Toj tnam te Estados Unidos in nanqʼin jun testigo de Jehová Brooke tbʼi. Tej ttzaj pandemia te COVID-19, kukx pakbʼaʼn kyoj carta. Ax ikx, e bʼant nim carta tuʼn tkyaqil seman, pero tej tikʼ jun abʼqʼi tukʼil mij moqa nik’jan tzaj bʼaj tkʼuʼj. Tuʼnju oʼkx jun xjal otoq tzaj ttzaqʼweʼn tcarta ex noq tuʼn ttzaj tqʼamaʼn tuʼn miʼn tpon tsamantl mastl carta te. Tuʼntzunju, kubʼ t-ximen Brooke qa noqx gan in nok tilil quʼn tuʼn qbʼinchan kyiʼj carta.

 Tej tikʼ ambʼil, xi tqʼamaʼn Kim aju juntl testigo de Jehová te Brooke qa otoq yolin tukʼil jun xjal toj banco jatumel in naqʼunan. Ex xi tqʼamaʼn xjal te Kim qa otoq jaw tuʼjin jun carta aju tzʼibʼin tuʼn qʼobʼaj tuʼn jun testigo de Jehová. Yajxitl ok tbʼiʼn Kim qa aju carta lu ¡atzun jun kyxol qe carta otoq che bʼant tuʼn Brooke! Tej tikʼ jun seman, meltzʼaj juntl maj xjal toj banco ex xi tqanin te Kim qa jaku ten kyoj chmabʼil aqeju in che ok toj videoconferencia moqa toj internet toj ambʼil aju.

 Yajxitl, xi tqʼamaʼn juntl testigo de Jehová David tbʼi te Brooke qa yolin tukʼil jun tukʼil toj aqʼuntl ex qa otoq jaw tuʼjin jun kyxol qe carta in kubʼ ttzʼibʼin. Nim jaw labʼin xjal lu tuʼnju el tnikʼ tiʼj qa tzʼibʼin carta tukʼil qʼobʼaj. Ex tzaj tqʼamaʼn: «Noqwit kukx ateʼ xjal in che ximen kyiʼj txqantl ik tzeʼn jlu». Ajbʼen ambʼil toj tumel tuʼn David tuʼn tpakbʼan te xjal ex xi tqanin te qa tajtoq tuʼn tjaw tuʼjin jun kyxol qe uʼj in che etz kyuʼn testigo de Jehová. Tzaj tqʼamaʼn xjal qa taj tuʼn tjaw tuʼjin ex xi tqʼoʼn chjonte te David.

 Mintiʼ ojtzqiʼn kyuʼn testigo de Jehová alkyeqe xjal in che pakbʼan kye kxel kynimen tbʼanel tqanil (Eclesiastés 11:5, 6). Onin qe experiencia lu tiʼj Brooke tuʼn tel tnikʼ tiʼj qa nim toklen tuʼn kukx tpakbʼan (1 Corintios 3:6).