Testigo de Jehová Elisa ex in xitoq tqʼoʼn xnaqʼtzbʼil te jun xuʼj atz tja. Akux in che xnaqʼtzantoq, pon jun pal tukʼil t-xuʼjil visitaril te xuʼj tja. Otoq tzʼok tbʼiʼn Elisa qa tzmatoq in nikʼ chʼin ambʼil tkyimlen jun kykʼwal mejebʼleʼn lu.

 Tej t-xi tqʼamaʼn Elisa qa tzaj tbʼis tiʼjju otoq bʼaj kyiʼj, jaw oqʼ pal tukʼil t-xuʼjil. Yajxitl, tqʼama pal jlu tukʼil tqʼoj: «¡Mintiʼ in nel nnikʼe tiʼj tiquʼn in tzaj tqʼoʼn Dios ambʼil tuʼn qikʼ toj bʼis ik tzeʼn jlu! ¿Tiquʼn ma tzʼel tiʼn oʼkxku jun nkʼwale? Ya ma tzikʼ 28 abʼqʼi in chin ajbʼene te Dios ex o bʼant nim tbʼanel tiʼchaq wuʼne. ¿Atzun tumel in chin tzaj tchjoʼne? ¿Tiquʼn kubʼ tbʼyoʼn nkʼwale?».

 Xi tchikʼbʼaʼn Elisa te pal qa nya a Dios otoq txi qʼinte tkʼwal. Ax ikx e yolin tiʼj chojbʼil bʼant tuʼn Jesús, tiʼj xnaqʼtzbʼil qa che jawil anqʼin kyimni ex tiquʼn in tzaj tqʼoʼn Dios ambʼil tuʼn qikʼ toj nya bʼaʼn. Xi tqʼamaʼn pal tukʼil t-xuʼjil te Elisa qa otoq kanet tzaqʼwebʼil tiʼj kyxjel xi kyqanin te Dios.

 Tej tikʼ juntl seman, meltzʼaj pal tukʼil t-xuʼjil tja xuʼj in xnaqʼtzan tiʼj Tyol Dios. In xnaqʼtzantoq Elisa tukʼil xuʼj tiʼj xnaqʼtzbʼil «Ok che jawil anqʼin kyimni», aju tkuʼx toj uʼj ¿Tiʼ in tzaj t-xnaqʼtzaʼnxix Tyol Dios? Xi tqʼoʼn pal tukʼil t-xuʼjil junjun kyyol tiʼj xnaqʼtzbʼil.

 Tej tikʼ ambʼil, xiʼ mejebʼleʼn lu toj jun nimaq chmabʼil nim toklen kye testigos de Jehová atz Tiflis te tnam Georgia. E jaw labʼin tiʼj kʼujlabʼil ex tiʼj mujbʼabʼil at kyxol erman. Otoq tzʼok tilil kyuʼn tuʼn tten mujbʼabʼil kyxol xjal toj iglesia, pero mintiʼx kanet tumel kyuʼn.