«Qʼamanxa kye qa kʼujlaʼn qe tuʼna»
In nanqʼin Ong-Li toj tnam Bulgaria ex o tzʼok te testigo de Jehová. In xitoq tqʼoʼn xnaqʼtzbʼil tiʼj Tyol Dios te jun xuʼj moqa qya Zlatka tbʼi. Otoq kubʼ mojeʼ Zlatka tukʼil jun xjal nya tgan tuʼn tbʼin tiʼj Tyol Dios. In tzaj tqʼamaʼn Ong-Li jlu: «Tej t-xi tzyet tuʼn qyoline tukʼil Zlatka kyiʼj toj qjaye, xi nqʼamaʼne te qa nim toklen tuʼn t-xi qqʼamaʼn te qchmil ex kye qal qa kʼujlaʼn qe quʼn. Pero in bʼisintoq tej ttzaj tqʼamaʼn weye qa ni jun maj o txi tqʼamaʼn te tchmil ex te tal te nueve abʼqʼi qa kʼujlaʼn qe tuʼn».
Atzunte Zlatka tqʼama jlu: «Jaku bʼant noq tiʼxku wuʼne kyiʼj toj njaye, pero mlayx bʼant jun tiʼ wuʼne tuʼn t-xi nqʼamaʼne qe yol aju». Ex tqʼamatl jlu: «Ni jun maj o tzaj tqʼamaʼn ntxuʼye qa kʼujlaʼn qine tuʼn ex ni jun maj xi tqʼamaʼn nyaye qe yol lu te ntxuʼye». Xitzun tyekʼin Ong-Li te Zlatka qa in tzaj tqʼamaʼn Biblia qa xi tqʼamaʼn Jehová te Jesús tukʼil tqʼajqʼajel twiʼ qa kʼujlaʼn tuʼn (Mateo 3:17). Tuʼntzunju, xi tqʼamaʼn Ong-Li te Zlatka tuʼn t-xi tqanin onbʼil te Jehová ex tuʼn tok tilil tuʼn tuʼn t-xi tqʼamaʼn te tchmil ex te tal qa kʼujlaʼn qe tuʼn.
Tqʼamatl Ong-Li jlu: «Tej tikʼ kabʼe qʼij, in tzalaj Zlatka tej ttzaj tqʼamaʼn weye qa otoq txi tqanin onbʼil te Jehová. Tqʼama qa tej tmeltzʼaj tchmil, xi tchikʼbʼaʼn te qa otoq tzʼel tnikʼ tiʼj toj Tyol Dios qa nim toklen tuʼn trespetarin xuʼjilbʼaj te tchmil ex tuʼn tok tkʼujlaʼn. Kubʼ weʼ jun rat ex xi tqʼamaʼn te tchmil qa kʼujlaʼn tuʼn. Te tibʼajxi, tej tmeltzʼaj tal, tzaj tchleʼn ex xi tqʼamaʼn te qa kʼujlaʼn tuʼn». Tqʼama Zlatka jlu te Ong-Li: «In kubʼ nnaʼne nim tzalajbʼil. Kyoj qe abʼqʼi o che ikʼ, mintiʼ ten wipumale tuʼn t-xi nqʼamaʼne aju in kubʼ nnaʼne kyiʼj toj njaye. Pero tuʼn tonbʼil Jehová, ma txi nqʼamaʼne kye qa kʼujlaʼn qe wuʼne».
Kukx in nok tilil tuʼn Ong-Li tuʼn t-xi tqʼoʼn xnaqʼtzbʼil tiʼj Tyol Dios kye tvecin.
Tqʼama Ong-Li jlu: «Tej tikʼ junjun seman, ok wojtzqiʼne tchmil Zlatka ex tqʼama jlu: ‹Nim xjal o tzaj kyqʼamaʼn weye qa nya bʼaʼn tuʼn t-xnaqʼtzan Zlatka tiʼj Biblia kyukʼile, pero tuʼnju in xnaqʼtzan, nim o tzʼonin kyiʼj toj qjaye. Jaʼlo, mas at mujbʼabʼil qxole ex mas in qo tzalaje›».
Bʼalo ax ikx tgana jlu
TQANIL KYIʼJ TESTIGOS DE JEHOVÁ
¿Tiquʼn bʼaʼn tuʼn t-xnaqʼtzana tiʼj Tyol Dios?—Video matij tqan
O tzʼonin Tyol Dios kyiʼj nimxix xjal tuʼn kykanet tzaqʼwebʼil nimxix kyoklen kyuʼn. In qo txokine tiʼja tuʼn t-xnaqʼtzana tiʼj Tyol Dios.