Toj 2017, i eʼx 12 testigo de Jehová toj jun bark Sturi Yamni tbʼi toj jun lugar Costa de los Mosquitos moqa Mosquitia atz Nicaragua. Tzaj tnaʼn Stephen jlu, jun kyxol qeju i eʼx toj viaje: «Qajtoqe tuʼn qxiʼye visitaril junjun testigo de Jehová in che anqʼin atz tuʼntzun t-xi qqʼuqbʼaʼne kykʼuʼj ex tuʼn qonine kyiʼj tuʼn t-xi tpakbʼet tbʼanel tqanil toj lugar jatumel ateʼ».

 Xi tzyet kyviaje 12 testigo de Jehová atz Laguna de Perlas, e ikʼ atz Río Grande de Matagalpa ex e pon toj lugar La Cruz de Río Grande. Tuʼn tkyaqil, xi kybʼetin 200 kilómetro. Toj ambʼil aju, mintiʼ kubʼ kyximen erman qa «tbʼanel tqanil» t-xilen tbʼi bark toj yol misquito. Ex mintiʼtoq ojtzqiʼn kyuʼn qa kʼokel ambʼil lu te tbʼanel tqanil kye xjal in che anqʼin ttzi aʼ. Xi kybʼetin erman 12 or tuʼn kypon jatumel otoq kubʼ kyximen. In che ayontoq qaq testigo de Jehová kyiʼj ex in che tzalaj kyiʼj tej kypon.

 Toj qonikʼen aju, bʼaj jun tiʼ ex e tzaj xobʼ tuʼn. Tzaj nim jbʼal ex jaw chʼiy aʼ jatumel in tzaj Río Grande de Matagalpa. Tej tikʼ junjun or, etz aʼ toj tlugar ex mas jaw chʼiy kyoj kabʼe qʼij. Okx bʼaj aʼ toj Ja te Chmabʼil ex kyoj nim ja te La Cruz. E onin erman otoq che pon visitaril tuʼn kyetz xjal toj kyja. Chʼixme kykyaqil xjal e kyaj ten kabʼe qonikʼen toj tja jun ermana te kabʼe nivel.

 Toj toxin qonikʼen, xi tqanin alcalde de La Cruz onbʼil kye erman otoq che pon toj bark. Jakutoq tzikʼx bark toj río maske otoq jaw chʼiy tuʼnju nya fácil tuʼn t-xi mulqʼaj. Tuʼntzunju, xi tqanin alcalde qa jakutoq chex qʼiʼn junjun xjal toj bark mas kubʼni tuʼntzun kyxiʼ onil kyiʼj qeju otoq tzaj nya bʼaʼn kyiʼj. Tuʼn tkyaqil kykʼuʼj testigo de Jehová e onin.

 Toj juntl qʼij, i eʼx oxe testigo de Jehová kyukʼil xjal e onin kyiʼj txqantl. Tqʼama Stephen jlu: «Jakutoq tzaj nya bʼaʼn qiʼj aj qxiʼ toj bark. Otoq che ikʼ tzʼaq nim tzeʼ ex in chex iqin tuʼn aʼ, attoq nim remolino ex mas te 18 kilómetro bʼet aʼ toj jun or». Maske ikju, bʼant tuʼn kyonin kyiʼj xjal toj oxe aldea.

 Kyajtoq xjal qʼuqbʼil kykʼuʼj ex ajbʼen ambʼil lu kyuʼn oxe erman tuʼn kyyolin tiʼj tbʼanel tqanil tuʼntzun tqeʼ kykʼuʼj. Ax ikx, xi kysipin junjun ¡Despertad! te 2017 kye xjal aju tok tbʼi: «Cuando golpea un desastre. Qué hacer para sobrevivir». Atzun revista lu kyajtoq xjal tuʼn tjaw kyuʼjin toj ambʼil aju.

 Tzaj kyqʼoʼn xjal chjonte tiʼj onbʼil xi qʼoʼn kye ex tuʼnju xi qʼuqbʼaʼn kykʼuʼj kyuʼn testigo de Jehová. Ateʼ junjun kyqʼama jlu: «Ma kubʼ kyximane tuʼn kyonine qiʼje kyoj ambʼil mas kwest». Atzun junjuntl kyqʼama jlu: «Ax tok in che ok kykʼujlaʼn qe xjal». Tuʼnju ok tilil kyuʼn testigo de Jehová tuʼn kyonin kyiʼj erman ex kyiʼj junjuntl xjal toj lugar aju, mas in nok kybʼiʼn xjal tbʼanel tqanil toj ambʼil jaʼlo.