi tqʼamaʼn qa testigo de Jehová ex qa in yolintoq kyukʼil xjal tiʼj tbʼanel tqanil.

 Jaw tuʼjin Apocalipsis 21:3, 4 ex Juan 5:28, 29, ex xi tchikʼbʼaʼn qa mintiʼ kubʼ t-ximen Dios tuʼn kykyim xjal. Nya oʼkxju, ax ikx xi tqʼamaʼn kye qa che kjawil anqʼin kyimni tuʼn Dios ex qa che anqʼil te jumajx tzalu twitz Txʼotxʼ. Tej tbʼaj yolin Osman, tzaj chleʼn kyuʼn xjal ex xi kyqʼoʼn chjonte te tuʼnju otoq yolin tiʼj «tbʼanel tqanil tzajni tukʼil Jehová». Yajxitl, meltzʼaj pakbʼal kyukʼil carrito.

 Tej kymeltzʼaj toj muqbʼil, ateʼ junjun i ex jatumel ateʼ qe carrito ex xi kyqanin xjel tiʼj Biblia te Osman ex te tfamilia. E yolin nim ambʼil ex tej kyikʼ bʼet, xi kyiʼn chʼixme kykyaqil uʼj tkuʼx toj carrito.