At jun hermano, Bryn tbʼi, in anqʼin Carolina del Norte (Estados Unidos) ex in nonin tiʼj Kʼloj Yolil kyukʼil aj Qʼanil toj tnam aju. In che onin Kʼloj Yolil kyukʼil aj Qʼanil kyiʼj hospital tuʼn kyxi onit qe testigo de Jehová yabʼ ateʼ.

 Tuʼnju tzaj COVID-19, mintiʼtoq in xi kyqʼoʼn hospital ambʼil kye xjal tuʼn kyokx visitaril qe xjal yabʼ ateʼ. Tuʼntzunju, xi llamarin Bryn te jun xjal qʼol tqanil kyiʼj okslabʼil toj jun hospital tuʼntzun ttzaj qʼamaʼn te tiʼ jaku bʼant tuʼn tuʼn tonin kyiʼj testigo de Jehová ateʼ toj hospital.

 ¿Alkye tzaj tzaqʼwente Bryn? Aju onil tiʼj director, ex xi tqʼamaʼn Bryn te xjal qa jaku txi tqʼoʼn tnumero Bryn kye testigo de Jehová yabʼ ateʼ. Iktzun tten jakutoq yolin Bryn kyukʼil erman maske mintiʼ in nokx keʼyil kye. Tbʼanel ela toj twitz xjal in nonin tiʼj director.

 Ax ikx tqʼama Bryn tbʼanel yol kyiʼj xjal in che aqʼunan toj hospital. Xi tqʼamaʼn qa tbʼanelxix aqʼuntl in bʼant kyuʼn ex tajtoq tuʼn kyten toj tbʼanel. Ax ikx, xi tqʼamaʼn qa otoq jaw tuʼjin qa otoq tzaj nim estrés tuʼn pandemia kyiʼj nimku xjal ex jaxku tumel pero mas kyiʼj qeju in che aqʼunan toj hospital.

 Tzaj ttzaqʼweʼn onil tiʼj director qa ax tok in bʼajtoq jlu toj hospital tuʼnju nimtoq xjal yabʼ ateʼ ex nimtoq estrés in tzaj kyiʼj tuʼn COVID-19.

 Xitzun tchikʼbʼaʼn Bryn jlu: «Toj qtembʼile toj internet, jaku kanet onbʼil kyuʼn xjal tzeʼn tuʼn tkubʼ tiʼj estrés kyuʼn. Aj tokx jun xjal toj jw.org ex qa ma kux ttzʼibʼin estrés toj buscador, kkanetel xnaqʼtzbʼil tuʼn aju jaku tzʼonin kyiʼj qeju in che aqʼunan toj hospital».

 Tej kukxtoq tyolin xjal tukʼil Bryn, okx toj qtembʼil te internet ex kux ttzʼibʼin yol estrés toj buscador ex ok tqʼoʼn twitz kyiʼj nim xnaqʼtzbʼil in yolin tiʼj jlu. «¡Tbʼanelxix! Kxel nyekʼine jlu te director, chi xjal. Nim jaku tzʼonin jlu kyiʼj qeju in che aqʼunan toj hospital ex kyiʼj junjuntl xjal. Kʼeletz junjun copia wuʼne ex che xel nsipene».

 Tej tikʼ junjuntl seman, yolin director tukʼil Bryn, ex tzaj tqʼamaʼn qa otoq che okx toj qtembʼil te internet ex qa otoq tzʼetz kyiʼn junjun copia in yolin tiʼj estrés ex junjuntl xnaqʼtzbʼil. Ex otoq txi kysipen kyxol enfermera ex kyxol junjuntl aqʼunal te hospital.

 Tqʼamatl Bryn jlu: «Tzaj tqʼoʼn director chjonte tiʼjju aqʼuntl in bʼant quʼn tuʼn kyetz xnaqʼtzbʼil tuʼnju tbʼanelxix bʼinchaʼn maj qe. Tzaj tqʼamaʼn qa otoq che kanet tbʼanelxix nabʼil tuʼn kyoj».