Onin Yanmei, jun testigo de Jehová te Asia, tuʼn tikʼx bʼet Kailan toj bʼe tuʼnju moẍ. a Tuʼn jlu xi tqʼamaʼn Kailan te Yanmei: «¡Chjonte teya! ¡Awt Dios kʼiwlante teya!». Xi tqanin Yanmei te Kailan qa jaku bʼant tuʼn kyyolin toj juntl qʼij tuʼntzun kyyolin tiʼj Tyol Dios. Tej tikʼ chʼin ambʼil, xi tqʼamaʼn Kailan te Yanmei qa otoq txi tqanin te Dios tkyaqil qʼij tuʼn tonin tiʼj tuʼn tkanet axix tok okslabʼil tuʼn. ¿Tiquʼn otoq txi tqanin jlu?

 Tzaj tchikʼbʼaʼn Kailan qa toj 2008 tzaj tqʼoʼn jun tamiw txokbʼil tiʼj aju ax ikx moẍ tuʼn t-xi toj jun iglesia aju in nonin kyiʼj xjal nya tzʼaqli kyxmilal moqa impedid. Tej otoq tzʼetz tqʼoʼn pal tchikʼbʼabʼil xi tqanin Kailan te jatumel otoq jatz tiʼn, xi tqʼamaʼn te qa toj Biblia. Tej tok tbʼiʼn jlu ten tgan tuʼn tjaw tuʼjin. Kanettzun jun Tyol Dios tuʼn toj braille toj yol chino ex jaw tuʼjin qeju 32 volúmenes toj qaq xjaw. Tuʼn jlu el tnikʼ tiʼj qa aju xnaqʼtzbʼil in tzaj qʼamaʼn toj t-iglesia tiʼj trinidad nya ax tok ex qa at jun tbʼi Dios, aju Jehová.

 Ax ikx, tzaj tbʼis Kailan tuʼn kymod xjal in che pon toj iglesia tuʼnju el tnikʼ tiʼj qa mintiʼ in che anqʼin ik tzeʼn in jaw kyuʼjin toj Tyol Dios. Jun techel, aj kyxi’ sipil wabʼj in xi kyqʼoʼn oʼkx aju otoq kyaj sobrin kye xjal moẍ. Tzaj nim tbʼis Kailan tuʼn tkyaqil nya bʼaʼn lu, tuʼntzunju jyon kyiʼj junjuntl iglesia nqayin tiʼj tja. Ex tuʼn jlu xi tqanin te Dios tuʼn kykanet axix tok okslal tuʼn.

 Kubʼ tnaʼn Kailan tzalajbʼil tuʼnju onin Yanmei tiʼj, ex xi tzyet tuʼn t-xnaqʼtzan tiʼj Tyol Dios. Yajxitl, xi Kailan tnejel maj toj kychmabʼil testigos de Jehová. In tzaj tqʼamaʼn jlu qe: «Kukx naʼn chmabʼil lu wuʼne. ¡Tzaj kyqʼolbʼen erman qine tukʼil nimxix kʼujlabʼil! Kubʼ nnaʼne bʼaʼn... Moẍ qine, pero kubʼ nnaʼne axix tok kʼujlabʼil at kyxol».

 Kukx chʼiy Kailan toj tokslabʼil ex xiʼ toj kykyaqil chmabʼil. Tgantoq tuʼn tbʼitzin kyiʼj bʼitz pero mintiʼtoq toj braille aju in najbʼentoq tuʼn. Tukʼil onbʼil tzaj kyqʼoʼn erman, kubʼ ttzʼibʼin qe bʼitz in cheʼx bʼitzet. ¡Xi tiʼn 22 or tuʼn tkubʼ ttzʼibʼin qeju 151 bʼitz toj braille! Toj abril te 2018, xi tzyet tuʼn tpakbʼaʼn Kailan. Atxix toj ambʼil aju pakbʼan 30 or kykyaqil xjaw.

 Tuʼn tbʼaj tbʼinchaʼn tten Kailan tuʼn tbautisarin, kubʼ tgrabarin Yanmei qe xjel ex qe versículo tkuʼx toj uʼj Organizados para hacer la voluntad de Jehová. Ex toj julio te 2018 bautisarin Kailan. In tzaj tqʼamaʼn jlu: «Tuʼnju kubʼ kyyekʼin erman kykʼujlabʼil wiʼje toj asamblea aju pon toj wanmiye. Nimxix in jaw tzalaje ex in jaw oqʼe, tuʼnju otoq chin okxe toj axix tok okslabʼil» (Juan 13:34, 35). Taj Kailan tuʼn tkubʼ tyekʼin tkʼujlabʼil kyiʼj txqantl ik tzeʼn kubʼ yekʼin tiʼj, tuʼntzunju o tzʼok te pakbʼal toj tkyaqil ambʼil.